الەۋمەتتىك شارالاردىڭ پرەزيدەنتتىك پاكەتى

وعان 42 500 تەڭگەلىك الەۋمەتتىك تولەم, زەينەت­اقىنىڭ يندەكساتسياسى, جىلدىق 10 پايىزدىق مەملەكەتتىك جاردەماقى, نەسيەنى 90 كۇنگە شەگەرۋ, كوممۋنالدىق شىعىندار ءۇشىن 15 مىڭ تەڭگەدەن ءبولۋ, الەۋمەتتىك ماڭىزى بار تاۋارلاردى مەملەكەتتىك رەتتەۋ, «جۇمىسپەن قامتۋدىڭ جول كارتاسى» مەملەكەتتىك باعدارلاماسىنا بولىنەتىن قاراجاتتى 1 ترلن تەڭگەگە دەيىن ارتتىرۋ قادامدارىن جاتقىزدىق. پرەزيدەنتتىڭ الەۋمەتتىك شارالار پاكەتى قازىرگى تاڭدا الەۋمەتتىك ساياساتتا ۇكىمەت تاراپىنان كەدەرگىسىز ورىندالۋى ءتيىس تاپسىرماعا جاتادى. جالپى الەمدىك تاجىريبەدە الەۋمەتتىك ساياسات مودەلى ۇشكە بولىنەدى. ولار: سكانديناۆيالىق, كونتينەنتالدىق جانە انگلو-ساكسوندىق. اتاپ وتكەن امالداردىڭ سوڭعىسى جەكە قامتاماسىز ەتۋ, جوعارى جاۋاپكەرشىلىك سيپاتىنا يە. كونتينەنتالدىق امال – الەۋمەتتىك قورعاۋ سالاسىنا باسا ماڭىز بەرەتىن ەۋروپالىق مودەل. سكانديناۆيالىق مودەل – مەملەكەتتىڭ الەۋمەتتىك كەپىلدىكتەرىنىڭ امبەباپ سيپاتقا يە بولۋى. وندايدا مەملەكەت حالىقتىڭ الەۋمەتتىك ءال-اۋقاتى ءۇشىن جاۋاپكەرشىلىكتى وزىنە الادى. ەگەر ءبىز قازاقستاندىق مودەل تۋرالى ايتار بولساق, الەۋمەتتىك قامتاماسىز ەتۋ, دەنساۋلىق ساقتاۋ جانە ءبىلىم بەرۋ سالاسىندا مينيمالدى پاكەتتەر قاراستىرىلعان. وعان جۇمىسسىزداردى الەۋمەتتىك قولداۋ, ەڭ تومەنگى ايلىق, زەينەتاقى, مەديتسينالىق كومەكتىڭ كەپىلدەندىرىلگەن كولەمى, تەگىن ورتا ءبىلىم, تەگىن جوعارى ءبىلىمدى كونكۋرستىق نەگىزدە الۋ, قولجەتىمدى اقىعا ازاماتتارعا ءۇي ۇسىنۋ شارالارى ەنەدى.

راحىم وشاقباەۆ,

ساياساتتانۋشى