كاسىپورىننىڭ بايلانىس جانە اقپارات قىزمەتىنىڭ مالىمەتىنشە, جىلداعىداي ەلىمىزدىڭ ەنەرگەتيكا مينيسترلىگى بەكىتكەن جوندەۋ جۇمىستارىن جۇرگىزۋ كەستەسىنە سايكەس زاۋىتتاعى جوندەۋ جۇمىستار 25 مامىر-13 ماۋسىمى ارالىعىنا جوسپارلانعان.
ال, بيىلعى جوندەۋ جۇمىستارىنىڭ ەرتە باستالۋىنا سەبەپ-بيىلعى توتەنشە جاعداي كەزەڭىنە ساي بولعان.
سوندىقتان, الىپ زاۋىتتىڭ جىلداعىداي وتكىزىلەتىن كۇردەلى جوندەۋ جۇمىستارىنىڭ جوسپارىنا وزگەرىس ەنگىزىلگەن.
ياعني, كاسىپورىن جۇمىس كولەمىن تولىق ورىنداۋ ماقساتىندا جوسپارلى جوندەۋ-الدىن الۋ شارالارىنىڭ ەرتە باستالعانىن ءمالىم ەتتى.
توتەنشە جاعداي ءتارتىبىن ساقتاۋ ماقساتىندا «پمحز» جشس-دە جوندەۋ جۇمىستارىن قاۋىپسىز جۇرگىزۋىن قامتاماسىز ەتۋ بويىنشا ءتيىستى تالداۋ جاسالدى.
كاسىپورىن باسشىلىعى مۇنايشى-جۇمىسشى,قىزمەتكەرلەرىنىڭ قاۋىپسىزدىگىن قامتاماسىز ەتۋ ءۇشىن 8 ساعاتتىق جۇمىس كەستەسىن بەلگىلەدى.
سونداي –اق, تۇنگى ۋاقىتتا جۇمىس جاساۋ ءۇشىن كاسىپورىندا جۇمىستاردى جۇرگىزۋ كەستەسى مەن مەردىگەر ۇيىمداردىڭ جۇمىس ءتارتىبى قايتا قارالدى.
بۇل ءۇشىن جوندەۋ جۇمىستارىن جۇرگىزەتىن ماماندارعا جۇمىس الاڭدارىندا, قوعامدىق تاماقتانۋ ورىندارىندا جانە تاسىمالداۋ كەزىندە قولايلى جاعداي جاسالدى.
ال, جالپى «قازمۇنايگاز» ۇك اق اقپاراتىنا سايكەس, اتىراۋ جانە شىمكەنت مۇناي وڭدەۋ زاۋىتتارى دا ءوز قىزمەتىن قالىپتى جالعاستىرۋدا.
قولدا بار قوردى قوسا العاندا زاۋىتتاردىڭ ءوندىرىس كولەمى ەلىمىزدىڭ ىشكى نارىقتاعى اعىمداعى قاجەتتىلىگىن 3 ايدان استام مەرزىمگە قامتاماسىز ەتە الادى.
پاۆلودار وبلىسى