بۇل تۋرالى اۋىل شارۋاشىلىعى ءبىرىنشى ۆيتسە-مينيسترى ايداربەك ساپاروۆ ورتالىق كوممۋنيكاتسيالار قىزمەتىندە وتكەن ونلاين بريفينگتە ايتتى.
«كوكتەمگى ەگىس جۇمىستارىن قارجىلاندىرۋ باستى سۇراقتاردىڭ ءبىرى. ەلباسىنىڭ تاپسىرماسى بويىنشا وسى باعىتتارعا قوسىمشا 100 ملرد تەڭگە ءبولىندى. جالپى فەرمەلەردىڭ اقشا قاراجاتتارىنا قول جەتىمدىلىگىن قامتاماسىز ەتۋ ءۇشىن ارزانداتىلعان سىياقى بويىنشا قارجىلاندىرۋ جانە فەرمەرلەردىڭ ونىمدەرىن فورۆاردتىق ساتىپ الۋ سياقتى قۇرالدار قاراستىرىلعان», دەدى ۆيتسە-مينيستر.
ونىڭ ايتۋىنشا, كوكتەمگى دالا جۇمىستارىن قارجىلاندىرۋعا ارنالعان بيۋدجەت قاراجاتىنىڭ كولەمى 10 ملرد تەڭگەگە ۇلعايتىلدى. جالپى قاراجات كولەمى – 70 ملرد تەڭگە, نەسيە بويىنشا پايىزدىق مولشەرلەمە 7%-دان 5%-عا دەيىن تومەندەتىلدى.
1 شارۋاعا ارنالعان ورتاشا چەك 29,6 ملن تەڭگەنى قۇرادى. شارۋالار ۇسىناتىن قۇجاتتار تىزبەسى قىسقارتىلدى. زاڭدى تۇلعالار ءۇشىن 27-دەن 13-كە دەيىن, شارۋا قوجالىقتارى مەن جەكە كاسىپكەرلەر ءۇشىن 16-دان 12-گە دەيىن قۇجاتتار تىزبەسى ازايدى. «كەڭ دالا» نەسيەلەندىرۋ باعدارلاماسى بويىنشا جەڭىلدەتىلگەن نەسيەمەن 2346 اگروونەركاسىپ سۋبەكتىسىنە قولداۋ كورسەتىلدى. قولداۋمەن قامتىلعان جالپى ەگىستىك القاپ 3 ميلليون 50 مىڭ گەكتاردى قۇرادى.