الماتىدا ءمودۋلدى جۇقپالى اۋرۋلار اۋرۋحاناسى اشىلدى

اۋرۋحانانى ارالاپ شىققان قالا اكىمى كەشەننىڭ ساپاسى مەن مەديتسينالىق جابدىقتارمەن جاراقتاندىرىلۋىنا جوعارى باعا بەردى. سونداي-اق شاھار باسشىسى كەشەندى قىسقا مەرزىمنىڭ ىشىندە سالىپ بىتكەن قۇرىلىسشىلارعا العىسىن ءبىلدىردى.

جاڭا جۇقپالى اۋرۋلار كەشەنى ۋاقىتشا عيمارات بولعانىنا قاراماستان, وسىنداي مەكەمەلەرگە قويىلاتىن حالىقارالىق تالاپتارعا جاۋاپ بەرەدى.

«بۇگىن ءبىزدىڭ دارىگەرلەر مەن بارلىق مەديتسينالىق قىزمەتكەرلەر ۇيقىسىز ءارى دەمالىسسىز كوروناۆيرۋستىق ينفەكتسيامەن كۇرەسۋدە. وزدەرىن اياماي, ءبىزدى قورعاۋدا. ءبىزدىڭ مىندەتىمىز – ولاردىڭ جۇمىسىنا بارلىق جاعدايدى جاساۋ. جاڭا كەشەن جۇقپالى ورىنداردىڭ جەتكىلىكتى قورىن قۇرۋعا مۇمكىندىك بەرەدى. بۇل قالاداعى ەپيدەميولوگيالىق جاعدايدى تۇراقتاندىرۋعا ىقپال ەتەدى», – دەدى باقىتجان ساعىنتاەۆ.

جۇقپالى اۋرۋلار اۋرۋحاناسى 280 ادامعا ەسەپتەلگەن. ىشىندە 9 كلينيكالىق بولىمشە, 28 توسەككە ارنالعان رەانيماتسيا بولىمشەسى, ءبىر كىسىلىك جانە دالاعا بولەك شىعۋعا بولاتىن 10 پالاتا, ديناميكالىق باقىلاۋدا بولاتىن بەس ءبىر كىسىلىك پالاتالارى بار قابىلداۋ ءبولىمى ورنالاسقان.

ءمودۋلدى كەشەندە پەرسونالعا ارنالعان ءۇي-جاي قاراستىرىلعان. زەرتحاناعا ارنالعان ءتورت ءۇي-جاي, كت, رەنتگەن, ەندوسكوپيالىق جابدىقتار, ۋدز جانە ەلەكتروكارديوگراف ورناتۋعا ارنالعان جەكە ءۇي-جايلار بار.

شتاتتا 75 دارىگەر, 100 مەدبيكە جانە كىشى مەديتسينالىق قىزمەتكەرلەر بار. مەكەمەنىڭ بارلىق قىزمەتكەرلەرى «اتاكەنت پارك وتەل» قوناق ۇيىنە ورنالاستىرىلدى. قىزمەتكەرلەر تاڭەرتەڭ جانە كەشكى ۋاقىتتا تەگىن تاسىمالدانادى.

اۋرۋحانا زاماناۋي مەديتسينالىق جابدىقتارمەن جابدىقتالعان. رەانيماتسيا بولىمىنە 28 ءوجج اپپاراتى قويىلدى. سونداي-اق, اۋرۋحانادا كومپيۋتەرلى توموگراف, قان گازى مەن ەلەكتروليتتەر, مەتابوليتتەر اناليزاتورى, ەلەكتروكارديوگراف, مونيتورلار, پەرفۋزورلار, جەدەل دياليز جۇيەسى, مەديتسينالىق دياگنوستيكالىق رەنتگەن جۇيەسىنىڭ كەرەك-جاراقتارى, ۋلترادىبىستىق زەرتتەۋگە ارنالعان اپپاراتتار, باكتەريتسيدتى شامدار سياقتى جابدىقتار ورنالاستىرىلدى. بۇدان وزگە ءموبيلدى رەنتگەن اپپاراتى, زەرتحاناعا ارنالعان جابدىقتار دا بار.

ءمودۋلدى كەشەن ءوزارا گالەرەيا ارقىلى بايلانىسقان ءبىر قاباتتى ەكى جانە ەكى قاباتتى ءتورت كورپۋستان تۇرادى. ينجەنەرلىك كوممۋنيكاتسيالار جۇيەسى بويىنشا دا, اتاپ ايتقاندا جەلدەتكىش پەن كونديتسيونەر ورناتۋ, سۋمەن جابدىقتاۋ جانە كارىز جۇيەسىن جۇرگىزۋ, ەلەكترلى جىلىتۋمەن جابدىقتاۋ جۇمىستارى اياقتالدى.

شارۋاشىلىق-تۇرمىستىق سۋ اعىنى ارنايى جيناعىش ىدىسقا قۇيىلىپ, جينالادى. ءورت دابىلى جانە بەينەباقىلاۋ جۇيەسىمەن دە قامتاماسىز ەتىلدى. ترانسفورماتورلىق قوسالقى ستانسانى ورناتۋ قاراستىرىلعان.

ەمحاناعا كىرۋ مەن شىعۋ ءۇش كىرۋ ايماقتارى ارقىلى جۇزەگە اسىرىلادى. مەكەمە سىرتىندا جانە ىشكى ايماقتا كولىك قويۋعا ارنالعان ورىندار بار. سونداي-اق, اۋرۋحانا اۋماعىندا كولىكتى وڭدەۋگە ارنالعان الاڭ, بىرقاتار تەحنيكالىق قۇرىلىستار قاراستىرىلعان.