6 مامىردا برازيليالىق «TV-Supren» تەلەارناسىندا قازاقستاننىڭ ەلشىسى قايرات سارجانوۆ قازاقتىڭ اقىنى, ويشىلى جانە ۇلتتىق ادەبيەتتىڭ نەگىزىن قالاۋشىسى اباي قۇنانباي ۇلىنىڭ 175 جىلدىعىن مەرەكەلەۋ اياسىندا ونىڭ العاشقى رەت پورتۋگال تىلىنە اۋدارىلعان «قارا سوزدەرى» كىتابىنىڭ تۇساۋكەسەرىن وتكىزدى. بۇل تۋرالى ءسىم ءباسپاسوز قىزمەتى حابارلادى.
ءىس-شارا بارىسىندا قايرات سارجانوۆ قازاقستاننىڭ تۇڭعىش پرەزيدەنتى - ەلباسى نۇرسۇلتان نازارباەۆتىڭ ۇلتتىق بىرەگەيلىكتى, وزىندىك ۇلتتىق كودتى ساقتاۋ, مادەني جەتىستىكتەردى ىلگەرىلەتۋ, اسىرەسە ولاردى شەتەلدە ناسيحاتتاۋ تۋرالى باستامالارىن ىسكە اسىرۋدىڭ ماڭىزدىلىعىن اتاپ ءوتىپ, اباي قۇنانباي ۇلىنىڭ قازاق مادەنيەتىن دامىتۋداعى ءرولىن, بويىندا تاربيە مەن ۇلتتىق دۇنيەتانىم ماسەلەلەرىن كوتەرەتىن, ادامنىڭ كەمشىلىكتەرىن سىنايتىن, ادامداردى ەڭبەك, اعارتۋشىلىق جانە عىلىمدا جوعارى جەتىستىكتەرگە جەتۋگە, زاڭداردى ساقتاۋعا شاقىراتىن, حالىق بىرلىگىنىڭ ماڭىزدىلىعىن قوزعايتىن «قارا سوزدەردىڭ» ماڭىزىنا توقتالدى. اقىننىڭ تۇلعالىق قۇندىلىعى مەن ونىڭ قازىرگى قوعام ءۇشىن ماڭىزدىلىعىنا ارنالعان مەملەكەت باسشىسى قاسىم-جومارت توقاەۆتىڭ «اباي جانە ءححى عاسىرداعى قازاقستان» اتتى ماقالاسىنا دا ەرەكشە نازار اۋدارىلدى. كىتاپتىڭ پورتۋگال تىلىندەگى باسىلىمىنىڭ تۇساۋكەسەرى اباي قۇنانباي ۇلىنىڭ مەرەيتويىن مەرەكەلەۋدىڭ باستالۋىنا وراي قاڭتار ايىندا قازاقستان رەسپۋبليكاسى باسشىلىعىنىڭ قاتىسۋىمەن نۇر-سۇلتان قالاسىندا وتكەن سالتاناتتى شارا تۋرالى بەينەباياندارمەن, قازاق اعارتۋشىسىنىڭ ءومىرى مەن شىعارماشىلىعى تۋرالى بەينەروليكتەر مەن تاريحي فوتوسۋرەتتەرمەن, قازىرگى زامانعى قازاقستاننىڭ پەيزاجدارى مەن كورىنىستەرىمەن ۇيلەسىمدى وتكىزىلدى.
ۇلتتىق كونگرەسستىڭ ەكس-سەناتورى, برازيليانىڭ بۇرىنعى ءبىلىم ءمينيسترى, پروفەسسور كريستوۆام بۋاركە اباي شىعارماسىنا جاساعان شولۋى بارىسىندا «سانسىز افوريزمدەرگە تولى, ادام بالاسىنىڭ ەرتە جاستان قالىپتاسۋى ءتيىس پاتريوتيزم مەن ەرلىك سەكىلدى قاسيەتتەرىن, ماحاببات پەن وتان الدىنداعى پارىزىن, ۇلكەندەرگە قۇرمەتتى ماداقتايتىن» اقىن ەڭبەگىنە جوعارى باعا بەردى. ول «كىتاپ باسىنان اياعىنا دەيىن وقىرماندى ءومىردىڭ ءمانى تۋرالى دانا سوزدەردى جىبەرىپ المايتىنداي ەتىپ, كەرنەپ وتىرادى" دەپ قورىتىندىلادى. اۆتور رەتىندە ۇلى اقىنداردىڭ ءرولى مەن شەبەرلىگى ارقايسىمىزدىڭ ىشىمىزدە تەرەڭ كومىلگەن ويلاردى وياتا الاتىنىندا ەكەنىن ەسكەرسەك, اباي – الەمنىڭ ەڭ ۇلى اقىندارىنىڭ ءبىرى.
«قارا سوزدەر» جيناعى پورتۋگال تىلىنە 2019 جىلى قازاقستاننىڭ تۇڭعىش پرەزيدەنتى-ەلباسى نۇرسۇلتان نازارباەۆتىڭ «تاۋەلسىزدىك ءداۋىرى» كىتابىنىڭ اۋدارماسىمەن جۇمىس جاساعان, فيلولوگيا عىلىمدارىنىڭ دوكتورى, سان-پاۋلۋ ۋنيۆەرسيتەتىنىڭ پروفەسسورى ەدەلسيو امەريكو تاراپىنان اۋدارىلىپ, سانپاۋلۋلىق «نوۆا الەكساندريا» باسپاسىندا باسىلىپ شىعارىلدى. برازيليا جۇرتشىلىعىنا قازاق اعارتۋشىسىن جاقىنىراق تانۋعا مۇمكىندىك بەرۋ ماقساتىندا اباي قۇنانباي ۇلىنىڭ تۋىندىسى برازيليالىق وقۋ ورىندارى مەن كىتاپحانالارىنا تاراتىلادى. اۋدارمانىڭ ەلەكتروندىق نۇسقاسىمەن قازاقستان رەسپۋبليكاسىنىڭ برازيلياداعى ەلشىلىگىنىڭ سايتىندا تانىسىپ, ءماتىنىن جۇكتەپ الۋعا بولادى.
ۇلتتىق كونگرەسستىڭ ەكس-سەناتورى, «پلانەتارلىق وداق» ۇكىمەتتىك ەمەس ۇيىمىنىڭ جەتەكشىسى, 2018 جىلعى قازاندا نۇر-سۇلتان قالاسىندا وتكەن الەمدىك جانە ءداستۇرلى دىندەر باسشىلارىنىڭ VI سەزىنە قاتىسقان ۋليسيس ريدەل نەگىزىن قالاعان «TV-Supren» تەلەارناسى گۋمانيزم, ىنتىماقتاستىق, الەۋمەتتىك ادىلەتتىلىك قاعيدالارىن ناسيحاتتايتىن, عىلىم مەن يننوۆاتسيا, مادەنيەت پەن ونەر, قورشاعان ورتانى قورعاۋ جانە ت.ب. سالالارداعى جەتىستىكتەر تۋرالى ناسيحاتتايتىن كونتەنتتى وندىرەدى.