بىلتىر كوكشەتاۋدا تالانتتى ورەندەردەن قۇرىلعان «EL Jastar» تەاترى اشىلعان بولاتىن. جاڭادان قۇرىلعان شىعارماشىلىق ۇجىمى از ۋاقىت ىشىندە كوپشىلىككە تانىلىپ ۇلگەردى.
تەاتر ترۋپپاسى اشىلعانىنا كوپ وتپەي جاتىپ اقتوبە قالاسىنىڭ 80-جىلدىعىنا ارنالعان «بالاۋسا» حالىقارالىق فەستيۆالىندە باق سىنادى. بايگەگە قاتىسىپ قانا قويماي, قالا اكىمىنىڭ سىيلىعى مەن فەستيۆالدىڭ ارنايى نوميناتسياسىن جەڭىپ اكەلدى. شىعارماشىلىق ۇنەمى جەتىلىپ وتىرۋدى تالاپ ەتەتىنىن جاقسى بىلەتىن ونەرپازدار فەستيۆالدەگى جەتىستىككە مارقايىپ قالماي, باسقا دا سۇبەلى دۇنيەلەردى ساحنالاۋدى قولعا الدى. وسى ورايدا بۇگىنگى كۇننىڭ ماڭىزدى ماسەلەسى – بالالاردىڭ ەلەكتروندى گادجەتكە شەكتەن تىس تاۋەلدىلىككە ۇشىراۋىن پروبلەما ەتىپ كوتەرگەن «اسقار مەن اسىق» اتتى ەرتەگىنى كورەرمەن نازارىنا ۇسىندى.
تەاتر ترۋپپاسىنىڭ نەگىزگى قۇرامى اقان سەرى اتىنداعى جوعارى مادەنيەت كوللەدجىنىڭ ستۋدەنتتەرىنەن جاساقتالعان. ۇجىمداعى كوللەدج ستۋدەنتتەرى وقۋ بىتىرگەن سوڭ ءىرى قالالارداعى ءبىلىم وردالارىنا وقۋعا ءتۇستى. ءبىرازى ءار وڭىردەگى تەاترلارعا جۇمىسقا ورنالاستى. «EL Jastar» تەاترىنىڭ جاستارى ءوز جولدارىن تاۋىپ, ونەر جولىنداعى بيىك ماقسات, اسقاق ارمانعا قول سوزعانى قۋانتادى.
تەاتردىڭ ارت-ديرەكتورى حاكىم حاسانباي مەن كوركەمدىك جەتەكشىسى فارحادبەك كانافين نامىسقا تىرىسىپ, بيىلعى وقۋ جىلى باستالىسىمەن تاعى دا سول كوللەدج ستۋدەنتتەرىنەن ىرىكتەپ, جاڭا ترۋپپا قۇردى. اعىمداعى جىل «اباي جىلى» دەپ بەلگىلەنۋىنە بايلانىستى حاكىم شىعارماشىلىعىن ناسيحاتتاۋ ماقساتىندا پەرفورمانس جانرىنداعى «جاستىقتىڭ وتى, قايداسىڭ؟!» اتتى سپەكتاكل دايىندادى. كوكشەتاۋداعى «اباي جىلى» اقپان ايىنىڭ باسىندا وسى قويىلىممەن اشىلعانىن اتاپ وتكەن ءلازىم.
بۇل قويىلىمعا ءۇش اي ۋاقىتىن سارپ ەتكەن ەكى ماماننىڭ ەڭبەگى زور. وسىنداي كەزدە جوعارى مادەنيەت كوللەدجىنىڭ ديرەكتورى قۇرالاي عازيزقىزى قولۇشىن بەرىپ, قولداۋ تانىتقان. ونەردى تەرەڭ تۇسىنەتىن ول كوللەدج قابىرعاسىندا وقيتىن تالانتتى جاستاردىڭ ۇيىمداسىپ, ۇلكەن ىسكە بىلەك سىبانا كىرىسكەنىن كورگەن سوڭ, ولاردىڭ الاڭسىز دايىندالۋىنا جاعداي جاسادى. ساحنا, كوستيۋم سىندى تەاتردىڭ بۇلجىماس بولشەكتەرى, بالەتمەيستەر, دىبىس, جارىق وپەراتورى سىندى سان قىرلى ماماندار دا كوللەدج ستۋدەنتتەرىنىڭ اراسىنان تابىلا كەتتى. پرەمەراعا كەلگەن ەل اعالارى جاستاردىڭ ونەرگە دەگەن ماحابباتىن كورىپ, العىسىن ايتىپ, باتاسىن بەردى. ەڭبەكتىڭ جانعانى دەگەن وسى ەمەس پە! ال كوكشەتاۋداعى جانايدار مۋسين اتىنداعى جوعارى قازاق پەداگوگيكالىق كوللەدجىنىڭ ديرەكتورى نۇرتاس احات ۇلى 250 مىڭ تەڭگە كولەمىندە, قۇرالاي ىدىرىسوۆا 180 مىڭ تەڭگە كولەمىندە سەرتيفيكات تابىستاعان. بۇل جاناشىرلىقتان تۋعان قولداۋ.
«EL Jastar» تەاترى ۇلى ابايعا ارنالعان وسى قويىلىممەن وبلىستاعى اۋداندار مەن قالالاردى ارالاپ شىعۋدى جوسپارلاپ وتىر. سونداي-اق رەسپۋبليكانىڭ وزگە وڭىرلەرىندە وتەتىن تەاتر فەستيۆالدەرىنە قاتىسپاق. بيىلعى جىلدان كۇتەرى كوپ تالانتتى جاستاردىڭ ونەرى ورىستەپ, جىگەرى جالىنداي ءتۇسسىن دەيمىز.