پاندەميا, البەتتە, كاسىپكەرلىكتى توقتاتىپ, جاقىنداردى الىستاتىپ, ەكونوميكانىڭ ستاگناتسياسىنا الىپ كەلدى. الايدا, بۇل ءبىر جاعىنان, ۇيدە بوس وتىرماي, بۇرىننان كەيىنگە قالدىرىپ كەلگەن ويلاردى جۇزەگە اسىرۋعا بەرىلگەن مۇمكىندىك. ول ءۇشىن ۋاقىتتى ءتيىمدى جۇمساۋ كەرەك.
كارانتين كەزىندە جاستاردى ۋاقىتىن ءتيىمدى پايدالانۋعا شاقىرىپ, رۋحاني-مادەني شارالاردى كوپتەپ ۇيىمداستىرۋعا تىرىسىپ جاتىرمىز. ايماق ونەرپازدارىمەن ونلاين كونتسەرتتەر وتكىزۋ جوسپارلانعان. ەلىمىزدىڭ نامىسىن حالىقارالىق ساحنالاردا قورعاپ جۇرگەن, «گولوس. دەتي 2019» بايقاۋىنىڭ ءفيناليسى, «Junior Eurovision-2019» بايقاۋىنىڭ جۇلدەگەرى, اقجايىق ءوڭىرىنىڭ ماقتانىشى ەرجان ماكسيم 12 ءساۋىر كۇنى ونلاين-كونتسەرت بەرىپ, باتىسقازاقستاندىقتاردى ءبىر قۋانتتى.
مادەني شارالارمەن قاتار, بىلىكتىلىكتى ارتتىرۋ كۋرستارى دا باستى نازاردا. وبلىستىڭ تاجىريبەلى ماماندارى كەڭەستەرىمەن ءبولىستى. سونىمەن بىرگە وبلىس جاستارىنا مەملەكەتتىك باعدارلامالار تۋرالى كەڭەس بەرۋ ۇيىمداستىرىلدى. الەۋمەتتىك جەلىدە جاستاردىڭ سۇراقتارىنا جاۋاپ بەرىپ, مەملەكەتتىك باعدارلامالار تۋرالى كەڭىنەن ايتىلدى. اتاپ ايتار بولساق, جاستار تاجىريبەسى, كاسىپكەرلىك باعدارلامالارى تۋرالى ءتۇسىندىرىپ, تۇرعىن ۇيگە قول جەتكىزۋ مۇمكىندىكتەرى, «سەرپىن» باعدارلاماسىمەن وقۋعا ءتۇسۋ مەن «ديپلوممەن – اۋىلعا!» باعدارلاماسىنىڭ مۇمكىندىكتەرى تۋرالى ەگجەي-تەگجەيلى اقپارات بەرىلدى.
كۇنى كەشە اقجايىق جاستارى ءۇشىن رامازان ايىنىڭ ماڭىزدىلىعى مەن ەرەكشەلىگى تۋرالى ورتالىق مەشىتتىڭ جاستار ءىسى سەكتورىنىڭ جەتەكشىسى دۇيسەنالى بەيىمبەت مىرزامەن سۇحبات ءوتتى.
جاستار ءتۇرلى كونكۋرستار مەن مارافوندارعا دا بەلسەندى ارالاسۋدا. حاكىم ابايدىڭ 175 جىلدىعىنا ارنالعان, ۇلى اقىننىڭ اندەرىن ورىنداۋدان, شىعارمالارىن (پوەما, ولەڭ, قارا ءسوز) جاتقا وقۋدان, اقىنعا ارنالعان ولەڭدەر بويىنشا ءمۇشايرا ءوتىپ جاتىر. قاتىسۋشىلار ءوز جۇمىستارىن الەۋمەتتىك جەلىگە جۇكتەپ, وقىرمانداردىڭ تاڭداۋىمەن ۇزدىكتەر انىقتالماق. «ۇيدە بىرگە وقيمىز!» اتتى كىتاپ وقۋ مارافونى ءجۇرىپ جاتىر.
جاستاردىڭ وقۋ مادەنيەتىن ارتتىرۋ, وتاندىق جانە زاماناۋي اۆتورلاردى دارىپتەۋ ماقساتىندا ءوتىپ جاتقان مارافونعا قاتىسۋشى كۇنىنە كەمىندە 1 ساعات كەز كەلگەن تاقىرىپتاعى ۇزدىك كىتاپتار تىزىمىنە ەنگەن تۋىندىنى وقۋى ءتيىس. بەلسەندى قاتىسۋشىلار ەلەۋسىز قالمايدى. ولارعا دايىندالعان ارنايى سىيلىقتارىمىز بار. ال كەشە اقجايىق جاستارى مۋزەي «ارالادى». تەحنولوگيا مۇمكىندىكتەرىن پايدالانىپ الماتى وبلىسىنداعى «ەسىك» تاريحي-مادەني قورىق-مۇراجايىنا ونلاين ەكسپەديتسيا ۇيىمداستىردىق. جاستار «التىن ادامدى» كورۋگە مۇمكىندىك الدى.
ودان بولەك, ايماق پسيحولوگتارى دا جاستاردىڭ پسيحولوگيالىق كوڭىل كۇيىن بىرقالىپتى ۇستاۋ ماقساتىندا ءتۇرلى ترەنينگتەر وتكىزەدى. «جاس وتباسى» كلۋبى ءار سەيسەنبى, بەيسەنبى كۇندەرى ونلاين-كونسۋلتاتسيا وتكىزىپ, جاستاردى مازالاعان ماسەلەلەردىڭ شەشىمىن تابۋعا جاردەمدەسەدى.
جاستار – ەلىمىزدىڭ بولاشاعى ەكەنىن ايتىپ ءجۇرمىز. ەل ەرتەڭى جارقىن بولۋى ءۇشىن جاستارىمىز ءبىلىمدى, سانالى بولۋى كەرەك. وبلىستىق جاستار رەسۋرستىق ورتالىعىنىڭ دا باستى مىندەتى – جاستاردى ساپالى ومىرگە, بىلىمگە شاقىرۋ.
مەيىربەك نۇركەن,
باتىس قازاقستان وبلىستىق جاستار ساياساتى ماسەلەلەرى باسقارماسى جاستارمەن جۇمىس جونىندەگى رەسۋرستىق ورتالىعىنىڭ باسشىسى