تۇركىستان وبلىسى ماقتاارال اۋدانىنداعى جاعدايعا بايلانىستى قمدب توراعاسى, باس ءمۇفتي ناۋرىزباي قاجى تاعان ۇلىنىڭ باستاماسىمەن اپاتتان زارداپ شەككەن وتباسىلارعا جاردەم بەرۋ جۇمىستارى جەدەل تۇردە ۇيىمداستىرىلدى. بۇل تۋرالى قمدب ءباسپاسوز قىزمەتى حابارلادى.
مەشىتتەر مەن مەكتەپتەرگە ۋاقىتشا ەۆاكۋاتسيالانعان مىڭداعان تۇرعىنعا سايرام اۋدانى مەن ارىس قالاسىنان كيىم-كەشەك, اس-سۋ, كۇندەلىكتى قاجەتتى زاتتار جەتكىزىلدى.
تۇركىستان وبلىسىنىڭ باس يمامى مۇسابەك اقتامبەردىنىڭ ايتۋىنشا, سايرام اۋدانىنان 2 جۇك كولىگىمەن ازىق-ت ۇلىك, كورپە-توسەك, كيىم-كەشەك جەتكىزىلىپ, 20 ەرىكتى ازامات 400 كىسىگە اۋىزاشار بەرگەن. ال ارىس قالاسىنان 1 جۇك كولىگى جانە 5 جەڭىل اۆتوكولىكپەن 1 ميلليون تەڭگەدەي قاراجاتقا اس-سۋ جانە بالالارعا قاجەتتى زاتتار جەتكىزىلدى.
«جۇمىلا كوتەرگەن جۇك جەڭىل» دەمەكشى, سىن ساعاتىندا ءۇيسىز-كۇيسىز قالعان جاندارعا جاردەمدەسۋگە وبلىستىڭ باسقا دا اۋداندارىنىڭ تۇرعىندارى نيەت تانىتىپ, اتسالىسىپ جاتىر. الداعى ۋاقىتتا دا ماقتاارالداعى اعايىنعا كومەك بەرۋ جالعاسادى.