كەشە ارقالىق قالاسىندا 84 جاستاعى اجەي كوز جۇمدى. ارتىنشا الەۋمەتتىك جەلىلەردە كەيۋانانىڭ قازاسىنا بايلانىستى سان-ساققا جۇگىرتكەن ءار ءتۇرلى اڭگىمە كوبەيىپ كەتتى.
ويتكەنى العاش وڭىرلىك جەدەل اقپارات شتابى زەينەتكەردىڭ ىندەتتەن كوز جۇمعانىن مالىمدەپ: «20 ءساۋىر كۇنى قان قىسىمى كوتەرىلىپ كەتكەن سوڭ, زەينەتكەر ۇيىنە دارىگەر شاقىرتقان. ۋچاسكەلىك دارىگەر كەيۋانانىڭ تىنىس الۋى اۋىرلاپ, وكپەسى قابىنعانىن انىقتاپ پنەۆمونيا دەگەن دياگنوز قويادى. الايدا زەينەتكەردىڭ ۇلى اناسىن اۋرۋحاناعا جاتقىزۋدان باس تارتقان. 25 ءساۋىر كۇنى ناۋقاستان الىنعان تالداۋ قورىتىندىسى شىعىپ, COVID-19 دياگنوزى انىقتالادى. سول كۇنى زەينەتكەر ۇيىندە جاتىپ كوز جۇمادى. ناۋقاسپەن بايلانىستا بولعاندار انىقتالىپ جاتىر» - دەگەن رەسمي اقپارات تاراتقان.
ارتىنشا جەدەل شتاب بۇل اقپاراتتىڭ جاڭساق بولۋى مۇمكىن ەكەنىن, زەينەتكەر قازاسىنىڭ سەبەبىن تۇبەگەيلى انىقتاۋ ءۇشىن ارنايى كوميسسيا قۇرىلعانىن حابارلادى.
حابارلامادا: «قر دەنساۋلىق ساقتاۋ ءمينيسترىنىڭ تاپسىرماسى بويىنشا قازاقستاننىڭ بارلىق وڭىرىندە دەنساۋلىق ساقتاۋ باسقارمالارى جانىنان كوروناۆيرۋستى جۇقتىرعان ناۋقاستاردىڭ ءولىم جاعدايىن زەرتتەۋ جونىندەگى كوميسسيالار قۇرىلدى.
كوميسسيا ناۋقاس ءولىمىنىڭ تىكەلەي سەبەپتەرىن انىقتاۋ ءۇشىن مەديتسينالىق قۇجاتتاماعا تالداۋ جۇرگىزەدى.
ارقالىقتا ۇيىندە قايتىس بولعان 84 جاستاعى ناۋقاسقا قاتىستى تالداۋ جۇمىستارى 27.04.2020 ج. جۇرگىزىلەدى.
كوميسسيا جۇمىسىنىڭ قورىتىندىسى بويىنشا ناۋقاس ءولىمىنىڭ تىكەلەي سەبەبى انىقتالادى.
بۇگىندە ناۋقاس تۋرالى بارلىق قاجەتتى مەديتسينالىق قۇجاتتار ارقالىق قالالىق ەمحاناسىنان جانە وبلىستىق جەدەل جاردەم قىزمەتىنەن سۇراتىلعان. تالداۋ ناتيجەلەرى كەيىنىرەك قوسىمشا جاريالانادى» دەپ جازىلعان.
قوستاناي وبلىسى