بۇگىنگى جامبىل وبلىسىندا «جولبارىسقامال» دەيتىن جەر ەكى بىردەي اۋداننىڭ اۋماعىندا كەزدەسەدى. جۋالى اۋدانى, قوشقاراتا اۋىلىنىڭ ماڭىندا «ۇشقاسپا» دەيتىن جەر بار. بىلەتىندەر, بۇل جەردىڭ ەرتەدەن وسىلاي اتالاتىنىن ايتادى. بۇل بورالداي مەن ۇزىنبۇلاقتىڭ قوسىلعان جەرىندەگى الاپ.
ەل اۋزىندا جولبارىس حاننىڭ كەزىندە وسى الاپتى جايلاعانى ءجيى ايتىلادى. سوندىقتان دا كوپشىلىك بۇل اتاۋدىڭ كەيىننەن وزگەرىپ, «جولبارىسقامال» اتانىپ كەتكەن دەگەن بايلامعا توقتايدى. ياعني, كوپشىلىك بۇل جەر جولبارىس حاننىڭ ورداسى بولعان دەگەن بولجامدى دۇرىس كورەدى. ال جولبارىس حان بۇل جەرگە قالاي, نە سەبەپتى كەلدى دەگەن ساۋالعا كەلسەك, كوپتەگەن دەرەكتە جاۋگەرشىلىك زاماندا ول تولە بيمەن بىرگە كەلىپ, وسى القاپتى جايلاعان دەگەن دەرەكتەردى كەزدەستىرەمىز.
«جولبارىسقامال» دەگەن جەر تالاس اۋدانىندا دا بار. بۇل قامال تالاستىڭ سارىسۋ اۋدانىنا قاراي بارار جولىنداعى ەسەيحان اۋىلىنىڭ ماڭىندا ورنالاسقان. ەسەيحان تۇرعىندارى كۇنى كەشەگە دەيىن اۋىل ماڭىندا جولبارىستاردىڭ بولعانىن ايتادى. ەل اۋزىنداعى اڭىز بويىنشا, ەرتە زاماندا تالاستاعى ەلگە اتاقتى ەسكەندىر زۇلقارنايىن سوعىس سالىپ كەلىپتى دەسەدى. جەرگىلىكتى جۇرتشىلىق جاۋعا قارسى سەس كورسەتىپ, تاباندىلىق تانىتادى. ءبىر سوزبەن ايتقاندا, ايگىلى قولباسشىنىڭ ەلدى الۋى قيىنعا سوعىپتى. سوندا زۇلقارنايىننىڭ كەڭەسشىلەرى «بۇل ەلدىڭ تاۋىندا ەكى قىزىل جولبارىس بار. سولاردى ۇستاساق بولدى, وزدەرىن باعىندىرۋ وڭاي. ولاردىڭ يەسى – سول جولبارىستار ەكەن», دەپتى. ءسويتىپ ءاپ-ساتتە ەسكەندىر زۇلقارنايىن الگى جولبارىستاردى ۇستاۋعا جارلىق بەرىپتى. بىراق قاراتاۋدىڭ قاتپار-قاتپار قۇپيالارىنان جولبارىستاردى ۇستاۋ مۇمكىن بولمايدى. بىراق تالاي ۋاقىت ارپالىسسا دا بۇل ارەكەتتەن ەشتەڭە شىقپايدى. اقىرى بۇل شارۋانىڭ بولمايتىنىنا كوزى جەتكەن زۇلقارنايىن كەرى قايتادى. جولبارىستار سول قامالعان جەرىندە قالا بەرىپتى. ارينە بۇل اڭىز. عاسىرلار بويى ەل اۋزىندا ساقتالعان جادىگەر. الايدا كۇنى بۇگىنگە دەيىن جەرگىلىكتى حالىق بۇل جەردىڭ «جولبارىسقامال» اتالىپ كەتكەنىن وسى اڭىزبەن بايلانىستىرادى. سول سياقتى بۇل جەردىڭ جولبارىس حاننىڭ ورداسى بولعان, بولماسا اڭشىلار ازۋلى اڭداردى قاماپ ۇستايتىن جەرى بولعان دەگەن دە بولجامدار جەتەرلىك.
جامبىل وبلىسى