بوساڭسۋعا ءالى ەرتە

مەملەكەت باسشىسى قاسىم-جومارت توقاەۆتىڭ مالىمدەمەسى – ەلدىڭ, حالىقتىڭ اماندىعى ءۇشىن جاسالعان كۇردەلى, بىراق اسا قاجەت شەشىم ەكەنىن ايتقان مينيستر كارانتيننىڭ ناتيجەسىندە ەلىمىزدە ىندەت جاپپاي تارالماعانىن اتاپ ءوتتى. «بىراق, پرەزيدەنت ايتقانداي, بوساڭسۋعا ءالى ەرتە. قاسىم-جومارت كەمەل ۇلى مەم­لەكەتتىك كوميسسياعا بىرقاتار ەكونوميكا سالا­لارىنىڭ جۇمىسىن قايتا قالپىنا كەلتىرۋدى تاپسىردى. ياعني ءبىز نەعۇرلىم كارانتين تالاپتارىن قاتاڭ ساقتاساق, سوعۇرلىم كۇندەلىكتى تىرشىلىككە تەزىرەك قايتا ورالامىز. بۇل, اسىرەسە, مامىر ايىنداعى مەرەكە كۇندەرى جانە قاسيەتتى رامازان ايىندا وتە وزەكتى. وز­دەرىڭىز بىلەسىزدەر, رامازان ايى – ەڭ الدى­مەن, ىزگى امالداردىڭ, ساۋاپتى ىستەردىڭ ايى. بۇل تۇرعىدا, ەلىمىزدەگى ء«بىز بىرگە­مىز!» اكتسياسىنىڭ دا باستى ماقساتى جاقسى­لىق­پەن, ىزگىلىكپەن ۇندەسەدى», دەدى د.اباەۆ.

كەشە پرەزيدەنتتىڭ تاپسىرمالارىن ورىنداۋ ماقساتىندا وتكەن توتەنشە جاع­داي رەجىمىن قامتاماسىز ەتۋ جونىندەگى مەملەكەتتىك كوميسسيانىڭ وتىرىسىنا توق­تالعان داۋرەن اباەۆ باستى مىندەتتىڭ ءبىرى تەست ارقىلى انىقتاۋ جۇمىستارىنىڭ كولەمىن ارتتىرۋ ەكەنىن جەتكىزدى. ونىڭ ايتۋىنشا, ءساۋىر ايىندا انىقتالعان اۋرۋ جاعدايلارىنىڭ 67%-ى سيمپتومسىز بولعان. بۇل پروفيلاكتيكالىق دياگنوستيكا ارقىلى انىقتالىپ وتىر. سونداي-اق مەديتسينا قىزمەتكەرلەرىن دە تەست ارقىلى تەكسەرىپ وتىرۋدىڭ ماڭىزدىلىعىن اتاپ وتكەن مينيستر ەلىمىزدە 20 مىڭنان اسا مەديتسينالىق قىزمەتكەر تەست ارقىلى تەكسەرىلگەنىن جەتكىزدى.

كوميسسيا وتىرىسىندا نۇر-سۇلتان مەن الماتى قالالارى اراسىنداعى اۋە بايلانىسى 1 مامىردان باستاپ بىرتىندەپ قالپىنا كەلەتىنى تۋرالى شەشىم قابىلداندى. شە­شىمگە ساي ءبىرىنشى كەزەڭدە كۇنىنە 4 رەيس جاساۋ جوسپارلانعان. د.اباەۆتىڭ حابار­لاۋىنشا,  2 رەيس – Air Astana, 1 رەيس – Fly Arystan, 1 رەيس – SCAT كوم­پا­نيا­لارىنا تيەسىلى. «ولار بيلەت قۇ­نىن كارانتينگە دەيىنگى دەڭگەيدە ۇستاۋعا مىن­دەتتى. ال جاعداي تۇزەلگەن سايىن رەيس سانىن جانە ۇشاق سىيىمدىلىعىن ارتتىرۋ ماسەلەسى قاراستىرىلادى. اۋە تاسىمالى كولىكتەگى باس سانيتارلىق دارىگەر بەكىتكەن كۇشەيتىلگەن سانيتارلىق تالاپتار ارقىلى جاسالادى», دەدى ۆەدومستۆو باسشىسى. 

مينيستر كوميسسيا وتىرىسىندا بار­لىق وڭىرلەردە بۇگىننەن, ال شىمكەنت قالا­سىندا بيىلعى 1 مامىردان باستاپ قاتاڭ سانيتارلىق-ەپيدەميالىق تالاپتاردى ساقتاۋمەن جۇمىسقا كىرىسەتىن كاسىپكەرلىك سۋبەكتىلەرى قىزمەت تۇرلەرىنىڭ ءتىزىمى بەكى­تىلگەنىن دە اتاپ ءوتتى.

اقپارات جانە قوعامدىق دامۋ ءمينيسترى قازىر شەتەلدە قازاقستاننىڭ 175 مىڭ ازاماتى بار ەكەنىن, ولاردىڭ كوپشىلىگى وتانىنا ورالعىسى كەلەتىنىن ايتا كەلىپ, سىرتقى ىستەر مينيسترلىگى وسى باعىتتا ۇلكەن جۇمىس جۇرگىزىپ جاتقانىن ايتتى. «اقش-تان – 179, پولشادان – 65, يزرايلدەن 28 ازاماتىمىزدى اكەلەمىز. ال رەسەيدەن مامىر ايىندا 6 مىڭنان اسا ازاماتىمىزدى ەلگە جەتكىزۋ جوسپارلانۋدا», دەدى ول.

مينيستر ەلىمىزدە بيزنەس وكىلدەرىن, اسىرەسە ەكسپورتقا باعىتتالعان كاسىپ­ورىن­داردى قولداۋعا باعىتتالعان QAZTRADE باع­دارلاماسى ىسكە قوسىلعانىن دا حابار­لادى. ال توتەنشە جاعداي كەزىندەگى قىل­مىس­تىڭ الدىن الۋ جۇمىستارىنا توقتالعان د.اباەۆ 16 ناۋرىزدان باستاپ توتەنشە جاع­داي ەرەجەسىن بۇزعان 16 مىڭنان استام ازامات ۇستالعانىن, ونىڭ 12 مىڭنان استامى اكىمشىلىك جاۋاپكەرشىلىككە تارتىلعانىن جەتكىزدى. «دەنساۋلىق ساقتاۋ ورگاندارىنىڭ سۇراۋى بويىنشا پوليتسيا التى جارىم مىڭنان استام ادامنىڭ تۇراتىن جەرىن انىقتادى. قازىرگى ۋاقىتتا ىزدەۋ جۇمىستارى تەك 7 ادامعا جۇرگىزىلۋدە», دەدى ول.