بۇگىننەن باستاپ قازاقستاننىڭ كەيبىر قالالارىنداعى حالىققا قىزمەت كورسەتۋ ورتالىقتارى جۇمىسىن جاڭاشا باستادى.
حقو-لاردىڭ جاڭاشا جۇمىسى جونىندە شاحماتتان قازاقستاننىڭ 17 دۇركىن, الەمنىڭ 3 دۇركىن, ازيانىڭ 7 دۇركىن چەمپيونى, ايەلدەر اراسىنداعى حالىقارالىق سپورت شەبەرى, ايەلدەر اراسىندا WIM حالىقارالىق ماستەرى اسەل ارمانقىزى سەرىكباي ءوز پىكىرىمەن ءبولىستى:
«حقو-دان قىزمەت الۋ ءۇشىن الدىن الا كەزەكتى ونلاين بروندايدى ەكەن. بۇل وتە دۇرىس شەشىم. قىزمەتتى ونلاين الۋ دەگەن – وتە قولايلى, ۇتىمدى ءادىس. ءبىز الەمنىڭ تۇكپىر-تۇكپىرىندە ءجۇرىپ, وزىمىزگە قاجەتتى قىزمەتتەردى ونلاين الىپ ءجۇرمىز. ەش قيىندىق جوق, ىڭعايلى, ۋاقىت تا كەتپەيدى. قازاقستان حالقى دا كارانتين كەزىندە قىزمەتتى ۇيدە ونلاين الىپ ۇيرەنىپ قالدى. سوندىقتان مەملەكەتتىك قىزمەتتىڭ 80 پروتسەنتى ەلەكتروندى تۇردە الۋعا مۇمكىندىك بولعاسىن, ونى پايدالانعان ءجون. egov.kz, تەلەگرام-بوت eGovKzBot2.0 جانە eGovMobile موبيلدىك قوسىمشالارىنىڭ كەز كەلگەنىن پايدالانىپ, حقو-عا بارماساڭىز دا بولادى. حقو-عا بارۋ قاجەتتىلىگى بولا قالعان جاعدايدا, الدىن الا كەزەك برونداۋ ءادىسىن مىندەتتى تۇردە قولدانۋعا كوشكەنىن وتە دۇرىس دەپ سانايمىن. ۋاقىتىڭدى ۇنەمدەپ, بەلگىلەگەن ۋاقىتىڭدا بارىپ, كەزەكسىز قىزمەت الاسىڭ جانە قازىرگىدەي ىندەت جۇرگەندە, ساقتىق ءۇشىن دە كەرەك. برونمەن كەزەك بەلگىلەپ, ءدال ۋاقىتىندا بارساڭ, حالىق شوعىرلانبايدى, ىندەت تارالۋ مۇمكىندىگى ازايادى. سوندىقتان, بارلىق زامانداستارىما مەملەكەتتىك قىزمەتتەردى ونلاين الۋعا, حقو-عا بارۋ ءۇشىن كەزەكتى دە ونلاين برونداۋعا كەڭەس بەرەمىن», - دەيدى الەم چەمپيونى.