«قازاقتەلەكوم» جانە «سامۇرىق-قازىنا» ۇاق» اق ەنشىلەس كومپانياسى QazCloud Cisco Systems كومپانياسىمەن بىرلەسىپ, Cisco Meeting Server (CMS) امبەباپ كونفەرەنتسيا پلاتفورماسىنا ەلدە توتەنشە جاعداي جاريالانعانىنا بايلانىستى قاشىقتان جۇمىس ىستەۋ فورماتىنا اۋىسۋعا ءماجبۇر بولعان كومپانيالاردى قولداۋ ءۇشىن اقىسىز قىزمەت ۇسىنادى. بۇل تۋرالى «سامۇرىق-قازىنا» ۇاق» اق ءباسپاسوز قىزمەتى حابارلادى.
Cisco Meeting Server – ۆەبينارلار, ۆەب-كونفەرەنتسيالار وتكىزۋگە ارنالعان جانە كوپجاقتى اقپارات الماسۋدىڭ كەڭ مۇمكىندىكتەرى بار پلاتفورما. ول قازاقستان اۋماعىندا «قازاقتەلەكوم» اق ەڭ ءىرى داتا-ورتالىعى نەگىزىندە ورنالاستىرىلعان جانە قازاقستاننىڭ اقپاراتتىق قاۋىپسىزدىك زاڭناماسىنىڭ بارلىق تالاپتارىنا سايكەس كەلەدى. بۇل پلاتفورما وتاندىق كومپانيالاردىڭ قىزمەتكەرلەرىنە قۇجاتتارمەن, پرەزەنتاتسيالارمەن بىرلەسىپ جۇمىس ىستەۋگە, سونداي-اق بەينە چات, حابارلاما الماسۋ, ۆەب-سەسسيالاردى جازۋعا جانە قورعالعان كيبەر ورتادا كورۋگە ارنالعان بىرقاتار ىڭعايلى قۇرالدارمەن جۇمىس ىستەۋگە مۇمكىندىك بەرەدى.
«ەلىمىزدەگى ەپيدەميولوگيالىق جاعدايعا بايلانىستى كوپ كومپانيالار قىزمەتكەرلەرىن قاشىقتان جۇمىس ىستەۋ تəرتىبىنە اۋىستىرۋ تۋرالى شەشىم قابىلدادى. سەرىكتەستەرىمىز قىزمەتكەرلەرمەن بايلانىستى Cisco Meeting Server ءونىمىن اقىسىز پايدالانۋ ارقىلى جۇزەگە اسىرا الادى», - دەدى QazCloud باس ديرەكتورى قاسىم ەسەرگەپوۆ.