قازىر كوروناۆيرۋس جۇقتىرىپ الماۋ ماقساتىندا بارلىق مەكەمەلەردە, ساۋدا ورتالىقتارىندا, ءتىپتى ۇيلەردە انتيسەپتيك كەڭىنەن قولدانىلۋدا. ونىڭ نەگىزگى قۇرامى سپيرت بولعاندىقتان, بۇل تۋرالى مۇسىلمان قاۋىمى اراسىندا سۇراقتار تۋىنداۋدا. قازاقستان مۇسىلماندارى ءدىني باسقارماسى شاريعات جانە ءپاتۋا ءبولىمى مەڭگەرۋشىسىنىڭ ورىنباسارى حاسان امانقۇل وسى ساۋالعا بايلانىستى جاۋاپ بەردى.
- ءابۋ حانيفا مەن ءابۋ يۋسۋفتىڭ كوزقاراسى بويىنشا ءجۇزىم جانە قۇرمادان باسقا ونىمدەردەن جاسالعان ءسپيرتتى انتيسەپتيك ماقساتىندا قولدانۋعا رۇقسات ەتىلەدى. ال قازىرگى مەديتسينالىق سپيرتتەر ءجۇزىم جانە قۇرمادان الىنبايتىنى بەلگىلى. انتيسەپتيك ماقساتىندا قولدانىلاتىن سۇيىقتىق, مەديتسينالىق سپيرت ءناجىس بولىپ ەسەپتەلمەيدى. ويتكەنى حارام نارسەنىڭ ءبارى ءناجىس بولا بەرمەيدى. مىسالى, ەسىرتكى مەن ۋدىڭ ۇكىمى حارام, بىراق ءوزى تازا. قۇرامىندا ءسپيرتى بار ءيىسسۋلار, سپيرت ارالاسقان سۇيىق زاتتار دەنەگە, كيىمگە تيسە ءناجىس بولمايدى, تيگەن جەرىن جۋ دا مىندەتتى ەمەس, - دەلىنگەن جازبادا.
قمدب مالىمەتىنە سۇيەنسەك, ارنايى انتيسەپتيك زاتتار نەمەسە مەديتسينالىق سپيرت تابىلماسا, زارۋلىك ۇكىمدى نەگىزگە الا وتىرىپ, سپيرتتىك ىشىمدىكتەردى دە انتيسەپتيك ماقساتىندا قولدانۋعا شاريعات رۇقسات ەتەدى. بىراق ول ءناجىس بولعاندىقتان, ناماز وقىعاندا سپيرتتىك ىشىمدىك تيگەن جەردى جۋىپ تاستاۋ شارت.