بۇعان دەيىن حابارلاعانىمىزداي, حالىقتى جۇمىسپەن قامتۋدى قامتاماسىز ەتۋ ماسەلەلەرى جونىندە وتكەن ونلاين-بريفينگتە الماتى قالالىق ءال-اۋقات باسقارما باسشىسىنىڭ ورىنباسارى دانيار الكەباي ۇلى جۇمىسپەن قامتۋ جول كارتاسى اياسىندا جۇرگىزىلىپ جاتقان جۇمىستار جونىندەگى بىرقاتار ماسەلەلەرگە توقتالدى.
«پرەزيدەنت تاپسىرماسىن ورىنداۋ ماقساتىندا ۇكىمەت قاۋلىسىمەن «جۇمىسپەن قامتۋ جول كارتاسى» قابىلدانعانى بەلگىلى. بۇگىندە الماتى قالاسىندا جۇمىسپەن قامتۋ جول كارتاسى اياسىندا 214 ينفراقۇرىلىمدىق جوبانى ىسكە اسىرۋ جوسپارلانىپ وتىر. قازىرگى تاڭدا كونكۋرستىڭ پروتسەدۋرالار ءجۇرىپ جاتىر. ونىڭ ىشىندە كەلەسى جۇمىس تۇرلەرى مەن نىساندار بويىنشا, ياعني, الەۋمەتتىك-مادەني نىسانداردى كۇردەلى جانە اعىمداعى جوندەۋ, قايتا جاڭارتۋ; تۇرعىن-ءۇي كوممۋنالدىق-شارۋاشىلىق نىساندارىن كۇردەلى, ورتاشا جانە اعىمداعى جوندەۋ, قايتا جاڭارتۋ; ينجەنەرلىك كولىك ينفراقۇرىلىمىن كۇردەلى, ورتاشا جانە اعىمداعى جوندەۋ جانە قايتا جاڭارتۋ, سونداي-اق, ەلدى مەكەندەردى اباتتاندىرۋ سياقتى جوبالارعا جولداناتىن بولادى» – دەدى د.الكەباي ۇلى.
سپيكەردىڭ ايتۋىنشا, ينفراقۇرىلىمدىق جوبالاردى ىسكە اسىرۋ بارىسىندا جۇمىسسىز جاستاردى قامتۋعا باسىمدىق بەرىلمەك, ياعني جۇمىسپەن قامتۋ ورتالىقتارى ارقىلى جالدامالى جۇمىسشىلاردىڭ كەمىندە 50%-ى جاستار بولاتىن 26 مىڭ جاڭا جۇمىس ورنىن قۇرۋ جوسپارلانعان. جۇمىسپەن قامتۋدىڭ جول كارتاسى اياقتالعاننان كەيىن جاڭا نىساندار سالۋ ارقىلى 2045 تۇراقتى جۇمىس ورنى قۇرىلادى.
جۇمىسپەن قامتۋدىڭ جول كارتاسىن جۇزەگە اسىرۋ ناتيجەسىندە 47 جاڭا نىسان, ونىڭ ىشىندە 31 الەۋمەتتىك نىسان سالىنادى.
سپيكەر سونداي-اق, ءوتىنىش بەرۋ ءۇشىن ء(وتىنىش بەرۋشىلەر مەن جۇمىس بەرۋشىلەرگە) جۇمىسپەن قامتۋ ورتالىعىنىڭ سايتى (cz-almaty.kz) جۇمىس ىستەيتىنىن, وندا قابىلدانعان شارالار تۋرالى تولىق اقپارات بار ەكەنىن, ءتىپتى, ءوتىنىش بەرۋگە ارنالعان سىلتەمە دە كورسەتىلگەنىن ايتىپ ءوتتى.
جول كارتاسى اياسىندا جۇمىسقا ورنالاسۋعا جاردەمدەسۋ ءۇشىن 6408 ادامنان تۇيىندەمە قابىلداندى, ونىڭ ىشىندە 708 ادام – قۇرىلىس الاڭدارىندا جۇمىس ىستەۋگە ءوتىنىش بەرگەن.
بارلىعى 12 جوبا تىركەلدى, 468 جۇمىس ورنى اشىلدى, تىركەلگەن جۇمىسسىزداردىڭ ىشىندە 38 ادام جۇمىسقا ورنالاستىرىلدى.