مەملەكەت باسشىسى قاسىم-جومارت توقاەۆتىڭ ەلىمىزدەگى توتەنشە جاعدايدىڭ ۇزارتىلۋىنا قاتىستى جاساعان مالىمدەمەسى اسا قاجەتتى شارا دەپ بىلەمىن. جاھاندى ابىگەرگە سالعان پاندەميانىڭ ەلىمىزدە ءورشىپ كەتپەۋى ەڭ الدىمەن وسى توتەنشە جاعداي رەجىمىنىڭ ۋاقتىلى ەنگىزىلۋىمەن تىكەلەي بايلانىستى.
بۇگىندە كوروناۆيرۋس ىندەتىنە شالدىققاندار سانى دۇنيە جۇزىندە 3 ملن-عا جۋىقتادى. مەديتسيناسى دامىعان ەل دەپ باعالاناتىن اقش, ەۋروپا ەلدەرىنىڭ جاعدايى دا ءماز ەمەس. ال قازاقستانداعى جاعداي الەم مەملەكەتتەرىمەن سالىستىرعاندا بارىنشا تۇراقتى. الايدا ەلىمىزدە ۆيرۋس جۇقتىرعاندار سانى ارتىپ كەلەدى. بىراق ىندەت جۇقتىرۋ ديناميكاسى الدەقايدا تومەن. سوندىقتان پرەزيدەنت تاراپىنان قابىلدانىپ جاتقان شارانىڭ بارلىعى دا دۇرىس دەر ەدىم. توتەنشە جاعداي مەرزىمىن سوزۋىمىز قاجەت. نەگە؟ سەبەبى توتەنشە جاعداي مەرزىمىن ۇزارتقان سايىن ەلىمىزدە اۋرۋعا شالدىققانداردىڭ سانى ازايادى.
توتەنشە جاعداي رەجىمىن ەڭ الدىمەن اۋىلدىق, اۋداندىق دەڭگەيدە قاتاڭداتۋ قاجەت دەپ سانايمىن. ولاي دەۋگە سەبەپ – ۆيرۋستىڭ قازاقستاننىڭ ايماقتارىنا تارالىپ كەتۋىندە بولىپ وتىر. وسى ماسەلەگە قاتاڭ نازار اۋدارۋ كەرەك دەپ بىلەمىن.
مەملەكەت باسشىسى اتاپ وتكەندەي, 12 مامىردان باستاپ توتەنشە جاعداي رەجىمى توقتاتىلادى. بىراق ءبىر نارسەگە قازىردەن باستاپ ۇيرەنۋىمىز كەرەك. كوروناۆيرۋسقا ۆاكتسينا تابىلعانشا بىزگە وسى ىندەتپەن قاتار ءومىر سۇرۋىمىزگە تۋرا كەلەدى. بۇل اسا قاۋىپتى ماسەلە. الايدا قولدان كەلەر ودان وزگە قايران جوق. سوندىقتان ادامدار سانيتارلىق-گيگيەنالىق نورمالاردى ساقتاۋدى جانە تۇرعىندار اراسىنداعى قارىم-قاتىناس مادەنيەتىن وزگەرتۋدى, سونىمەن قاتار جەكە باسىنىڭ, قورشاعان ورتانىڭ قاۋىپسىزدىگىن ساقتاۋدى ۇيرەنۋى ءتيىس. سول كەزدە بارىپ ەلىمىزدە ۆيرۋس جۇقتىرعاندار سانى ازايادى.
توتەنشە جاعداي رەجىمى كەزىندە مەملەكەت تاراپى دا حالىققا بەيجاي قاراعان جوق. وتانداستارىمىزعا ءتيىستى كومەك كورسەتىلىپ جاتىر. پرەزيدەنت مالىمدەمەسىندە اتاپ وتكەندەي, حالىققا كومەكتەسۋ, ياعني ازاماتتار مەن بيزنەستى قولداۋ ءۇشىن 6 ترلن تەڭگەگە جۋىق قارجى ءبولىندى. بۇل – حالىققا اسا ۇلكەن كومەك. ماسەلەن, كورشىلەس رەسەي, وزبەكستان سىندى مەملەكەتتەردىڭ بىردە-بىرەۋى ءوز حالقىنا وسىنداي قولداۋ جاساپ جاتقان جوق. سونداي-اق ەلىمىزدەگى توتەنشە جاعداي رەجىمىنىڭ سوزىلۋىنىڭ ءوزى حالىقتىڭ دەنساۋلىعىن ساقتاۋعا دەگەن مەملەكەتتىڭ كوڭىلى دەۋگە بولادى. وسىنى ەستە ساقتاۋىمىز كەرەك.
قازىرگى ەڭ نەگىزگى ماسەلە – وتانداستارىمىزدىڭ توتەنشە جاعداي رەجىمى كەزىندە دە, توتەنشە جاعداي رەجىمى اياقتالعان سوڭ دا ءتارتىپتى ساقتاي بىلۋىندە. ءوز مادەنيەتىمىزدى وزگەرتۋىمىز قاجەت. سوندىقتان ەلىمىزدە قابىلدانىپ جاتقان ءىس-شارانىڭ بارلىعى دا تۇرعىندار ءۇشىن اۋاداي قاجەت ءارى دۇرىس دەپ بىلەمىن.
ەرلان سايروۆ,
ساياساتتانۋشى