الماتى وبلىسىنىڭ ەڭبەكشىقازاق اۋدانىندا ورنالاسقان «جەتىسۋ ۆولفرامى» سەرىكتەستىگىنىڭ قۇرىلعانىنا كوپ ۋاقىت بولعان جوق. كەن ءوندىرۋدى قولعا العان جوباعا 250 ملن اقش دوللارى شاماسىندا ينۆەستيتسيا تارتىلعان. قازىر ءتورت جۇزگە جۋىق ادامدى جۇمىسپەن قامتىپ وتىر.
كومپانيانىڭ الەۋمەتتىك جاۋاپكەرشىلىگى دە جوعارى. قايىرىمدىلىق شاراسىنا ءجيى قاتىسىپ ءجۇر.جۇقپالى ىندەت حابارى شىققالى بەرى سەرىكتەستىك تۇرعىنداردى قولداۋعا بەلسەنە كىرىستى. ماسەلەن, سوڭعى ايلاردا مەديتسينالىق ماسكامەن قامتۋ ءىسىن قولعا العان. بۇعان دەيىن كوروناۆيرۋسپەن كۇرەس شارالارى ءۇشىن قازاقستانعا جالپى سانى 220 مىڭ دانادان استام ءبىر رەتتىك پايدالاناتىن مەديتسينالىق ماسكا تەگىن بەرىلدى. ال كەشە «جەتىسۋ ۆولفرامى» قىتايداعى بيزنەس-سەرىكتەستەرىمەن بىرگە گۋمانيتارلىق كومەك رەتىندە الماتى وبلىسىنىڭ اكىمدىگىنە 60 مىڭ دانا بەتپەردە تاپسىردى.
«جەتىسۋ ۆولفرامى» جشس اتقارۋشى ديرەكتورى نازار تەرلىگا مەديتسينالىق ماسكانى جەتكىزۋ قازاقستان رەسپۋبليكاسىنىڭ سىرتقى ىستەر جانە دەنساۋلىق ساقتاۋ مينيسترلىكتەرىنىڭ, سول سياقتى قىزىل جارتى اي قوعامىنىڭ تىكەلەي قولداۋىمەن جۇزەگە اسىرىلعانىن ايتتى:
- كوروناۆيرۋس ينفەكتسياسىنىڭ تارالۋىنا بايلانىستى قازىرگى قيىن جاعدايدا ءبىز الەۋمەتتىك جاۋاپكەرشىلىكتىڭ ەڭ جوعارعى پرينتسيپتەرىن بەرىك ۇستانامىز. «جەتىسۋ ۆولفرامى» جشس ءوزىنىڭ ستراتەگيالىق سەرىكتەستەرىنىڭ ءبىرى «Jiangxi Cooper Corporation» كورپوراتسياسىمەن بىرگە قازاقستاننىڭ قىزىل جارتى اي جەدەل قىزمەتى ارقىلى زور كومەك كورسەتۋدە. گۋمانيتارلىق كومەك كورسەتۋ - جالپى جۇمىسىمىزدىڭ ەڭ ماڭىزدى ءبولىى, - دەيدى «Jiaxin International Resources Investment Co.Ltd» كورپوراتسياسىنىڭ ۆيتسە-پرەزيدەنتى, «جەتىسۋ ۆولفرامى» جشس اتقارۋشى ديرەكتورى نازار تەرلىگا.