مەملەكەت باسشىسى قاسىم-جومارت توقاەۆتىڭ 27 ءساۋىر كۇنگى قازاقستانداعى كارانتيندى 11 مامىرعا دەيىن ۇزارتۋ جونىندە قابىلداعان شەشىمى جايلى ەستىپ, ءوزىمنىڭ بۇل شاراعا تولىق قوسىلاتىنىمدى ايتقىم كەلەدى. قاراپ وتىرساڭىز, جان-جاقتاعى الەم ەلدەرى تۇگەل وسى شەشىمگە بەيىل بەرىپ وتىر. ەۋروپا, تمد ەلدەرىنىڭ كوپشىلىگى كارانتين مەرزىمىن مامىردىڭ ورتاسىنا دەيىن, كەيبىرى ءتىپتى مامىردىڭ سوڭىنا دەيىن ۇزارتاتىنىن جاريالادى.
ءبىز ەل باسقارىپ وتىرعان ازاماتتارعا سەنىم ءبىلدىرىپ, ولاردىڭ قابىلداعان بۇل شەشىمىن ءبىراۋىزدان قولداۋعا ءتيىسپىز. سەبەبى شىبىقتى ءبىر-بىرلەپ سىندىرۋ وڭاي بولعانمەن, ءبىر ۋىس ەتىپ جيناپ سىندىرماق بولساڭىز, دەگەنىڭە كونبەيدى ەمەس پە. بىرلىك بار جەردە عانا كۇش بولادى. جان-جاققا تۋ-تالاقاي تارتقىلاعان ىستە بەرەكە بولمايتىنى سياقتى, بۇل ىندەتتى دە تەك بىراۋىزدىلىقپەن جانە تاباندىلىقپەن عانا ەڭسەرەمىز.
قاسىم-جومارت كەمەل ۇلى ايتىپ وتىرعانداي, ءبىزدىڭ ەل – ءوز باسىنان نەبىر ءناۋباتتاردى وتكەرگەن ەل. كەي جىلدارى قاتارى ميلليونداپ سيرەسە دە, ەش قيىنشىلىققا مويىماعان, سىن ساعاتتارىندا تىڭ كۇشكە يە بولىپ, ءوزىنىڭ بىرلىك پەن ىنتىماققا قۇشتارلىعى ارقاسىندا قانداي دا ءبىر وتكەلدەردەن امان وتكەن قايراتتى حالىقپىز. بۇگىن بۇكىل الەم باستان وتكەرىپ وتىرعان قيىن كەزەڭ – «كوپپەن كورگەن ۇلى توي» دەيتىن ءپالساپاشى قازاق ءۇشىن دە وڭايعا ءتۇسىپ وتىرماعانى انىق. جۇمىس توقتاپ, بۇكىل ادامزات ءبىر ساتكە اڭتارىلىپ قالدى. اركىم ءوزىنىڭ وتباسىنىڭ, بالا-شاعاسىنىڭ ەرتەڭىن ويلاپ الاڭداۋلى. بىراق سەن جالعىز ەمەسسىڭ. ء«بىز بىرگەمىز! بەرىك ىرگەمىز!» دەگەن ۇران جالاڭ ءسوز ەمەس. بارلىعىمىز ءبىر كەمەدە كەلە جاتىرمىز, سوندىقتان سابىر شاقىرىپ, كىشكەنە شىدام تانىتايىق,
بۇل سىن ساعاتىندا مەملەكەتىمىزدىڭ باسشىلارى, ساياساتكەرلەرىمىز, باسقا دا ازاماتتار جۇمىلا وتىرىپ جان-تانىمەن قارەكەتتەنۋى بۇكىل ەل بولىپ بىرىگۋىمىز – ءبىزدى بار قيىنشىلىقتان الىپ شىعادى. ءبىز ەل باسشىلارىنا ءسوزسىز سەنۋىمىز كەرەك جانە ولار قابىلداعان ءار شەشىمدى قولداي وتىرىپ, ءوز تاراپىمىزدان قاجەتتى ءىس-قيمىلدار جاساپ, وقشاۋلانۋ ءتارتىبى قاعيدالارىن بۇزباي, ءوز تاراپىمىزدان كومەگىمىزدى كورسەتۋىمىز كەرەك.
بيىل مەنىڭ جاسىم 85-كە تولعالى وتىر. قازاقتىڭ باسىنان وتكەن نەبىر تاريحي وقيعالارعا مەن ءوز كوزىممەن كۋا بولدىم. جاقسىلىقتى دا, جاماندىقتى دا قاتار كوردىم. ءبىر تۇيگەنىم – ءبىر جاعادان باس, ءبىر جەڭنەن قول شىعارعاندا عانا جەڭىس كەلەدى. سوندا عانا جاعداي وڭالادى. باسىمىز امان, باۋىرىمىز ءبۇتىن بولسىن. امان بولايىق, اينالايىندار!
نۇكەتاي مىشباەۆا,
قازاقستاننىڭ حالىق ءارتىسى
الماتى