التىنسارين اۋدانىنا قاراستى ءىلياس وماروۆ اۋىلىنىڭ 17 جاستاعى تۇرعىنى رۋسلان جۇبانىشەۆ ءساۋىردىڭ 27-سىنەن 28-ىنە قاراعان ءتۇنى بىرنەشە اۋىلداسىمەن بىرگە بالىق اۋلاعا شىعىپ كەتىپ, قايتىپ ورالماعان. سودان بەرى ونى ەشكىم كورمەگەن. جوعالعان ازاماتتىڭ تۋىستارى پوليتسياعا 29 ساۋىردە حابارلاسىپتى.
- رۋسلان جوعالعان كۇنى بولعان وقيعالار انىقتالدى. سول كۇنى كولگە بارعانداردىڭ ءبارى كارانتين ءتارتىبىن بۇزعانى ءۇشىن جاۋاپكەرشىلىككە تارتىلدى. قازىر ولاردىڭ ادام جوعالۋىنا قانشالىقتى قاتىسى بار ەكەنى تەكسەرىلىپ جاتىر. بالىققا شىققانداردىڭ اراسىندا ەشقانداي جانجال بولماعان. بىراق سول كۇنى ءبارى ىشىمدىك ىشكەن. رۋسلاننىڭ قايدا كەتكەنى تۋرالى قازىرشە ەشقانداي اقپارات جوق. ىزدەۋ شارالارى جالعاسۋدا, - دەدى وبلىستىق پد تەرگەۋ باسقارماسىنىڭ باسشىسى نۇرلان ارىستانوۆ.
باسقارما باسشىسىنىڭ ايتۋىنشا, اۋىل اينالاسىنداعى جانە كورشىلەس ەلدى مەكەندەردىڭ ماڭىنداعى وزەن-كولدەر مەن ساي-سالانىڭ بارلىعى, سونداي-اق, ءىلياس وماروۆ اۋىلىنداعى ءۇي اۋلالارى, قۇدىقتار مەن بوس عيماراتتاردىڭ ءىشى تەگىس تەكسەرىلگەن. ىزدەۋگە توتەنشە جاعداي دەپارتامەنتىنىڭ سۇڭگۋىر ماماندارى قوسىلىپ, جاقىن ماڭداعى كولدەردى تۇگەلدەي ءسۇزىپ شىققان. بىراق ناتيجە جوق. قازىر پوليتسيانىڭ جەكە قۇرامىنا جوعالعان ازاماتتىڭ فوتوسۋرەتى تاراتىلىپ, ىزدەۋ توبى جاساقتالدى. ىزدەۋ شارالارىنا 25 پوليتسيا قىزمەتكەرى, ءىز كەسۋشى يت ەرتكەن 5 كينولوگ, 30-دان استام جەرگىلىكتى تۇرعىن جانە 100-دەن استام ەرىكتى قاتىسۋدا.
قوستاناي وبلىسى