ەل پرەزيدەنتى قاسىم-جومارت توقاەۆتىڭ مالىمدەمەسىنەن سوڭ قاراعاندى وبلىسىندا كارانتيننىڭ قاتاڭ ءتارتىبى جەڭىلدەتىلدى. بۇل تۋرالى وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى قانات اسقاروۆ مالىمدەدى.
دەگەنمەن, بۇگىندە كوروناۆيرۋس قۇتىرىنىپ تۇرعان تەمىرتاۋ قالاسىندا ءالى دە قاتاڭ شارالار ساقتالادى. مۇندا سانيتارلىق نورمالاردى ساقتاي وتىرىپ, تەك قۇرىلىس نىساندارى, تەحنيكالىق قىزمەت ستانساسى (تقس),, شينومونتاج شەبەرحانالارى, اۆتوجۋ ورىندارىنا عانا جۇمىس ىستەۋگە رۇقسات الدى.
قانات اسقاروۆ قاراعاندى وبلىسىنىڭ باسقا قالالارى مەن اۋداندارىندا تۇرعىندارعا ساياجاي ۋچاسكەلەرىنە بارۋىنا مۇمكىندىك بەرىلگەنىن جەتكىزدى. سونداي-اق, قوعامدىق كولىكتەر قايتا جۇمىسىن باستايدى. ونەركاسىپتىك كاسىپورىندارىنا جانە باسقا دا بىرقاتار قىزمەت كورسەتۋ نىساندارىنىڭ قىزمەتىنە رۇقسات بەرىلدى.
بۇعان قوسا, ادۆوكاتتىق كەڭسەلەرگە, نوتاريۋستارعا, تقس, شينومونتاج شەبەرحانالارىنا, كولىك جۋ ورىندارىنا, ەكىنشى دەڭگەيلى بانكتەرگە جانە حقكو جۇمىس ىستەۋگە رۇقسات ەتىلدى.
اۋىل شارۋاشىلىق تەحنيكاسىن, جابدىقتاردى كوتەرمە ساۋدامەن ساتۋ قايتا ىسكە قوسىلدى. تۇقىم, كوشەتتەر جانە باسقا دا ماتەريالداردى ساتۋ جونىندەگى مامانداندىرىلعان دۇكەندەرگە جانە بولىمدەرگە جۇمىس ىستەي باستايدى.
ساۋدا نۇكتەلەرىن اشپاي, تەك جەتكىزۋ رەجيمىندە تۇرمىستىق تەحنيكا مەن ەلەكتر جابدىقتارىن, جانۋارلارعا ارنالعان تاۋارلاردى, تۇرمىستىق حيميانى, قوسالقى بولشەكتەر مەن شىعىن ماتەريالدارىن ساتۋعا رۇقسات ەتىلەدى. باس سانيتارلىق دارىگەر جۇمىستى جاڭارتاتىن بارلىق كاسىپورىندار سانيتارلىق-ەپيدەميولوگيالىق تالاپتاردى قاتاڭ ساقتاي وتىرىپ, الدىن الا جازىلۋ ارقىلى عانا قىزمەت كورسەتۋى ءتيىس ەكەندىگىن ەسكەرتتى.
كامەلەتتىك جاسقا تولماعان بالالاردىڭ ەرەسەكتەرسىز جۇرۋىنە بولمايدى. وتباسى مۇشەلەرىن قوسپاعاندا, بەستەن اسا ادامنىڭ جينالۋىنا, ساياباقتار مەن گۇلزارلار اۋماعىندا سەرۋەندەۋگە تىيىم سالىنادى.
سونداي-اق, قانات اسقاروۆ توتەنشە جاعداي كەزىندە قوعامدىق قاۋىپسىزدىكتى جانە كارانتيندىك رەجيمدى قامتاماسىز ەتۋ ءۇشىن اتا-انالار كۇنىندە زيرات باسىنا بارماۋدى ۇسىندى.
– وسى جەڭىلدىكتەرگە تۇسىنىستىكپەن قاراۋدى سۇرايمىن. ىندەتتى جۇقتىرۋ قاۋپى ءالى دە جوعارى. سوندىقتان ساقتىقتى جوعالتپاۋ كەرەك. قازىرگى ەپيدەميولوگيالىق جاعدايدا قاۋىپسىزدىكتىڭ نەگىزگى شارتى الەۋمەتتىك قاشىقتىقتى, جەكە گيگيەنا ەرەجەلەرىن قاتاڭ ساقتاۋ. سونداي-اق, جۇمىس ىستەپ تۇرعان نىسانداردا دەزينفەكتسيالىق رەجيمدى ساقتاۋدىڭ ماڭىزىن ۇمىتپاعان ءجون. كارانتيندىك رەجيمنىڭ ورىندالۋىن باقىلاۋ شارالارى جالعاسادى, – دەدى قاراعاندى وبلىسىنىڭ باس مەملەكەتتىك سانيتارلىق دارىگەرى.
قاراعاندى وبلىسى