29 ساۋىردەگى 9.00 ساعاتتاعى احۋال بويىنشا الماتىدا كوروناۆيرۋس ينفەكتسياسىن جۇقتىرعان تاعى 5 ادام تىركەلدى.
ولاردىڭ بارلىعى ۆيرۋس جۇقتىرعان ناۋقاسپەن بايلانىستا بولعاندار قاتارىنان. بايلانىسقانداردىڭ ىشىنەن ەڭ ۇلكەنى – 1944 جىلعى زەينەتكەر, ەڭ جاسى كىشىسى – 2 جاستاعى پاتسيەنت. الماتىدا كوروناۆيرۋستىق ينفەكتسيادان تاعى 6 پاتسيەنت ساۋىعىپ ەمدەۋدەن شىعارىلدى. قازىرگى ۋاقىتتا مەگاپوليستە جازىلىپ, ەمدەۋدەن شىعارىلعاندار سانى – 102 ادام.
ءبىرىنشىسى, 30 ناۋرىزدا ىستامبۇل – كۋالا-لۋمپۋر – الماتى رەيسىمەن ۇشىپ كەلگەن 24 جاسار قىز. ۇشىپ كەلگەن سوڭ ستاتسيونارعا كارانتينگە ورنالاستىرىلدى, ءبىرىنشى تەستى تەرىس ناتيجە كورسەتكەن, 10 ساۋىردەگىسى وڭ ناتيجە كورسەتكەن. ەمدەۋ 18 كۇن ىشىندە جەڭىل تۇردە ءوتتى.
ەكىنشىسى, 16 ناۋرىزدا كرۋيز لاينەرىمەن كەلگەن 1953 جىلى تۋعان ايەل. كەلگەن سوڭ كارانتيندە بولدى, ءبىرىنشى تەستى تەرىس ناتيجە كورسەتتى, كەزەكتى تەستى 28 ناۋرىز كۇنى وڭ ناتيجە كورسەتكەن. پاتسيەنتتىڭ سىرقاتى اۋىر تۇردە ءوتتى. دياگنوزى: ەكى جاقتى پوليسەگمەنتارلى پنەۆمونيامەن Covid-19 ۆيرۋسى. بۇگىنگى كۇنى پاتسيەنت ءوزىن جاقسى سەزىنەدى. سوڭعى رەت جاسالعان رەنتگەنىندە پنەۆمونيا تابىلماعان. ەمدەۋ 31 كۇنگە سوزىلدى.
ءۇشىنشىسى, اۋرۋدىڭ جەڭىل جۇرۋىمەن №11 قالالىق ەمحانانىڭ 38 جاستاعى مەديتسينا قىزمەتكەرى. ەمدەۋدە 17 كۇن بولعان.
ءتورتىنشىسى, بۇل 26 ناۋرىزدا ماسكەۋدەن ۇشىپ كەلگەن 1963 جىلى تۋعان ايەل. كەلگەن سوڭ ستاتسيونارعا كارانتينگە ورنالاستىرىلدى.
27 ناۋرىزداعى تەستى وڭ ناتيجە كورسەتتى. ەمدەلۋدە 32 كۇن بولدى, جاي-كۇيى ورتاشا اۋىرلىق دارەجەسى رەتىندە باعالاندى, سول جاقتى تومەنگى ۇلەستىك برونح پنەۆمونياسى بولعان.
بەسىنشىسى, 1984 جىلى تۋىلعان, الماتى كوپبەيىندىك كلينيكالىق اۋرۋحاناسىنان اۋىستىرىلعان ايەل. الماتى وبلىسىنىڭ تۇرعىنى. سىرقاتى اۋىر تۇردە ءوتتى. ەكى جاقتى پوليسەگمەنتارلى پنەۆمونياسى بولعان. ەمى 32 كۇنگە سوزىلدى.
التىنشىسى, بۇل 11 ساۋىردە ەمدەۋگە كەلىپ تۇسكەن, جۇكتىلىكتىڭ 6 اپتاسىنداعى 33 جاسار ايەل.
ينكۋباتسيالىق كەزەڭ 1-دەن 14 كۇنگە دەيىن اۋىتقيتىندىعىن ەستەرىڭىزگە سالامىز. سوندىقتان, وسى ۋاقىت ىشىندە Covid-19 ۆيرۋسى انىقتالۋى مۇمكىن.
بارلىق ەمدەۋدەن جازىلىپ شىعارىلعان پاتسيەنتتەر 14 كۇندىك ءۇي كارانتينىندە بولادى. قازىرگى ۋاقىتتا ينفەكتسيالىق ستاتسيونارلاردا كوروناۆيرۋستىق ينفەكتسيادان 809 پاتسيەنت ەمدەلۋدە. ولاردىڭ ۇشەۋىنىڭ جاي-كۇيى –اسا اۋىر, 26 ادامدا – اۋىر, 228 ادامدا – اۋىرلىقتىڭ ورتاشا دارەجەسىندە جانە قالعاندارى قاناعاتتانارلىق دەپ باعالانۋدا. ءۇش پاتسيەنت تىنىس الۋ جەتىسپەۋشىلىگىنە بايلانىستى ءوجج اپپاراتىندا, ولاردىڭ ەكەۋى اسا اۋىر جانە بىرەۋى اۋىر حالدە. پروۆيزورلىق گوسپيتالداردا 426 ادام جاتىر, ونىڭ ىشىندە15-ءى بالا, كارانتيندىك وقشاۋلاۋدا 304 ادام, ءۇي كارانتينىندە 11694 ازامات بار.