قازاقستان رەسپۋبليكاسى پارلامەنتى ءماجىلىسىنىڭ توراعاسى ورال مۇحامەدجانوۆ باستاعان قازاقستاندىق دەلەگاتسيا كەشە سانكت-پەتەربۋرگ قالاسىنا كەلدى. قازاقستان پارلامەنتشىلەرى ءساۋىردىڭ 5-ءى مەن 8-ءى ارالىعىندا سانكت-پەتەربۋرگ قالاسىندا تمد ەلدەرى جانە ەۋرازەق پارلامەنتارالىق اسسامبلەيالارى مەن ۇجىمدىق قاۋىپسىزدىك شارتى ۇيىمىنىڭ پارلامەنتتىك اسسامبلەياسى (ۇقشۇ پا) شەڭبەرىندە وتەتىن بىرقاتار ماڭىزدى شارالارعا قاتىساتىن بولادى.
كەشە قازاقستاندىق دەپۋتاتتار اتالعان شارالارعا بايلانىستى قۇجاتتارمەن تانىستى. ال ءبۇگىن پارلامەنتشىلەر ۇقشۇ پا كەڭەسى جانىنداعى ساراپتاما-كەڭەستىك كوميسسيانىڭ باسقوسۋىنا, سونداي-اق ەۋرازەق پاا-نىڭ قۇقىقتىق, اگروونەركاسىپ ساياساتى, تابيعات پايدالانۋ جانە ەكولوگيا ماسەلەلەرى جونىندەگى تۇراقتى كوميسسياسىنىڭ وتىرىستارىنا قاتىسادى.
وسى كۇنى قازاقستان دەلەگاتسياسىنىڭ قاتىسۋىمەن تمد پاا-نىڭ ساياسي ماسەلەلەر مەن حالىقارالىق ىنتىماقتاستىق, قورعانىس جانە قاۋىپسىزدىك ءجونىندەگى تۇراقتى كوميسسياسىنىڭ وتىرىسى وتەدى. سەيسەنبى كۇنگى باعدارلاماعا سايكەس تمد پاا-نىڭ الەۋمەتتىك ساياسات جانە ادام قۇقىقتارى, عىلىم جانە ءبىلىم ءجونىندەگى تۇراقتى كوميسسياسىنىڭ وتىرىسى بولادى (كوميسسيا جۇمىسىنىڭ كەزەڭىندە تمد-عا مۇشە مەملەكەتتەر ءۇشىن يننوۆاتسيالىق كودەكستىڭ ۇلگىلىك جوباسىن دايىنداۋ تۋرالى جۇمىس توبىنىڭ وتىرىسى وتەتىنى قاراستىرىلعان).
ەۋرازەق پارلامەنتارالىق اسسامبلەياسى اياسىندا كەدەندىك رەتتەۋ جانە شەكارالىق ساياسات, ساۋدا ساياساتى جانە حالىقارالىق ىنتىماقتاستىق جونىندەگى تۇراقتى كوميسسياسىنىڭ وتىرىسى وتەتىنى كوزدەلۋدە.
سونداي-اق باعدارلامادا ۇقشۇ پا-نىڭ الەۋمەتتىك-ەكونوميكالىق جانە قۇقىقتىق ماسەلەلەر, قورعانىس جانە قاۋىپسىزدىك, ساياسي ماسەلەلەر جانە حالىقارالىق ىنتىماقتاستىق جونىندەگى تۇراقتى كوميسسيالارىنىڭ وتىرىستارى وتەتىنى جوسپارلانىپ وتىر.
سەيسەنبى كۇنى ەۋرازەق پاا-نىڭ جانە تمد پاا كەڭەسىنىڭ بيۋرو وتىرىستارى وتەدى. سونىمەن قاتار قر پارلامەنتى ءماجىلىسىنىڭ توراعاسى و.مۇحامەدجانوۆ تمد پاا-نىڭ ءتوراعاسى, رەسەي فەدەراتسياسى فەدەرالدىق جينالىسى فەدەراتسيا كەڭەسىنىڭ توراعاسى س.ميرونوۆپەن, سونداي-اق قىرعىز رەسپۋبليكاسى جوعارعۋ كەنەشىنىڭ ءتوراعاسى ز.قۇرمانوۆپەن كەزدەسەدى دەپ كۇتىلۋدە.
دەلەگاتسيا ساپارى 7 جانە 8 ءساۋىر كۇندەرى دە جالعاسادى.
ءلايلا ەدىلقىزى – سانكت-پەتەربۋرگتەن.