ەرلىك ەشقاشان ۇمىتىلمايدى

1920 جىلى ومبى وبلىسىندا تۋعان مىرزابولات شايمەنوۆ 16 جاسىندا قازىرگى ءبىرجان سال  اۋدانىنا كوشىپ كەلگەن. 7 سىنىپتىق بىلىممەن پەدۋچيليششەنى تامامداعان. ارحيۆ بەتتەرىنەن تابىلعان دەرەكتەرگە سۇيەنسەك, ول 1941-1944 جىلدار ارالىعىندا پريبالتيكا مايدانىنىڭ  52-ءشى قۇپيا گۆاردياسىنىڭ اتقىشتار ديۆيزياسىندا بارلاۋشى بولعان.

– قاي جەردە سوعىسقانى, سوعىستا قانداي جاعداي بولعانى تۋرالى ءتىس جارىپ ايتقان ەمەس. بار قۇپيانى وزىمەن بىرگە الا كەتتى. 2017 جىلى اس بەرەمىز دەپ قامدانعاندا, جيەنىمىز «پودۆيگ نارودا» دەپ اتالاتىن سايتتا دەرەكتەر بولداتىندىعى تۋرالى ەستىپتى. اقتارىپ كورسەك, اكە ەرلىگى تايعا تاڭبا باسقانداي جازۋلى تۇر, – دەيدى ارداگەردىڭ قىزى ايگۇل شامشۋاليەۆا.

ارحيۆتەگى دەرەكتەر بويىنشا قان مايداندا قايسارلىق پەن باتىلدىق كورسەتكەن مىرزابولات شايمەنوۆ ەكى مارتە «ەرلىگى ءۇشىن» مەدالىمەن, 2-ءشى جانە 3-ءشى دارەجەلى «داڭق» جانە «قىزىل جۇلدىز» وردەندەرىمەن ماراپاتتالعاندىعى بەلگىلى بولىپ وتىر.

باتىردىڭ قىزى ايگۇل ءشامشۋاليۆانىڭ قايىن اتاسى دا مايداندا ەرلىك كورسەتكەن جاۋىنگەرلەردىڭ ءبىرى. 1920 جىلى دۇنيەگە كەلگەن ساباعات شامشۋاليەۆ 1941 جىلى اسكەرگە اتتانعان. 19-شى گۆارديالىق اتقىشتار ديۆيزياسىندا ستارشينا بولعان. 1943 جىلى اۋىر جاراقات العان ساباعات اتامىز ءىز-ءتۇزسىز جوعالعانداردىڭ تىزىمىندە بولعان. كەيىن ونىڭ جارالانىپ, اۋرۋحاناعا تۇسكەنى بەلگىلى بولادى. بۇگىندە ارتىندا قالعان بالالارى «گەرمانيانى جەڭگەنى ءۇشىن», 1-ءشى دارەجەلى «ەرلىگى ءۇشىن» مەدالىمەن, « ۇلى جەڭىستىڭ 40-جىلدىعى» مەدالىمەن ماراپاتتالعانىن ايتىپ, ەسكە الۋدا.

– ءبىرجان سال اۋدانىنىڭ ۇلى جەڭىس ارداگەرلەرىنە ارناپ ورناتىلعان  ەسكەرتكىشىنە ساباعات اتانىڭ ەسىمى جازىلعان. وكىنىشكە وراي, بۇل تاقتاعا اكەمنىڭ اتى ەنگىزىلمەگەن, – دەيدى ايگۇل ءشامشۋاليۆا قامىعىپ.

قاھارمان جاۋىنگەردىڭ ەرلىگى ەندى بەلگىلى بولىپ وتىر. ارادا قانشا جىل وتكەننەن كەيىن. ەرلىگى ەشقاشان ۇمىتىلمايدى دەيتىنى وسىندايدان-اۋ, ءسىرا.

ءبىرجان سال اۋدانى,

اقمولا وبلىسى.