كەشە استانادا قازاقستان, رەسەي, بەلارۋس ەلدەرىنىڭ ۇكىمەت باسشىلارى سەرىك احمەتوۆ, دميتري مەدۆەدەۆ, ميحايل مياسنيكوۆيچ جوعارى ەۋرازيالىق ەكونوميكالىق كەڭەستىڭ ۇكىمەت باسشىلارى دەڭگەيىندەگى وتىرىسىن وتكىزدى. وتىرىسقا ۋكراينا مەن قىرعىزستان پرەمەر-مينيسترلەرى نيكولاي ازاروۆ پەن جانتورو ساتىبالديەۆ بايقاۋشىلار رەتىندە قاتىستى. وتىرىستا كەدەن وداعى مەن ءبىرتۇتاس ەكونوميكالىق كەڭىستىكتى ودان ءارى دامىتۋدىڭ جانە ەۋرازيالىق ەكونوميكالىق وداقتى قۇرۋدىڭ كۇن تارتىبىندە تۇرعان نەعۇرلىم وزەكتى ماسەلەلەرى قارالدى.
كەشە استانادا قازاقستان, رەسەي, بەلارۋس ەلدەرىنىڭ ۇكىمەت باسشىلارى سەرىك احمەتوۆ, دميتري مەدۆەدەۆ, ميحايل مياسنيكوۆيچ جوعارى ەۋرازيالىق ەكونوميكالىق كەڭەستىڭ ۇكىمەت باسشىلارى دەڭگەيىندەگى وتىرىسىن وتكىزدى. وتىرىسقا ۋكراينا مەن قىرعىزستان پرەمەر-مينيسترلەرى نيكولاي ازاروۆ پەن جانتورو ساتىبالديەۆ بايقاۋشىلار رەتىندە قاتىستى. وتىرىستا كەدەن وداعى مەن ءبىرتۇتاس ەكونوميكالىق كەڭىستىكتى ودان ءارى دامىتۋدىڭ جانە ەۋرازيالىق ەكونوميكالىق وداقتى قۇرۋدىڭ كۇن تارتىبىندە تۇرعان نەعۇرلىم وزەكتى ماسەلەلەرى قارالدى.
وتىرىستان كەيىن بولعان جۋرناليستەرمەن كەزدەسۋدە قازاقستان ۇكىمەتىنىڭ باسشىسى سەرىك احمەتوۆ پەن ەۋرازيالىق كوميسسيا القاسىنىڭ توراعاسى ۆيكتور حريستەنكو وسى جايىندا شاعىن حابارلاما جاسادى.
– ءبىرىنشى كەزەكتە ايتاتىن ماسەلە, بۇگىنگى باسقوسۋدا ەۋرازيالىق ەكونوميكالىق وداقتى قالىپتاستىرۋعا نەگىزدەلگەن ينتەگراتسيالىق ۇدەرىستەردى ودان ءارى تەرەڭدەتۋدىڭ جەكەلەگەن ماسەلەلەرى قارالىپ, ءساتتى شەشىمىن تاپقاندىعىن حابارلاماقپىن. بۇگىنگى باسقوسۋدىڭ نەگىزگى ماڭىزدى قورىتىندىسى ءبىرتۇتاس كەدەندىك اۋماققا كىرگىزىلەتىن ازاماتتىق ۇشاقتار مەن استىق كومبايندارى تۋرالى شەشىمگە قول قويىلۋى بولدى. بۇل ماسەلە كوپتەن بەرى تالقىلانىپ كەلە جاتقان ەدى. اتالعان قۇجات كەدەن وداعى ەلدەرىنە اۋە كولىگى, اۋىل شارۋاشىلىعى, ونەركاسىپ سالالارىن ءتيىمدى دامىتۋعا مۇمكىندىك بەرەدى. سونداي-اق 2011-2012 جىلدارى قولدانىلعان كەدەن وداعى اۋماعىنا كىرگىزىلەتىن تاۋارلارعا كەدەندىك باج سالىعىن بەلگىلەۋ مەن ءبولۋدىڭ تەتىگى ماقۇلداندى. ويتكەنى, بۇل تەتىك ءوزىنىڭ تيىمدىلىگىن كورسەتتى. وسى باعىتتاعى بىرلەسكەن جۇمىستاردىڭ ءبىزدىڭ ەلدەرىمىزدىڭ اراسىنداعى ينتەگراتسيالىق ۇدەرىستەردىڭ جوعارى قارقىنمەن دامىپ كەلە جاتقاندىعىن جانە ونىڭ ۇلكەن الەۋەتى بار ەكەندىگىن, سونىمەن قاتار, ءبىزدىڭ ەلدەرىمىزدىڭ اراسىندا ارىپتەستىك قارىم-قاتىناستاردىڭ بۇكىل الەۋەتى ءتيىمدى پايدالانىلىپ كەلە جاتقاندىعىن تاعى ءبىر دالەلدەدى, دەپ مالىمدەدى سەرىك احمەتوۆ.
ۆيكتور حريستەنكو ءوز سوزىندە باسقوسۋ وتە تاماشا جاعدايدا وتكەندىگىن مالىمدەدى.
ادەتتە ينتەگراتسيالىق ۇدەرىستەر تەرەڭدەگەن سايىن ونىڭ قارالاتىن ماسەلەلەرى دە جەڭىلدەي تۇسەدى دەگەن تۇسىنىك بار. دەگەنمەن, ءبىز بۇگىنگى باسقوسۋدا ينتەگراتسيالىق ۇدەرىستەر تەرەڭدەگەن سايىن قارالاتىن ماسەلەلەردىڭ دە تەرەڭدەپ, كۇردەلەنە بەرەتىندىگىن بايقادىق. وسىنداي كەزدە ءۇش ەل اراسىنداعى ورتاق تۇسىنىستىك پەن قارىم-قاتىناس الەۋەتىنىڭ زور ەكەندىگى تاعى ءبىر دالەلدەندى. بۇگىنگى استىق كومباينى مەن ازاماتتىق ۇشاق جونىندە ورتاق كەلىسىمگە كەلگەنىمىز سونىڭ تاعى ءبىر كورىنىسى بولدى. ونىڭ ۇستىنە الەمدى داعدارىس كەرنەپ وتىرعاندىعىنا قاراماستان, ءۇش ەل اراسىنداعى ساۋدا كولەمى سوڭعى 7 ايدا تاعى دا 3,6 پايىزعا ارتا ءتۇستى, دەپ مالىمدەدى ۆيكتور حريستەنكو.
سۇڭعات ءالىپباي,
«ەگەمەن قازقاستان».