بيزنەس وكىلدەرىنە بەرىلگەن مۇمكىندىك

بيۋدجەتتەن فەرمەرلەرگە 70 ملرد تەڭگە ءبولىندى. وسى ماقساتتا «قاراپايىم زاتتار ەكونوميكاسى» باعدارلاماسى ارقىلى  قوسىمشا 100 ملرد تەڭگە بەرىلۋدە. جالپى, بۇل شارالار قازىرگى كۇردەلى كەزەڭدە ازاماتتار مەن وتاندىق بيزنەستى قولداۋداعى ماڭىزدى شەشىم دەپ ويلايمىن. ويتكەنى بۇگىنگى تالاپتارعا سايكەس, ەلىمىزدەگى ازىق-ت ۇلىك قاۋىپسىزدىگىنە ەرەكشە ءمان بەرۋىمىز قاجەت. بۇل ءۇشىن اۋىل شارۋاشىلىعى سالاسىندا ەڭبەك ەتىپ جۇرگەن كاسىپكەرلەر مەن باسقا دا شارۋا­لاردى مەملەكەت تاراپىنان قولداۋدىڭ ماڭىزى زور. ءبىز بۇگىندە مەملەكەت باسشىسىنىڭ تاپسىرماسى اياسىندا ۇيىمداستىرىلعان جوسپارلار بويىنشا جۇمىس ىستەپ جاتىرمىز.

توتەنشە جاعداي كەزىندە «اۋىل شا­رۋا­شىلىعىن قارجىلاي قولداۋ قورى» بيزنەسى زارداپ شەككەن كليەنت­تەردىڭ تولەمىن كەيىنگە شەگەردى. بيز­نەس يەلەرىنىڭ نەسيە جۇكتەمەسى جەڭىلدەتىلەتىن بولدى. قور قارجى­لاندىرعان جوبالاردىڭ بەكىتىلگەن كەستەسى بويىنشا ازاماتتاردىڭ نەسيە تولەيتىن ۋاقىتى 15 ماۋسىمعا دەيىن ۇزارتىلدى. ول ءۇشىن كاسىپكەرلەر قارجىلىق قيىندىعىن دالەلدەيتىن قۇجاتتاردى كورسەتە وتىرىپ, ءوتىنىش جازۋى ءتيىس. ءوتىنىشتى اكەلىپ جۇرمەي-اق, قوردىڭ ەلەكتروندى پوشتاسىنا جولداسا جەتكىلىكتى.  بۇگىنگە دەيىن مىڭنان استام ءوتىنىش كەلىپ ءتۇستى.

پرەزيدەنت ايتقانداي, بيىل ەلىمىزدە 1,6 ملن-نان استام ادام, 11,5 مىڭ شاعىن جانە ورتا بيزنەس وكىلى نەسيەسىن كەيىن تولەۋگە مۇمكىندىك الدى. نەسيەلەردىڭ جالپى سوماسى 360 ملرد تەڭگەدەن اسادى. ءارى 700 مىڭنان استام كومپانيا مەن جەكە كاسىپكەرگە سالىقتىق جەڭىلدىكتەر جاسالدى. سول ارقىلى ولار 1 ترلن تەڭگەگە جۋىق قارجىنى ۇنەمدەيتىن بولدى. سونداي-اق جۇمىسشى سانىن جانە ەڭبەكاقى كولەمىن ازايتپاۋ ماقساتىندا ءىرى كومپانيالارعا ءتيىستى قولداۋ كورسەتىلمەك. بۇل داعدارىسقا قارسى تۇرۋعا كومەكتەسەتىن ماڭىزدى شارالار دەپ سانايمىن.

ءدال قازىر اۋىل شارۋاشىلىعى سالاسىنا اسا ءمان بەرگەنىمىز ابزال. سەبەبى ازىق-ت ۇلىكتىڭ باستى قورى اگرارلىق سەكتورعا تيەسىلى. توتەنشە جاعدايدا كۇندىز-ءتۇنى تىنىم تاپپاي جۇمىس ىستەپ جاتقان شارۋالاردىڭ ەڭبەگىن ەسكەرمەسە بولمايدى. بۇل رەتتە مەملەكەت باسشىسىنىڭ دەر ۋاقىتىندا جۇكتەلگەن مىندەتتەمەلەرىنىڭ ناتي­جەسىندە كوكتەمگى ەگىس ناۋقانى ماسەلەلەرى دە شەشىمىن تاپقانداي. وسى ناۋقانعا جانە ءونىمدى الدىن الا ساتىپ الۋعا 200 ملرد تەڭگە ءبولىندى. سونىڭ 70 ملرد تەڭگەسى تۇقىم ءوندىرىسىن دامىتۋعا, تىڭايتقىشتار ساتىپ الۋعا جۇمسالادى.

مەنىڭ تاعى ءبىر ايتقىم كەلەتىنى, بيىل فەرمەرلەردىڭ ءونىمىن فورۆاردتىق ساتىپ الۋعا ەرەكشە نازار اۋدارىلماق. قارجىلاندىرۋ الدىن الا تولەم ارقىلى جۇزەگە اسىرىلادى. ونىڭ ۇستىنە نەسيە بويىنشا پايىزدىق مولشەرلەمە 7%-دان 5%-عا دەيىن تومەندەمەك. بۇل بيزنەس وكىلدەرىنە بەرىلگەن ۇلكەن مۇمكىندىك.

جاندار وماروۆ,

«اۋىل شارۋاشىلىعىن قارجىلاي قولداۋ قورى» اق باسقارما توراعاسى