«جاۋ جاعادان العاندا ءبورى ەتەكتەن» دەگەندەي, ءۇرجار اۋدانى كوكتال اۋىلىنىڭ تۇرعىندارىنا مىنا جاعداي وڭايعا تيمەي تۇر. اۋىل حالقى توتەننەن كەلگەن ىندەتتىڭ قوراداعى ازىن-اۋلاق ءىرى قاراسىن قىناداي قىرىپ بارا جاتقانىنا الاڭداۋلى.
ء«بىزدىڭ تۇسىنبەي وتىرعانىمىز, ەكى اپتاداي ۋاقىت وتسە دە, اۋىلىمىزدى ءالى كارانتينگە جاپقان جوق. مالىمىز قىرىلىپ جاتىر. قورامىزدا تىگەرگە تۇياق قالماي بارادى. شىنىن ايتساق, اۋىلدا وسى مال ءۇشىن وتىرمىز. ءارى قاراي قالاي ءومىر سۇرەمىز؟» دەيدى كوكتال اۋىلىنىڭ تۇرعىنى ەلەنا تويعانباەۆا.
اۋىل تۇرعىندارىنىڭ ايتۋىنشا, قازىرگى ۋاقىتتا ەلدى مەكەندە توسىن ىندەتتەن ارام قاتقان ءىرى قارا سانى شامامەن 200-دەن اسىپ كەتكەن. ءبىر عانا «مۇحيت» شارۋا قوجالىعىندا 50 بۇزاۋ, 20 ءىرى قارا ىندەتتىڭ قۇربانىنا اينالىپتى. «بۇگىن مىنە, اۋداننان, وبلىستان ماماندار كەلىپ, ولگەن مالداردى ساناپ جاتىر. مىنا ىندەت جانىمىزداعى «ايان» شارۋا قوجالىعىنىڭ مالىنان تارادى. ءبىز بۇل شارۋا قوجالىعىنا نارازىلىق ءبىلدىرىپ, ءتيىستى ورىندارعا حات جازدىق», دەدى ءۇي تەلەفونى ارقىلى سويلەسكەن وسى ەلدى مەكەننىڭ تۇرعىنى نازيگۇل شالعىنباەۆا. بۇل كىسى «مۇحيت» شارۋا قوجالىعىنىڭ جەتەكشىسى سارسەن شالعىنباەۆتىڭ جولداسى ەكەن.
وسى اۋىلدىڭ تاعى ءبىر تۇرعىنىمەن ءۇي تەلەفونى ارقىلى سويلەسكەنىمىزدە بيۋدجەتتىك مەكەمەدە جۇمىس ىستەيتىندىكتەن اتىن اتاماۋىمىزدى ءوتىندى. «اۋىلداعى ۇلكەن كىسىلەر مۇنى اۋسىل ىندەتى دەپ بولجاپ وتىر. كوكتالداعى العاشقى ءىرى قارانىڭ ءولىمى 9 ساۋىردە تىركەلگەن. سودان سوڭ ەكى-ءۇش كۇن وتكەننەن كەيىن اۋداننان ماماندار كەلىپ, سىناما الىپ كەتكەن. ول سىناما مۇزداتقىشتا ساقتالىپ تۇرعان كورىنەدى. ال 21 ساۋىردە بۇزاۋدان سىناما الدى. بۇل سىناما ناتيجەسى قالاي بولار ەكەن دەپ الاڭداپ وتىرمىز. ويتكەنى اۋىل تۇرعىندارى مالدارى ولە باستاعاننان كەيىن ءارتۇرلى دارىلەردى وزدەرى ەككەن بولاتىن», دەيدى اۋىل تۇرعىنى.
ايدىڭ-كۇننىڭ امانىندا بەلگىسىز ىندەتتىڭ مالدارىن جايپاپ بارا جاتقانىنا الاڭداعان اۋىل تۇرعىندارى ەلدى مەكەندى تەز ارادا كارانتينگە جاۋىپ, ولگەن مالدارىنىڭ شىعىنى وتەلۋى كەرەكتىگىن سۇراپ وتىر. ال جەرگىلىكتى ۆەتەرينارلار ولگەن ءىرى قارادان سىنامالار الىنىپ, ءتيىستى ورىندارعا جىبەرىلگەنىن, اۋىلدى كارانتينگە جابۋ-جاپپاۋ ماسەلەسى سىناما قورىتىندىسىنان سوڭ بەلگىلى بولاتىنىن ايتادى.
كوكتال اۋىلىندا ۇيالى تەلەفون بايلانىسى ناشار بولعاندىقتان, وسى ەلدى مەكەندە جۇرگەن كوميسسيا مۇشەلەرىمەن سويلەسۋدىڭ مۇمكىندىگى بولمادى. اۋىلدا قانشا مال بەلگىسىز ىندەتتىڭ قۇربانىنا اينالعانىن, اۋىل تۇرعىندارىنا قىرىلعان ءىرى قاراسى ءۇشىن وتەماقى تولەنىپ-تولەنبەيتىنىن كوميسسيا انىقتايتىن بولادى.
شىعىس قازاقستان وبلىسى,
ءۇرجار اۋدانى,
كوكتال اۋىلى