كوروناۆيرۋس پاندەمياسىنا بايلانىستى تاۋ-كەن ءوندىرۋ جانە مەتاللۋرگيالىق كاسىپورىندار قاۋىمداستىعى جاڭا ەكولوگيالىق كودەكستىڭ جوباسىن قاراستىرۋ مەرزىمىن ءبىر جىلعا كەيىنگە شەگەرۋ تۋرالى ۇسىنىس تاستاعانى بەلگىلى. بىراق ەكولوگ-ماماندار ەكوكودەك رەفورمالارىن كەيىنگە قالدىرۋعا بولمايتىنىن ايتىپ, دابىل قاقتى.
ەكولوگيا ۆيتسە-ءمينيسترى ا.پىرىمقۇلوۆتىڭ ويىنشا, جاڭا ەكولوگيالىق كودەكستىڭ جوباسىن قاراستىرۋ مەرزىمىن ءبىر جىلعا كەيىنگە شەگەرۋ ەلىمىزدىڭ بىرقاتار وڭىرلەرىندەگى جاعىمسىز ەكولوگيالىق جاعدايدىڭ ساقتالۋىنا الىپ كەلەدى. «اپتا ىشىندەگى ستاتيستيكانى الىپ قارايىقشى: «ارسەلورداعى» اپات», «تەڭىزدەگى» اپات... ال ءبىر نەمەسە ءۇش جىل ىشىندەگى ستاتيستيكانى الىپ قاراساق, اپاتتار مەن ەكولوگيالىق زاڭنامانى بۇزۋشىلىقتى كوپتەپ كەلتىرۋگە بولادى. ال جاڭا كودەكس ولاردىڭ الدىن الۋعا ىقپال ەتەدى» دەيدى ول.
ۆيتسە-مينيستر كودەكس جوباسىنىڭ 2018 جىلدىڭ ورتاسىنان باستاپ بيزنەس وكىلدەرىمەن بىرگە تالقىلانعانىن, قۇجاتتا وندىرىستىك كاسىپورىنداردىڭ قولجەتىمدى تەحنولوگيالارعا اۋىسۋىنىڭ ءتيىمدى مەرزىمدەرى كوزدەلگەنىن ايتتى. كودەكستىڭ جوباسى بويىنشا بيزنەس ءۇشىن العاشقى ناقتى شارالار 2025 جىلدان باستاپ كۇشىنە ەنۋگە ءتيىس-ءتىن.
«جەتىك قولجەتىمدى تەحنولوگيالارعا كوشۋ- تەمىرتاۋ, بالقاش, وسكەمەن, قاراعاندى سياقتى قالالارداعى ەكولوگيالىق جاعدايدى جاقسارتۋدىڭ جالعىز مۇمكىندىگى. وزگە شارالار مەن تەتىكتەردى كورىپ وتىرعان جوقپىز. تاۋ-كەن مەتاللۋرگيالىق كەشەنىن الىپ قاراساق, 2008 جىلداعى داعدارىستان كەيىنگى جاعدايمەن سالىستىرعاندا قازىر مەتالدارعا دەگەن باعا 40 پايىزعا جوعارى. سوندىقتان پاندەمياعا بولا, ەكوكودەكستى كەيىنگە قالدىرۋ دۇرىس شەشىم ەمەس. ول - ەلىمىزدىڭ ەكولوگياسى ءۇشىن وتە ءتيىمدى قۇجات»,- دەپ پايىمدايدى ا.پىرىمقۇلوۆ.
ۋاكىلەتتى ورگاننىڭ ۇستانىمىن «EcoJer» وڭىرلىك ەكولوگيالىق باستامالار قاۋىمداستىعى, قازاقستاننىڭ ەكولوگيالىق ۇيىمدارىنىڭ قاۋىمداستىعى, تابيعاتتى پايدالانۋشىلار قاۋىمداستىعى, ەلىمىزدىڭ تاۋەلسىز ەكولوگتارى دا قولدادى.
اتاپ ايتساق, قاراعاندى وبلىستىق ەكولوگيالىق مۋزەيىنىڭ وكىلى دميتري كالمىكوۆ جاعىمسىز ەكولوگيانىڭ سالدارىنان الەمدە 4 ميلليونعا جۋىق ادام كوز جۋماتىنىن العا تارتتى. ال قازاقستاننىڭ ەكولوگيالىق ۇيىمدارى قاۋىمداستىعىنىڭ جەتەكشىسى ايگۇل سولوۆەۆا پاندەميا جاعدايىندا ناشار ەكولوگيادان زارداپ شەگىپ جاتقان ازاماتتاردىڭ دەنساۋلىعى ەرەكشە نازارعا الىنۋ قاجەتتىگىن جەتكىزدى.
مينيسترلىك كاسىپكەرلەردىڭ ۇسىنىستارىن قاراستىرۋعا جانە قاجەت بولعان جاعدايدا ولاردى جوباعا ەنگىزۋگە دايىن ەكەنىن ايتتى.
قىمبات توقتامۇرات