قىركۇيەكتىڭ 21-ءى كۇنى بەيبىتشىلىك جانە كەلىسىم سارايىندا قىرعىزستاننىڭ قازاقستانداعى مادەنيەت كۇندەرى سالتاناتتى جاعدايدا اشىلدى. ءبىر ايعا جالعاساتىن مادەني شارا قىرعىزستان مەن قازاقستاننىڭ حالىق جازۋشىسى شىڭعىس ايتماتوۆتىڭ 85 جىلدىق مەرەيتويىنا باعىشتالۋىمەن ەرەكشەلەندى.
قىركۇيەكتىڭ 21-ءى كۇنى بەيبىتشىلىك جانە كەلىسىم سارايىندا قىرعىزستاننىڭ قازاقستانداعى مادەنيەت كۇندەرى سالتاناتتى جاعدايدا اشىلدى. ءبىر ايعا جالعاساتىن مادەني شارا قىرعىزستان مەن قازاقستاننىڭ حالىق جازۋشىسى شىڭعىس ايتماتوۆتىڭ 85 جىلدىق مەرەيتويىنا باعىشتالۋىمەن ەرەكشەلەندى.
«باسىما كيدىم اق قالپاق,
ويۋلاپ شەتىن سىرعىزعان.
مەنىڭ دە بەتىم جاپ-جالپاق,
ايىرمام قايسى قىرعىزدان؟».
مىسال ءۇشىن ءبىز قىرعىز الاتاۋىنىڭ ۇستىنەن كوتەرىلگەن كۇن ساۋلەسىندەي قازاق-قىرعىز دالاسىنا شۇعىلاسى تەڭ تاراعان شىڭعىس ايتماتوۆتى وزىمىزگە جاقىن تۇتىپ, جازۋشىنىڭ «ءجاميلا», «قۇس جولى», «قوش بول, گۇلسارى» , «اق كەمە», «تەڭىز جاعالاي جۇگىرگەن تارعىل توبەت», «جانپيدا» , «شىڭعىسحاننىڭ اق بۇلتى», «عاسىردان دا ۇزاق كۇن», «بوراندى بەكەت», «كوكتوبەدەگى كەزدەسۋ» سىندى شىعارمالارىن قالاي ءسۇيىپ وقىساق, تاماشالاساق, اقىن ءابدىلدا تاجىباەۆتىڭ قىرعىز حالقىنا ارناعان وسى ءبىر جىر شۋماعىن ولاردىڭ دا ءدال سولاي قۇرمەتتەپ, جاتتاپ, جاريالاپ جاتۋى بەكەر بولماسا كەرەك. مۇحتار اۋەزوۆتى شىڭعىستىڭ ۇستازى دەپ ايرىقشا اسپەتتەپ, حح عاسىردىڭ الەمدىك ادەبيەتىندەگى تۇركىلىك ادەبي رەنەسسانستى تانىتقان تۇتاس ءبىر ءداۋىردى جاساۋشى قوس تۇلعا رەتىندە اسقاقتاتۋى ءوز الدىنا ءبىر مەرەي. شىڭعىس شىعارمالارىنىڭ قازاقپەن ەتەنە تۋىس بولۋىمەن قاتار, الەمنىڭ جۇزدەن استام تىلدەرىنە – اعىلشىن, فرانتسۋز, نەمىس, اراب, پارسى, تۇرىك, جاپون تىلدەرىنە ءتارجىمالانۋى قىرعىز مادەنيەتى مەن دۇنيەتانىمىنىڭ الەمدىك كوكجيەككە ۇشتاسقان ءساتىن ايشىقتايتىن اقيقاتتىڭ ءبىرى دەپ تانۋ تاعى پارىز.
ال ەندى مىنا «تاۋلار قۇلاعاندا» اتتى كورمەدەگى قازىرگى زامانعى قىرعىز سۋرەتشىلەرىنىڭ ەڭبەكتەرىنەن شىڭعىس تىلسىمى مەن تىنىسىنىڭ جاڭعىرىپ, قايتا سامعاۋ ساتىنە كۋا بولعانداي اسەر تۇيەسىز. كەلۋشىلەر نازارىنا ىلىككەن كەسكىندەمە, گرافيكا, شاعىن پلاستيكا جانە دەكوراتيۆتى-قولدانبالى ونەر تۋىندىلارىنىڭ ۇلتتىق ايشىعى مەن اجارى ايرىقشا كوز تارتادى. مۇنداعى جالپى قىلقالام تۋىندىلارى مەن باسقا دا حالىقتىق ونەر قازىناسىنىڭ جالپى سانى 100-دەن اسىپ جىعىلادى. ءبىر ايتا كەتەتىن نارسە, قىرعىزستاننىڭ قازاقستانداعى مادەنيەت كۇندەرىنىڭ باعدارلاماسى سان سالالى, الۋان ارنالى. مىسالى, استانادا قىرعىزستان مەن قازاقستاننىڭ زيالى قاۋىم وكىلدەرى باس قوسسا, الماتى, تاراز جانە شىمكەنت قالالارىندا ءبىر اي بويىنا قىرعىزستان تەاترلارى مەن مەملەكەتتىك فيلارمونيانىڭ ارتىستەرى ونەر كورسەتەدى.
قىرعىزستاننىڭ قازاقستانداعى مادەنيەت كۇندەرىنىڭ سالتاناتتى اشىلۋ ءراسىمىندە جۇرت مەملەكەتتىك بي انسامبلىنىڭ, مەملەكەتتىك فيلارمونيانىڭ حالىق اسپاپتار وركەسترى مەن حالىق ارتىستەرىنىڭ ونەرلەرىن تاپجىلماي تاماشالادى. مادەني شارانى ەكى ەلدىڭ مادەنيەت مينيسترلەرى ءسوز سويلەپ اشتى. قىرعىزستاننىڭ مادەنيەت ءمينيسترى سۇلتان راەۆ: «قازاق پەن قىرعىز ەجەلدەن ەكى تاۋدىڭ شوقىسىنداي, ءبىر قۇستىڭ قاناتىنداي, ءبىر اتا مەن ءبىر انانىڭ ۇلدارىنداي, قيىن كەزدە ءبىر-بىرىنە تىرەك بولىپ, كەرەك كەزدە جۇرەك بولىپ ءومىر ءسۇرىپ كەلە جاتقان حالىقتار. مىڭداعان شاقىرىمدى ارتقا تاستاپ تۋعاندارىمىزبەن تابىسۋعا اسىعىپ, ساعىنىپ جەتتىك سىزدەرگە... كوكىرەك تولى سەزىممەن, جۇرەك تولى قۋانىشپەن كەلدىك. قىرعىز-قازاق – ەگىز ەل, ءبىر-بىرىمەن تىعىز ەل. ال دۇنيەدە قازاققا قىرعىزدان وتكەن, ال قىرعىزعا قازاقتان وتكەن جاقىن ۇلت تا, ەل دە جوق دەپ ەسەپتەيمىن», دەپ الاتاۋدىڭ ارعى بەتىن جايلاعان قالىڭ قىرعىزدىڭ ىستىق ءسالەمىن جەتكىزدى. ءوز كەزەگىندە قازاقستاننىڭ مادەنيەت جانە اقپارات ءمينيسترى مۇحتار قۇل-مۇحاممەد: «ءبىزدىڭ باۋىرلاس, تۋىسقان ەل – قىرعىزستان رەسپۋبليكاسىنىڭ قازاقستانداعى, ونىڭ استاناسى – استانا قالاسىنداعى مادەنيەت كۇندەرىنىڭ اشىلۋىمەن بارشاڭىزدى شىن جۇرەكتەن قۇتتىقتايمىن, – دەي كەلىپ, – قىرعىز حالقىنىڭ ارعى-بەرگى تاريحىندا ول ەلگە قازاقتاي تاتۋ, قازاقتاي جاقىن ەل بولماعان شىعار. سوندىقتان ءبىزدىڭ ەكى حالىقتىڭ ەجەلدەن تاريحى مەن تامىرى ءبىر, ءدىنى ورتاق, ءتىلى دە ۇقساس, مادەنيەتى دە ەگىز دەپ ايتۋىمىزعا بولادى. مىنە, وسى قىرعىز حالقىنىڭ, قىرعىز رەسپۋبليكاسىنىڭ باس