توبىل ءوڭىرىنىڭ تەمىر جۇرەگى سانالاتىن رۋدنىي قالاسىندا ورىن تەپكەن «مەديدەز» عىلىمي-وندىرىستىك بىرلەستىگى ءتورت جىلدان بەرى حالىقارالىق ستاندارتتاعى ساپالى دەزينفەكتسيا جانە انتيسەپتيك قۇرالدارىن شىعارىپ كەلەدى. ەل ىشىندە توتەنشە جاعداي جاريالانعالى كومپانيا ونىمىنە سۇرانىس ارتا تۇسكەن. سوندىقتان كاسىپورىن ءوندىرىس كولەمىن ەكى ەسە ارتتىرىپ وتىر.
وسىدان ءبىر-ەكى جىل بۇرىن «قازاقستاننىڭ ۇزدىك تاۋارى» بايقاۋىندا توپ جارىپ, وندىرىستىك ماقساتتاعى ەڭ ۇزدىك تاۋار ءوندىرۋشى دەگەن اتاققا يە بولعان كاسىپورىن بۇگىندە ميكروب جويعىش سابىندار مەن تەرىنى جانە مەديتسينالىق قۇرال-جابدىقتاردى زارارسىزداندىراتىن حيميالىق ءونىم تۇرلەرىن كوپتەپ شىعارا باستادى.
– قازىر دەزينفەكتسيالىق ءونىم شىعاراتىن كاسىپورىنداردىڭ كوبەيىپ كەتكەنى راس. ولار شىعاراتىن ونىمدەردىڭ پايدالانىلۋ اياسى, اتاۋى شامالاس بولعانىمەن قۇرامى, ساپاسى, قوسپالارى ءارتۇرلى. ماسەلەن, دارىگەرلەر قولدارىن تاۋلىگىنە كەمىندە 30-40 رەت زارارسىزداندىرادى دەلىك. ويلاپ قاراڭىزشى, ەگەر تاۋار ساپاسىز بولسا, قول قانداي كۇيگە تۇسەر ەدى؟ سول سەبەپتى ءبىز ساپالى شيكىزات قولدانامىز. ارينە ءبىزدىڭ ءونىمدى ايتارلىقتاي ارزان دەپ ايتا المايمىن. تۇتىنۋشىلارمىزدى باعا ەمەس, ساپا قىزىقتىرادى, – دەيدى سەرىكتەستىك ديرەكتورى ءاليا قايراقباەۆا.
كاسىپورىن ونىمدەرى وتكەن جىلدان بەرى قىرعىز ەلىندە ساۋدالانىپ كەلەدى. بيىل رەسەيگە دە ەكسپورتتالا باستادى. كومپانيا نەگىزىنەن دەنساۋلىق ساقتاۋ ۇيىمدارى مەن تاماق ونەركاسىبى سالاسىنىڭ سۇرانىسىن وتەيدى. سوڭعى كەزدەرى ەلدەگى احۋالعا بايلانىستى قوناقۇي, سۇلۋلىق سالوندارى مەن ساۋدا ورىندارى, توتەنشە جاعدايدا جۇمىس ىستەپ جاتقان وزگە دە مەكەمەلەردەن كوپ سۇرانىس تۇسە باستاعان. وسىدان كەيىن كاسىپورىن ءوندىرىس كولەمىن ەكى ەسە ارتتىرىپ, قوسىمشا جۇمىس ورىندارىن اشتى. رەتسەپتۋراسى ەرەكشە بولعاندىقتان كومپانيانىڭ كەيبىر ءونىمىن, ءتىپتى تمد اۋماعىنان ىزدەپ تابا المايسىز.
– «تالپىنعاننىڭ توقپاعى تاسقا دا قازىق كىرگىزەر» دەگەن – وسى. تاباندى ىزدەنىس پەن تىنىمسىز ەڭبەك ارقىلى تالاي بيىكتى باعىندىردىق. ەڭ باستىسى, حالقىمىز بۇل ىندەتتەن امان-ەسەن شىقسىن دەپ تىلەيىك!, – دەدى كاسىپورىن باسشىسى.
قوستاناي وبلىسى