بۇگىنگى تاڭدا كوكشەتاۋ قالاسىندا نەبارى 13 مايدانگەر تۇرادى. ونىڭ ءبىرى – ۆالەنتينا مازۋروۆا. تاياۋدا ىزدەپ بارىپ, تىلدەستىك. سۇم سوعىس تۋرالى سىزدىقتاتىپ سىر شەرتپەك تۇگىلى اۋزىنا دا العىسى كەلمەيدى. جادىندا تەك جەڭىس كۇنىنە قالاي جەتكەنى جاتتالىپ قالىپتى.
1945 جىلى قارشاداي باعىتتاۋشى-زەنيتشى قىز پولشادا جۇرگەن ەدى. تەرەزەنىڭ جاقتاۋىندا اناسىنا حات جازىپ وتىرعان ساتتە وق اتىلىپ, كەيىن جەڭىس دەگەن قۋانىشتى داۋىستار ەستىلگەن. اق تۇيەنىڭ قارنى جارىلعان ساتتە جۇرەك تولقىعانى سونداي, مانادان بەرى اماندىعىن بايانداپ وتىرعان قولىنداعى حات تا تولىق جازىلمادى. سول كەزدە قوس جاناردان مونشاقتاپ جاس توگىلگەن. بۇل قۋانىشتىڭ نىشانى ەدى. سالدەن سوڭ, ء«بىز جەڭدىك! مەن بيسكىگە مىندەتتى تۇردە ورالامىن» دەپ اناسىنا ءبىر بۋما حات جازىپ جىبەرەدى.
–كەشكىسىن مەن اناما حات جازۋعا كىرىسكەن ەدىم. كەنەتتەن ۇرىس باستالىپ, كەيىن تىنىش ورناي باستادى. جەڭىس, جەڭىس دەگەن داۋىس ەستىلدى. دەنىم دىرىلدەپ, تۇلا بويىم شىمىرلاپ كەتتى. وسى كۇنى ەشكىم ۇيىقتاي المادى. ەرتەڭ قالاي ءومىر سۇرەمىز دەگەن ويدا بولدىق,–دەيدى مايدانگەر ۆالەنتينا مازۋروۆا.
ۆالەنتينا مازۋروۆا قان مايدانعا نەبارى 19 جاسىندا اتتاندى. اكەسى ول كەزدە ەڭبەك ارمياسىنىڭ قاتارىندا, ال اناسىنىڭ موينىندا تاعى سەگىز بالانىڭ كۇتىمى بار ەدى. ەكىنشى ۋكراين پولكىنىڭ قۇرامىندا جاۋعا قارسى تويتارىس بەردى. «وتان سوعىسى» وردەنىمەن جانە «گەرمانيانى جەڭگەنى ءۇشىن» مەدالىمەن ماراپاتتالدى. ۆالەنتينا مازۋروۆا مايدان دالاسىندا جاراقات العان جاۋىنگەرلەرگە ۇنەمى كومەك كورسەتۋمەن بولدى.
ۆالەنتينا مازۋروۆا 1948-ءشى جىلى كوكشەتاۋعا قونىس اۋداردى. تۇرمىستىق حيميا فابريكاسىنا جۇمىسقا ورنالاستى. تۇرمىس قۇردى. بۇگىندە كۇيەۋى مەن ۇلى ومىردەن وزعان. جالعىس باستى كەيۋانا سۇم سوعىستى اۋىزعا دا المايدى. ول تۋرالى فيلمدەردى دە كورگىسى جوق. اشىق اسپان مەن بەيبىت كۇن ارداگەر انا ءۇشىن باعا جەتپەس بايلىق ىسپەتتى.