قاراعاندى وبلىسىندا ءوڭىردىڭ توتەنشە جاعداي جانە كارانتين كەزىندەگى احۋالى تۋرالى بارلىق اقپارات پەن مالىمەتتەر توعىستىرىلاتىن جەدەل ارەكەت ەتۋ ورتالىعى قۇرىلدى. وبلىس باسشىلىعىنىڭ ايتۋىنشا, جاڭا قۇرىلىم ايماقتىق جەدەل شتابتىڭ نەگىزگى شەشىم قابىلداۋ ورتالىعىنا اينالۋى ءتيىس.
«جەدەل ارەكەت ەتۋ ورتالىعىنىڭ جۇمىسىنا بارلىق جۇمىلدىرىلعان قۇرىلىمدار مەن قىزمەتتەردىڭ, اتاپ ايتقاندا, پوليتسيا, سانيتارلىق-ەپيدەميالىق قاۋىپسىزدىك, اسكەري, وبلىستىق دەنساۋلىق ساقتاۋ باسقارماسى, باسقا دا باسقارمالار مەن دەپارتامەنتتەردىڭ قىزمەتكەرلەرى اتسالىساتىن بولادى. ورتالىققا وبلىستا بولىپ جاتقان بارلىق وقيعالار تۋرالى اقپاراتتار كەلىپ تۇسەدى. جۇمىس ءتارتىبى – 24/7. كەلىپ تۇسكەن اقپارات ودان ءارى ءىس-قيمىل بويىنشا ۇسىنىستاردى تالداۋ جانە ازىرلەۋ ءۇشىن وتە ماڭىزدى. ياعني تۋىنداعان ماسەلەلەردى بارلىق قىزمەتتەردىڭ قاتىسۋىمەن جەدەلدەتىپ شەشۋگە مۇمكىندىك تۋادى», دەپ جازدى ءوزىنىڭ Facebook-تەگى پاراقشاسىندا وبلىس اكىمىنىڭ ورىنباسارى الىشەر ابدىقادىروۆ.
ورتالىقتىڭ جۇمىسى سانيتارلىق-ەپيدەميالىق قاۋىپسىزدىك جانە دەزينفەكتسيا, ازىق-ت ۇلىك قاۋىپسىزدىگى مەن تىرشىلىكتى قامتاماسىز ەتۋ (تكش, ەنەرگەتيكا), سانيتارلىق بلوك-بەكەتتەردىڭ ءىس-قيمىلىن ۇيلەستىرۋ جانە باسقا دا بىرقاتار باعىتتار بويىنشا جۇرگىزىلەدى.
Senim 109 قىزمەتى جاەو-نىڭ جەدەل قولداۋ جەلىسى بولادى. تۇرعىندار بۇل جەلىگە وزدەرىنىڭ بارلىق ماسەلەلەرىن ايتىپ, قىزمەتىنە جۇگىنە الادى.
«بارلىق قىزمەتتەر بىرقاتار شەكتەۋلەر جاعدايىنداعى وبلىستىڭ تىنىس-تىرشىلىگىن قامتاماسىز ەتۋگە جۇمىلدىرىلادى. باستى مىندەت – كوروناۆيرۋستىڭ كەڭ تارالۋىنا جول بەرمەۋ, سونداي-اق وبلىس ەكونوميكاسىنا جانە تۇرعىنداردىڭ ءال-اۋقاتىنا سالقىنى ءتيۋى مۇمكىن تەرىس اسەرلەردى ازايتۋ», دەپ اتاپ ءوتتى الىشەر ابدىقادىروۆ.
سونىمەن قاتار ول كارانتين جاريالانعان ايماقتارداعى كاسىپورىنداردا جۇمىس ىستەيتىن تۇرعىنداردىڭ ءتىزىمى قاراعاندى, تەمىرتاۋ, ساران, شاحتينسك جانە اباي قالالارى اكىمدىكتەرىنىڭ كومەگىمەن جاسالعانىن جەتكىزدى. بۇگىننەن باستاپ بۇل قالالاردا تۇراتىن ازاماتتار جۇمىسىنا بارىپ-كەلۋى ءۇشىن باقىلاۋ بەكەتتەرى ارقىلى وتەتىن بولادى.
قاراعاندى وبلىسى