قازاقستان رەسپۋبليكاسىنىڭ قورعانىس ءمينيسترى ادىلبەك جاقسىبەكوۆ رەسمي ساپارمەن انكاراعا كەلدى. ول انكارادا تۇركيانىڭ ۇلتتىق قورعانىس ءمينيسترى يسمەت يىلمازبەن كەزدەستى. كەزدەسۋ بارىسىندا تاراپتار ەكىجاقتى اسكەري جانە اسكەري-تەحنيكالىق, سونداي-اق اسكەري ءبىلىم سالاسىنداعى ىنتىماقتاستىقتى دامىتۋدىڭ باسىمدىقتارىن تالقىلادى.
قازاقستان رەسپۋبليكاسىنىڭ قورعانىس ءمينيسترى ادىلبەك جاقسىبەكوۆ رەسمي ساپارمەن انكاراعا كەلدى. ول انكارادا تۇركيانىڭ ۇلتتىق قورعانىس ءمينيسترى يسمەت يىلمازبەن كەزدەستى. كەزدەسۋ بارىسىندا تاراپتار ەكىجاقتى اسكەري جانە اسكەري-تەحنيكالىق, سونداي-اق اسكەري ءبىلىم سالاسىنداعى ىنتىماقتاستىقتى دامىتۋدىڭ باسىمدىقتارىن تالقىلادى.
– قازاقستان قورعانىس مينيسترلىگى تۇركيا قورعانىس ۆەدومستۆوسىمەن جانە قارۋلى كۇشتەرىمەن اراداعى ىنتىماقتاستىقتى قارقىندى تۇردە دامىتۋعا بارىنشا ماڭىز بەرەدى. تۇركيا – قازاقستاننىڭ قورعانىس سالاسىنداعى ىنتىماقتاستىق شەڭبەرىندەگى ماڭىزدى ارىپتەستەرىنىڭ ءبىرى. ەكى ەل اراسىنداعى اسكەري سالاداعى ءوزارا ءىس-قيمىل بولاشاقتا دا سەنىمدى ارىپتەستىك پەن ءوزارا تيىمدىلىك پرينتسيپىندە دامي بەرەتىنىنە سەنىم بىلدىرەمىن, – دەدى ادىلبەك جاقسىبەكوۆ.
تۇركيا قارۋلى كۇشتەرى باس شتابىنىڭ باستىعى ارميا گەنەرالى نەدجەت وزەلمەن كەزدەسۋ كەزىندە قازاقستان قورعانىس ۆەدومستۆوسىنىڭ باسشىسى تۇركيا قارۋلى كۇشتەرىنىڭ سولتۇستىك اتلانتيكا وداعى ەلدەرى ءىشىندەگى ءتيىمدى ءارى جاۋىنگەرلىك قابىلەتى جوعارى اسكەر ەكەنىن اتاپ ءوتتى. قازاقستان قورعانىس مينيسترلىگى ءتۇركيا تاجىريبەسىن ۇيرەنۋ مەن قولدانۋ ماقساتىندا ىنتىماقتاسۋعا مۇددەلى.
– قازاقستان پرەزيدەنتى – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆ قازاقستان مەن تۇركيا اراسىنداعى ىنتىماقتاستىققا ايرىقشا ماڭىز بەرەدى. سونىڭ ارقاسىندا بۇگىندە ءبىزدىڭ ارميا جەمىستى ءوزارا ءىس-قيمىل جاساپ وتىر. تۇركيا قارۋلى كۇشتەرى مەن باس شتابى قازاقستان قارۋلى كۇشتەرىنىڭ باستاپقى قالىپتاسۋى مەن دامۋى كەزەڭىندە العاشقىلاردىڭ ءبىرى بولىپ جان-جاقتى قولداۋ كورسەتتى. بۇگىندە قازاقستان اسكەرى اسكەري قاۋىپسىزدىكتىڭ زاماناۋي قاتەرلەرىنە قارسى تۇرارلىق الەۋەتكە يە. قازاقستان قورعانىس مينيسترلىگىنىڭ نەگىزگى باسىمدىقتارىنىڭ ىشىندە اسكەري ءبىلىم بەرۋ جۇيەسىن جەتىلدىرۋ, ارميانى كاسىبيلەندىرۋ جانە تەحنيكالىق جاڭعىرتۋ ماسەلەلەرى بار, وسىعان بايلانىستى سىزدەردىڭ تاجىريبەلەرىڭىزدى ۇيرەنۋگە جانە قولدانۋعا مۇددەلىمىز, – دەپ اتاپ ءوتتى ادىلبەك جاقسىبەكوۆ.
ساپارى شەڭبەرىندە قازاقستاننىڭ قورعانىس ءمينيسترى تۇركيا قورعانىس ونەركاسىبى كاسىپورىندارىنىڭ ىشىندەگى جەتەكشى كومپانيالاردىڭ ءبىرى, اسكەري-ەلەكتروندى ونەركاسىپتىڭ كوشباسشىسى «اسەلسان», سونداي-اق ۇشۋ قۇرالدارىنىڭ جاڭا جۇيەسىن جاڭعىرتۋدىڭ, مودەلدەۋدىڭ جانە ينتەگراتسيالاۋدىڭ نەگىزگى ورىنداۋشىسى – «تاي» كومپانيالارىندا بولادى.
«ەگەمەن-اقپارات».