وبلىس اكىمى ماحامبەت دوسمۇحامبەتوۆ سىبايلاس جەمقورلىقپەن كۇرەس ماسەلەسىنە ارنالعان سەلەكتورلىق كەڭەس وتكىزىپ, توتەنشە جاعدايعا بايلانىستى كۇشەيتىلگەن كارانتين ەنگىزىلگەنمەن, سىبايلاس جەمقورلىقپەن كۇرەس ماسەلەسى كۇن تارتىبىنەن تۇسپەيتىنىن اتاپ ءوتتى.
– ويتكەنى, مەملەكەت باسشىسى ۇلتتىق قاۋىپسىزدىك پەن ەلدىڭ بولاشاعىنا نۇقسان كەلتىرەتىن سىبايلاس جەمقورلىقپەن كۇرەسكە ءبىر ادامداي جۇمىلۋعا شاقىردى. سوندىقتان وتاندىق ەكونوميكا ءۇشىن, قوعامنىڭ ءار سالاسى ءۇشىن ەڭ قاۋىپتى كەسەل – سىبايلاس جەمقورلىقتىڭ تامىر جايۋىنا جول بەرمەۋىمىز كەرەك, - دەدى وبلىس اكىمى ماحامبەت دوسمۇحامبەتوۆ.
سىبايلاس جەمقورلىققا قارسى ءىس-قيمىل اگەنتتىگىنىڭ اتىراۋ وبلىسى بويىنشا دەپارتامەنتى باسشىسىنىڭ مىندەتىن اتقارۋشى قانات قوجاحمەتوۆ Antikor.Live. جوباسى اياسىندا سىبايلاس جەمقورلىققا قارسى كونتەنتتى ونلاين فورماتتا تاراتىپ جاتقانىنا توقتالدى.
– بيىلعى جىل باسىنان بەرى وبلىستا پارا الۋعا, بيۋدجەت قاراجاتىن جىمقىرۋعا, سونداي-اق, وكىلەتتىگىن تەرىس پايدالانۋعا بايلانىستى 40-تان استام سىبايلاس جەمقورلىق قىلمىسى انىقتالدى. لاۋازىمدى قىزمەت اتقاراتىن 15 تۇلعا قىلمىستىق جاۋاپكەرشىلىككە تارتىلدى. سىبايلاس جەمقورلىقتىڭ جوعارى دەڭگەيى دەنساۋلىق ساقتاۋ جانە مەملەكەتتىك ساتىپ الۋ سالالارىندا بايقالادى, - دەدى قانات قوجاحمەتوۆ.
ونىڭ ايتۋىنشا, بىلتىرعا قاراشادا سىبايلاس جەمقورلىققا قارسى زاڭناماعا ەنگىزىلگەن تۇزەتۋلەر ەنگىزىلدى. سونىڭ ءبىرى – باعىنىشتى قىزمەتكەرلەرى اراسىندا سىبايلاس جەمقورلىق فاكتىسى انىقتالسا, باسشىلىق لاۋازىمداعى مەملەكەتتىك قىزمەتشىلەردىڭ تارتىپتىك جاۋاپكەرشىلىگى مەن ساياسي قىزمەتشىلەردىڭ قىزمەتىنەن كەتۋ تەتىگى.
– سىبايلاس جەمقورلىقتىڭ الدىن الۋ, تارالۋ جولدارىن كەسۋ, ونىڭ ورشۋىنە جول بەرمەۋ باعىتىنداعى كۇرەستى كۇشەيتۋىمىز كەرەك, - دەدى سەلەكتورلىق كەڭەستى قورىتىندىلاعان وبلىس اكىمى ماحامبەت دوسمۇحامبەتوۆ.