جامبىل وبلىسىندا «مەركى – بۋرىلبايتال» اۆتوجولى جاڭعىرتىلادى

ءىرى جوباعا قىتايلىق «China Xinxin Corporation» جانە قازاقستاندىق «ABK-Avtodor NS» كومپانيالارى تارتىلعان. سونىمەن قاتار, «Sinohydro Corp Limited» كومپانياسى «بالقاش – بۋرىلبايتال» جولىنىڭ 35,6 شاقىرىمىن سالۋدا. ال, «Todini and SMS» بىرلەسكەن كاسىپورنى «كۇرتى – بۋرىلبايتال» تراسساسىنىڭ 62 شاقىرىمدىق اۋماعىنىڭ قۇرىلىسىن ىسكە اسىرۋدا. بەردىبەك ساپارباەۆپەن بولعان كەزدەسۋگە «ۇزىناعاش – وتار» جولىنىڭ قۇرىلىسىن اتقارىپ جاتقان قازاقستاندىق مەردىگەرلىك ۇيىم «قازاقدورستروي» مەكەمەسىنىڭ وكىلدەرى دە  قاتىستى. ايتا كەتۋ كەرەك, اتالعان اۆتوجولدىڭ 16 شاقىرىمى جامبىل وبلىسىنىڭ اۋماعى ارقىلى وتەدى. قىتايلىق مەردىگەرلەرمەن سويلەسكەن بەردىبەك ساپارباەۆ ولاردان قازاقستاننىڭ زاڭدارىن قاتاڭ ساقتاۋدى تالاپ ەتتى. اكىم قىتايلىق كاسىپورىنداردىڭ جالاقىسىنىڭ تومەندىگىن العا تارتىپ, ونىڭ مولشەرىن جىل سايىن كەم دەگەندە 10 پايىزعا ارتتىرىپ وتىرۋ كەرەكتىگىن اتاپ ءوتتى. سونداي-اق, بەردىبەك ساپارباەۆ بارلىق جۇمىسشىلار ءۇشىن كومپانيا باسشىلىعى تەڭ جاعداي جاساۋ كەرەكتىگىن ايتا كەلىپ, اسىرەسە جالاقى, تاماقتانۋ جانە ءجۇرىپ-تۇرۋ ماسەلەلەرىن رەتتەۋ كەرەكتىگىن ەسكەرتتى. سونىمەن قاتار, بەردىبەك ساپارباەۆ مال وتكەلدەرىن سالۋ جانە جول بويىنداعى ارىقتار مەن كوپىرلەردى جوندەۋ قاجەتتىگىن دە جەتكىزدى. سول سياقتى, جول جوندەۋ جۇمىستارىنىڭ سەبەبىنەن جاقىن ماڭدا ورنالاسقان 13 ءۇيدىڭ قابىرعالارى جارىلعان. ولاردى 15 كۇننەن كەشىكتىرمەي جوندەۋ كەرەك. بۇل ءۇشىن 8,5 ميلليون تەڭگە قاجەت.

«قازاقستاندا بيزنەستىڭ الەۋمەتتىك جاۋاپكەرشىلىگى دەگەن ۇعىم بار. كومپانيالار جاقىن ماڭداعى ەلدى مەكەندەرگە, وبلىس ورتالىعىنا الەۋمەتتىك ماسەلەلەردى شەشۋگە كومەك كورسەتۋى كەرەك. اسىرەسە, كوروناۆيرۋس جاعدايىن ەسكەرە وتىرىپ, جاعدايى تومەن, كوپبالالى وتباسىلارعا كومەكتەسۋ قاجەت. قازاقستان رەسپۋبليكاسىنىڭ زاڭدارى, ونىڭ ىشىندە ء«تىل تۋرالى زاڭى» قاتاڭ ساقتالۋى كەرەك. مەملەكەتتىك ءتىلىمىز – قازاق ءتىلى. بارلىق ماڭدايشالار, ونىڭ ىشىندە كىرەبەرىستە ورنالاسقان كومپانيانىڭ اتاۋى دا قازاق تىلىندە بولۋى كەرەك. مەن تاعى دا وسىندا كەلىپ, بۇل تاپسىرمالارىمنىڭ قالاي ورىندالعانىن تەكسەرەمىن», دەدى بەردىبەك ساپارباەۆ. قىتاي كومپانيالارىنىڭ  جەتەكشىلەرى اكىمنىڭ تالاپتارىنا تولىقتاي كەلىسەتىندىكتەرىن ءبىلدىردى. ەندى «مەركى – بۋرىلبايتال» جولىنىڭ ءبىر باعىتىنىڭ قۇرىلىسى بيىل اياقتالىپ, جول قوزعالىسى قالپىنا كەلە مە؟ مەردىگەرلەر قۇرىلىستى تولىعىمەن جوسپاردان ءبىر جىل بۇرىن, ياعني 2021 جىلى اياقتاي الادى ما؟ بەردىبەك ساپارباەۆ كومپانيالارعا وسى سەكىلدى بىرقاتار ساۋالدارىن جولدادى. تالقىلاۋ كورسەتكەندەي, جول سالۋشىلاردىڭ الدىندا ەشقانداي كەدەرگىلەر جوق. «Todini and SMS» باسشىسى وبلىس اكىمىنەن مويىنقۇم اۋدانى اۋماعىندا كارەرلەردى بولۋگە كومەك بەرۋدى سۇرادى. «ەڭ باستىسى, بارلىق جۇمىستار ۋاقتىلى جانە ساپالى اتقارىلۋى كەرەك. مەركى جانە شۋ اۋداندارى اراسىنداعى جولدىڭ ءبىر باعىتىنىڭ قۇرىلىسىن بيىل اياقتاۋ كەرەك. جول قۇرىلىسىندا جەرگىلىكتى ماتەريالدار پايدالانىلىپ, ال جەرگىلىكتى ادامدار جۇمىسپەن قامتىلعانى ماڭىزدى. جول سالۋشىلار قازاقستاندىق وندىرۋشىلەرمەن كەلىسىم-شارتتار جاساسىپ, بيتۋم قورىن قالىپتاستىرۋ كەرەك», دەدى بەردىبەك ساپارباەۆ.

جامبىل وبلىسى