بۇگىندە كورشى رەسەي ەلىندە 70 مىڭنان استام قازاقستاندىق ستۋدەنت ءبىلىم الۋدا. ياعني ءبىلىم الۋ ماقساتىندا قازاقستاننان شەتەلگە شىققان جاس وتانداستارىمىزدىڭ باسىم بولىگى وسى ەلدە وقيدى دەگەن ءسوز. بۇل جاعداي ارينە ەكى ەل اراسىنداعى دوستىق قارىم-قاتىناستىڭ جوعارى دەڭگەيدە ەكەنىن بىلدىرەتىنى انىق.
كوروناۆيرۋس پاندەمياسىنا بايلانىستى كوپتەگەن ەل قاقپالارىن تارس جاۋىپ, ءارى-بەرى قاتىناۋدىڭ ءبىرشاما قيىنداپ قالعانى راس. وسىنداي قىسىلتاياڭ ساتتە سىرتتا جۇرگەن كەيبىر ستۋدەنتتەرىمىز وتانىنا ورالا الماي قالدى. ارينە ءار قازاقستاندىقتىڭ قاي جەردە بولسا دا ەلىنە قايتىپ ورالۋىنا قۇقى بار. كىمگە كەلۋگە بولاتىنىن, كىمگە كەلۋگە بولمايتىنىن ولار وزدەرى شەشسە كەرەك. بۇل ورايدا قازاقستان ۇكىمەتى ءارتۇرلى ماقساتپەن شەت مەملەكەتتەرگە شىققان ازاماتتارىن ەلگە جەتكىزىپ الۋ ىسىنە جوعارى ءمان بەرىپ وتىر. ونىڭ ىشىندە اسىرەسە شەتەل وقۋ ورىندارىندا ءبىلىم الىپ جاتقان ستۋدەنتتەردىڭ جاعدايىن ءبىر ءسات تە نازاردان تىس قالدىرعان ەمەس. ياعني قازاقستان ءوز ازاماتتارىنىڭ ەلگە ورالۋى ءۇشىن قولدان كەلگەننىڭ ءبارىن جاساۋدا.
مىنە, وسى اپتادا رەسەيدىڭ ماسكەۋ جانە سانكت-پەتەربۋرگ قالالارىنداعى جوعارى وقۋ ورىندارىندا وقيتىن قازاقستاندىق ستۋدەنتتەر ەلگە قايتتى. ناقتىراق ايتساق, 21 ءساۋىر كۇنى تاڭەرتەڭ ماسكەۋدەگى قازاقستان رەسپۋبليكاسىنىڭ ەلشىلىگى عيماراتىنىڭ الدىنان بەس اۆتوبۋس جولعا شىقتى. اۆتوبۋستاردا كوروناۆيرۋس پاندەمياسىنا بايلانىستى رەسەيدەن شىعىپ ۇلگەرمەگەن 250-دەن استام قازاقستاندىق ستۋدەنت بار.
كولىككە مىنەردە ستۋدەنتتەردىڭ بارلىعىنىڭ دەنە قىزۋى ولشەندى. رەسەي فەدەراتسياسى جول قوزعالىسى قاۋىپسىزدىگى مەملەكەتتىك ينسپەكتسياسى جانە قازاقستان ەلشىلىگى قىزمەتكەرلەرىنىڭ باستاۋىمەن بارلىق سانيتارلىق تالاپتار ساقتالا وتىرىپ, اۆتوبۋستار قازاق-رەسەي شەكاراسىنا قاراي بەت الدى. شەكارادان وتكەننەن كەيىن ور جانە الىمبەت وتكىزۋ بەكەتتەرىندە جاستاردى اقتوبە وبلىسى اكىمدىگىنىڭ وكىلدەرى كۇتىپ الادى. تۋعان ەلگە قادام باسقان جاستاردىڭ بارلىعىنان كوروناۆيرۋسقا بايلانىستى تەست الىناتىن بولادى.