بۇل تۋرالى بۇگىن الماتى قالاسى اكىمدىگىنىڭ ءباسپاسوز ورتالىعىندا وتكەن ونلاين-بريفينگتە الماتى قالاسى حالىقتى جۇمىسپەن قامتۋ ورتالىعىنىڭ ديرەكتورى ديليارا يمانقۇلوۆا مالىمدەدى.
قالالىق باسقارۋ قۇرىلىمدارى كارانتين شارالاردى اياقتالعاننان كەيىن جۇمىسسىز قالعان ادامداردى قولداۋدىڭ بىرقاتار شارالارىن ازىرلەپ وتىر. ماسەلەن, حالىقتى جۇمىسپەن قامتۋ ورتالىعى ارقىلى جۇمىسقا ورنالاستىرۋدان بولەك, «ەڭبەك» باعدارلاماسى اياسىندا ءتۇرلى كاسىبي كۋرستارعا جىبەرۋدەن باسقا, سونداي-اق, باستاپقى بيزنەستى ىسكە اسىرۋدى جوسپارلاپ وتىرعان ادامدارعا اقىسىز جانە قايتارىمسىز نەگىزدە جاڭا بيزنەس-يدەيالاردى ىسكە اسىرۋ ءۇشىن مەملەكەتتىك گرانتتار بەرىلمەك.
«وتكەن جىلى مۇنداي گرانتتاردى بىزدە 2867 ادام الدى. بيىلعى جىلى 1705 ادامعا 200 اەك كولەمىندە قاراجات ءبولىندى (555,6 مىڭ تگ 1 اەك ەسەبىنەن – 2778 تگ). سونىڭ ىشىندە 706 الماتىلىققا گرانتتار وسى ايدا بەرىلەدى», – دەيدى ديليارا يمانقۇلوۆا.
سپيكەردىڭ ايتۋىنشا, «ەڭبەك» باعدارلاماسىنا قاتىسۋشىلار مەملەكەتتىك گرانتتاردى الۋعا ۇمىتكەرلەر بولىپ تابىلادى. بىراق, بۇل تىزىمگە تەحنيكالىق جانە كاسىپتىك, ورتا بىلىمنەن كەيىنگى ءبىلىم بەرۋ, جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمدارىندا نەمەسە «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتۋ كۋرستارىنان وتكەندەر عانا ەنگىزىلەدى. سونىمەن قاتار, «ەڭبەك» باعدارلاماسىنىڭ ءبىرىنشى باعىتى شەڭبەرىندە وقۋدى اياقتاعان جانە بۇرىن باسقا مەملەكەتتىك باعدارلامالار شەڭبەرىندە گرانتتار الماعان تۇلعالار, سونداي-اق قونىس اۋدارۋشىلار مەن ورالماندار, اتاۋلى الەۋمەتتىك كومەك الۋشىلار قاتارىنان از قامتىلعان جانە/نەمەسە كوپ بالالى وتباسى مۇشەلەرى قاتىسا الادى. جاڭا بيزنەس-يدەيالاردى ىسكە اسىرۋعا مەملەكەتتىك گرانتتار 200 ەسەلەنگەن ايلىق ەسەپتىك كورسەتكىشكە دەيىنگى مولشەردە بەرىلەدى. از قامتىلعان جانە كوپ بالالى وتباسى مۇشەلەرىنىڭ, ەڭبەككە جارامدى مۇگەدەكتەر مەن جاستاردىڭ مەملەكەتتىك گرانتتاردى الۋعا باسىمدىق بەرىلەدى.
«كاسىپكەرلىك باستامالاردى قولداۋ ءۇشىن ءبىزدىڭ باعدارلاماعا قاتىسۋشىلار 8 مىڭ اەك كولەمىندە شاعىن نەسيە الا الادى, – دەپ اتاپ ءوتتى سپيكەر. – بۇل 21 ملن تگ استام قاراجات دەگەن ءسوز. بيىل وسىنداي 140 جوباعا قاراجات ءبولىندى. العاشقى ۇمىتكەرلەر بۇگىنگە دەيىن 14 شاعىن نەسيەنى الىپ ۇلگەردى».