شىعىس قازاقستان وبلىسىنداعى نيكولاەۆ كەن بايىتۋ فابريكاسى الداعى ۋاقىتتا ءوز ونىمدەرى كولەمىن 30 پايىزعا دەيىن ارتتىرۋدى كوزدەپ وتىر. بۇل, كەن بايىتۋ ورنىندا جۇرگىزىلىپ جاتقان جاڭعىرتۋ جۇمىستارىنىڭ ناتيجەسىندە جۇزەگە اسپاق.
شىعىس قازاقستان وبلىسىنداعى نيكولاەۆ كەن بايىتۋ فابريكاسى الداعى ۋاقىتتا ءوز ونىمدەرى كولەمىن 30 پايىزعا دەيىن ارتتىرۋدى كوزدەپ وتىر. بۇل, كەن بايىتۋ ورنىندا جۇرگىزىلىپ جاتقان جاڭعىرتۋ جۇمىستارىنىڭ ناتيجەسىندە جۇزەگە اسپاق.
اتاپ ايتار بولساق, فابريكاعا جاڭا ۇگىتكىش قۇرالدار ورناتىلىپ, فلوتاتسيا پاركى مەن ولشەمدىك اۋماقتاردىڭ بارلىعى ءبۇتىندەي جاڭارتىلاتىن بولادى. ءدال قازىر جاڭعىرتۋ جۇمىستارىن ءجۇرگىزۋمەن 500-گە تارتا قۇرىلىسشى جانە قۇراستىرۋشى ماماندار اينالىسۋدا.
– بۇگىنگى كۇنى جاڭعىرتۋ جۇمىستارى قاتتى قارقىنمەن ءجۇرىپ جاتىر دەسەم ارتىق ايتپايمىن. باس كورپۋستىڭ وزىندە جۇمىستىڭ 80 پايىزى اياقتالدى. ءبىز, ارينە, بولاشاقتا كوزدەگەن ءمۇددەگە جەتسەك دەيمىز عوي. ەگەر ءبىزدىڭ كەن بايىتۋىمىز بۇرىن جىلىنا 1 ملن. 800 مىڭ توننا بولسا, ەندى, ءدال وسى جاڭعىرتۋ كومەگىمەن 2 ملن. 200 مىڭ توننا بولادى. ياعني مىس, مىرىش, قورعاسىن كونتسەنتراتتارىنىڭ كولەمى ۇلعايادى, – دەيدى نيكولاەۆ كەن بايىتۋ فابريكاسىنىڭ باس ينجەنەرى ولجاس تولەۋتاەۆ.
ايتا كەتۋ كەرەك, قۇرىلعىلار تەك قانا جاڭارتىلىپ قويىلماي, ولار مەيلىنشە اۆتوماتتى جۇيەگە ەنگىزىلمەك. بۇل – فابريكاداعى جۇمىسشىلاردىڭ اۋىر ەڭبەگىن ءسال دە بولسا جەڭىلدەتىپ, ولاردىڭ كەلەر كۇنگە دەگەن سەنىمىن ارتتىرادى. ويتكەنى, ءوندىرىستىڭ ءبىر ورىندا تۇرىپ قالۋى البەتتە جۇمىسشىلاردىڭ كوڭىلىنە قورقىنىش ۇيالاتادى. ال جاڭا قۇرال الىپ, زامان اعىمىنا لايىقتالىپ جاتقان جۇمىس ورنىنىڭ قاشان دا بولاشاعى بار دەگەن ءسوز.
– جاڭا قۇرالداردىڭ كەلۋى ءوندىرىستى قارقىنداتادى. جۇمىس جاقسى جۇرسە ءبىزدىڭ ەڭبەگىمىز جەمىستى بولادى. ونىڭ ۇستىنە ءبىز بىلگەنىمىزدى ارتتىرىپ, وسى جاڭا قۇرالداردى يگەرۋدەمىز» – دەيدى فابريكاداعى جاس جۇمىسشىلاردىڭ ءبىرى ەرمەك قاماتاەۆ.
ازىرگە فابريكانىڭ ءبىرىنشى سەكتسياسىندا جۇمىس تولىق اياقتالىپ, ونداعى جۇمىسشىلار جاڭعىرتىلعان جابدىقتاردى باسقارۋدا. ەندى, ەكىنشى سەكتسيا جاڭعىرتۋدان وتكەن سوڭ ءوندىرىس ورنى تولىققاندى قىزمەتكە كىرىسىپ, جۇمىسىن ەسەلەيتىن بولادى. ەسكەرەتىن ءبىر جايت, زاماناۋي قۇرالدار ستاندارتقا ساي بولۋىمەن قاتار, قاۋىپسىزدىك تەحنيكاسىن ساقتاۋىمەن دە ەرەكشەلەنەدى.
– ءبىز بۇل جاڭعىرتۋدى كوپتەن بەرى كۇتىپ ءجۇر ەدىك. جۇمىستىڭ ءجۇرگەنى, قۇرالدىڭ جاڭارعانى كىمگە جامان بولسىن؟ ەرتەڭ ساپالى مەتالل الىپ, ەل ەكونوميكاسىنا ۇلەس قوسساق, ءبىز سونى ماقتان تۇتامىز, – دەيدى وسى جەردەگى ايەلدەر قاۋىمىنىڭ وكىلى دەشەۆيك گۋلياەۆا. وسىلايشا, فابريكا ۇجىمى الداعى ۋاقىتتا جوسپارلىق كورسەتكىشتى ارتتىرماق.
ايتا كەتۋ كەرەك, نيكولاەۆ كەن بايىتۋ فابريكاسى الەمدەگى ەڭ ءىرى مىس وندىرۋشىلەردىڭ ءبىرى – «قازاقمىس» كورپوراتسياسىنىڭ قۇرامىنا ەنەدى. شىعىس قازاقستان وبلىسىنىڭ شەمونايحا اۋدانىندا ورنالاسقان ءوندىرىس ورنىنىڭ ىرگەتاسى وسىدان 33 جىل بۇرىن قالانعان. قازىردە مىڭداعان ادام ەڭبەك ەتىپ جاتقان فابريكا وبلىس ەكونوميكاسىنىڭ ورلەۋىنە ناقتى ۇلەس قوسىپ قانا قويماي, ۇنەمى جاڭاشىلدىققا قاراي بەت بۇرۋدا. بۇگىنگى جاڭعىرتۋ جۇمىستارى فابريكا قول جەتكىزگەن جەتىستىكتەردىڭ تەك ءبىرى عانا.
ءوندىرىس ورنى ەلباسى تاپسىرماسىنا سايكەس, يندۋستريالىق-يننوۆاتسيالىق ساياساتتى جۇزەگە اسىرۋ جۇمىستارىن مۇنىمەن توقتاتپاق ەمەس. ويتكەنى, باسەكەگە قابىلەتتى, ءتورت اياعىنان تىك تۇرعان ءوندىرىستىڭ الداعى ۋاقىتتا كوزدەگەن ماقساتتارى بيىك. فابريكانىڭ باس ينجەنەرى ولجاس تولەۋتاەۆتىڭ ايتۋىنشا, الداعى ۋاقىتتا بۇل جەردە كەننەن التىن ايىراتىن سەكتسيا اشۋ جوسپارلانۋدا. ءدال قازىر جاڭعىرتۋ جۇمىستارىمەن قاتار, وسى جاڭا سەكتسيانى ىسكە قوسۋعا دايىندىق قادامدارى جاسالۋدا. ەندەشە, مىس, مىرىش, قورعاسىن كونتسەنتراتتارىن الاتىن فابريكادا بولاشاقتا ءالى دە جاڭا جۇمىس ورىندارى اشىلىپ, جاڭعىرتۋدىڭ سان ءتۇرى جۇرگىزىلەدى دەگەن ءسوز.
ەلمەيىر احمەت.
شىعىس قازاقستان وبلىسى.