شىعىس قازاقستان: كوكپەكتى اۋدانىندا زالالسىزداندىرۋ جۇمىستارى جۇيەلى تۇردە جۇرگىزىلۋدە

كوكپەكتىدە كوشەلەر مەن كوپشىلىك باراتىن ورىندار جاپپاي تازالانىپ جاتىر. ىندەتتىڭ تارالماۋىنا جول بەرمەۋدىڭ بىردەن-ءبىر جولى – زالالسىزداندىرۋ. قازىرگى تاڭدا بۇل ءىس كوكپەكتى اۋدانىندا جۇيەلى اتقارىلۋدا. اۋدان ورتالىعى مەن حالىق كوپ شوعىرلانعان سامار اۋىلىندا اۋقىمدى جۇمىس ۇيىمداستىرىلدى.

«زالالسىزداندىرۋ جۇمىستارىنا قاجەتتى گيپوحلوريت كالتسي ەرىتىندىسى وبلىس ورتالىعى وسكەمەن قالاسىنىڭ «تيتان-ماگني كومبيناتىنان» جەتكىزىلدى. بۇگىنگى كۇنى اۋداندا دەزينفەكتسيالىق ەرىتىندىگە قاجەتتى 5 توننا قور بار. ءاربىر اۋىلدىق وكرۋگتەرگە دە قاجەتتىلىگىنە قاراي تاراتىلعان. قوعامدىق ورىنداردى زالالسىزداندىرۋ جۇمىستارىنا ارنايى جابدىقتالعان «Hubei Dalu» تەحنيكاسى تارتىلىپ وتىر. سىيىمدىلىعى 4 توننا تەحنيكانىڭ  گيپوحلوريت كالتسي قوسپاسىن 5-7 مەتر اۋماققا شاشۋ مۇمكىندىگى بار» دەيدى كوكپەكتى اۋدانىنىڭ باس سانيتارلىق دارىگەرى گۇلميرا ابدراسۋلوۆا. ونىڭ ايتۋىنشا, گيپوحلوريت كالتسي قوسپاسى ينفەكتسيالىق اۋرۋلارعا قارسى باكتەريتسيتتىق قۇرال رەتىندە قولدانىلادى. تۇرعىندار ءۇشىن قاۋىپسىز. بارلىق شارالار 2 ناۋرىز كۇنى جارىق كورگەن دەنساۋلىق ساقتاۋ دەپارتامەنتىنىڭ نۇسقاۋلىعى نەگىزىندە اتقارىلۋدا.

بۇل جۇمىس ەلىمىزدە توتەنشە جاعداي جاريالانعان ساتتەن باستاپ تولاسسىز جۇرگىزىلىپ كەلەدى.

شىعىس قازاقستان وبلىسى,

كوكپەكتى اۋدانى