توتەنشە جاعدايعا بايلانىستى ەلىمىزدە بارلىق سالتاناتتى شارالارعا شەكتەۋ قويىلعانى بەلگىلى. وسىدان دا ىندەتكە قارسى كۇرەستە الدىڭعى شەپتە جۇرگەن پوليتسەيلەردى ماراپاتتاۋ بۇل جولى باسقاشا فورماتتا ءوتتى.
ەڭبەگى ەلەنگەن قىزمەتكەرلەردى ماراپاتتاۋ ءۇشىن توسقاۋىل بەكەتىنە وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى سۇلتان بەكتورە باردى. قازاقستان رەسپۋبليكاسى تۇڭعىش پرەزيدەنتى ساياباعىندا ورنالاسقان بەكەتتە مەرەكە كۇندەرى قىزمەت وتكەرىپ جۇرگەن ءتارتىپ ساقشىلارىنا ماراپات پەن شەن تابىستادى.
بەكتورە جەڭىسباي ۇلى قىزمەتكەرلەردى مەرەكەلەرمەن قۇتتىقتاپ, انتىنا ادال, سەرتىنە بەرىك قىزمەتكەرلەردىڭ وتباستارىنا اماندىق, جۇمىستارىنا تابىس تىلەدى. ارداگەرلەر كەڭەسىنىڭ توراعاسى, دەپارتامەنت باستىعىنىڭ كەڭەسشىسى سەرىكبول تۇڭعىشباي دا قوعام تىنىشتىعىن كۇزەتكەندەرگە جىلى لەبىزىن ارنادى.
بيىل ىشكى ىستەر ءمينيسترىنىڭ بۇيرىعىمەن 9 پوليتسەي ماراپاتتالىپ, 2 قىزمەتكەر مەرزىمىنەن بۇرىن مايور شەنىن الدى. سونىمەن قاتار, دەپارتامەنت باستىعىنىڭ بۇيرىعىمەن 25 قىزمەتكەر مەن 18 ارداگەر ماراپاتتالدى.