بۇگىن ءوڭىر فەرمەرلەرى «دارىگەرلەرگە – شارۋاگەرلەردەن» قايىرىمدىلىق اكتسياسىن باستادى.
«قازاقستان فەرمەرلەر وداعى» قوعامدىق بىرلەستىگى اتىراۋ وبلىستىق فيليالىنىڭ توراعاسى مۇرات سارمانوۆتىڭ مالىمەتىنە سۇيەنسەك, اكتسيانىڭ باستى ماقساتى – اق حالاتتى ابزال جانداردى تابيعي تازا ونىممەن قامتۋ, قولداۋ كورسەتىپ, دەمەۋ بولۋ. وسى ماقساتتى كوزدەگەن ءوڭىر فەرمەرلەرى اتالعان اكتسياعا بەلسەندىلىكمەن قاتىسۋدا.
– ماسەلەن, «قۇرمانعازى» وندىرىستىك كووپەراتيۆىنىڭ توراعاسى, وبلىستىق ءماسليحاتتىڭ دەپۋتاتى سابىرجان سۇلتانوۆ 1 ميلليون تەڭگەگە باعالانعان 15 قويدىڭ ەتىن جىبەردى. ونى ءار اۋرۋحانادا جۇمىس ىستەيتىن, سونداي-اق, وقشاۋلانعان مەديتسينا قىزمەتكەرلەرىنە بەرىپ جاتىرمىز, -دەيدى مۇرات سارمانوۆ. –جىلىوي اۋدانىنىڭ شارۋاگەرلەرى 175 ليتر شۇبات پەن 67 ليتر قايماق, 1,5 توننا كوكونىس, دارىمەنى مول جەمىس ونىمدەرىن ۇسىندى. فەرمەرلەر تاراپىنان ۇيىمداستىرىلعان كومەكتىڭ العاشقى لەگى اتىراۋ قالاسىنداعى بارلىق مەديتسينا ۇجىمىنا, سونداي-اق, كارانتينگە وقشاۋلانعان مەديتسينا قىزمەتكەرلەرىنە, سابيلەر ۇيىنە جەتكىزىلدى. ءونىمنىڭ ءبارى – تابيعي. بۇل قازىرگى قيىن شاقتا اق حالاتتىلارعا قۋات بەرەدى دەپ سەنەمىز.
ونىڭ ايتۋىنشا, «دارىگەرلەرگە –شارۋاگەرلەردەن» قايىرىمدىلىق اكتسياسى كارانتين اياقتالعانعا دەيىن جالعاسادى. فەرمەرلەر اپتا سايىن مەديتسينا قىزمەتكەرلەرىن تابيعي ءارى تازا ونىمدەرمەن قامتاماسىز ەتۋدى كوزدەپ وتىر.