ورتالىق كوممۋنيكاتسيالار قىزمەتىنىڭ الاڭىندا توتەنشە جاعداي كەزىندە مەملەكەتتىك الەۋمەتتىك ساقتاندىرۋ قورىنان الەۋمەتتىك تولەم تاعايىنداۋ شارتتارى تۋرالى جالعان اقپارات بەرگەنى ءۇشىن جۇمىس بەرۋشىلەر مەن ازاماتتاردىڭ جاۋاپكەرشىلىگى تۋرالى ونلاين-ءباسپاسوز ءماسليحاتى ءوتتى.
جيىن بارىسىندا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ بىردە-ءبىر ادام 42 500 تەڭگە العانى, ءتىپتى جىبەرگەن قاتەلىگى ءۇشىن قىلمىستىق جازاعا تارتىلمايتىنىن اتاپ ءوتتى.
«بۇگىنگى تاڭدا توتەنشە جاعدايدىڭ سالدارىنا بايلانىستى تابىسىنان ايىرىلعان 3 ملن 960 مىڭ ادامعا الەۋمەتتىك تولەم تاعايىندالدى. ولارعا 157 ملرد تەڭگە تولەندى. وكىنىشكە قاراي, سوڭعى 4-5 كۇن بويى الەۋمەتتىك جەلىلەردە, قوعامدا «42 500 تەڭگە العانى ءۇشىن قىلمىستىق تۇرعىدا جازالايدى ەكەن» دەگەن اڭگىمە كوپ تارالىپ جاتىر. ءبىز ءبارىن قاراپ شىقتىق. 5 ساۋىردەن باستاپ زاڭگەرلەرىمىز وسى ماسەلەگە قاتىستى پىكىرلەرىن ايتا باستادى. ونىڭ ىشىندە ەرەكشە تارالعانى سول كۇنى zakon.kz پورتالىندا ورىس تىلىندە دانيار نۇرلان ۇلى مەن رۋسلان قوجاحمەت ەسىمدى زاڭگەر-ادۆوكاتتاردىڭ قىلمىستىق كودەكستىڭ الاياقتىققا قاتىستى باپتارىن تالداپ, سونى 42 500 تەڭگە تولەمىنە قاتىستىرىپ جازعان ماقالاسى بولدى. ول ازاماتتار «مينيستر نۇرىمبەتوۆتىڭ ەشكىمدى جاپپاي تەكسەرمەيمىز» دەگەن ءسوزىن جۇمىس بەرۋشىلەر پايدالانىپ, جالعان مالىمەتتەر بەرۋى مۇمكىن» دەگەنگە كەلتىرگەن. وسىعان بايلانىستى, بىردە-ءبىر ادام 42 500 تەڭگە العانى ءۇشىن, ءتىپتى جىبەرگەن قاتەلىگى ءۇشىن قىلمىستىق جازاعا تارتىلمايدى. وعان نەگىز جوق. وسىعان نۇكتە قويايىق. ەشكىم جاۋاپكەرشىلىككە تارتىلمايدى. ونى تالقىلاپ جاتقان زاڭگەرلەر دە بىلەدى. ءبىز ەشكىمدى تەكسەرمەيمىز. سەبەبى بۇل – الەۋمەتتىك تولەم. بۇل – الەۋمەتكە باعىتتالعان تولەم. جەكە تۇلعالاردى, رەسمي نە بەيرەسمي بولسىن, جۇمىس ىستەپ جۇرگەندەردى ۇيلەردى ارالاپ, تەكسەرمەيمىز. ەشتەڭەگە ۋايىمداماڭىزدار. سىزدەرگە تولەندى مە؟ الىڭىزدار, جاراتىڭىزدار. تەكسەرۋ بولسا دا ءبىزدى تەكسەرەدى», دەدى مينيستر.
سونىمەن قاتار ول جۇمىس بەرۋشىسى جالاقىسىنىڭ 50 پايىزىن عانا تولەپ وتىرعان قىزمەتكەرلەر 42 500 تەڭگەگە ءوتىنىم بەرە المايتىنىن جەتكىزدى.
«بۇل 42 500 تەڭگە الەۋمەتتىك تولەم جالاقىسىنان ايىرىلعاندارعا عانا بەرىلەدى. سوندىقتان جالاقى مولشەرى تومەندەگەن جاعدايدا الەۋمەتتىك تولەم بەرىلمەيدى. ياعني, بىردە-ءبىر تيىن تولەنبەيتىن اقىسىز دەمالىسقا جىبەرىلگەن جاعدايدا عانا 42 500 تەڭگە الۋعا قۇقىعىڭىز بولادى جانە ءوتىنىش بەرە الاسىزدار», دەپ جاۋاپ بەردى مينيستر.
سونىمەن قاتار ول الەۋمەتتىك تولەمدى زاڭسىز العاندار قاراجاتتى قاشان قايتارۋى كەرەكتىگىن دە اتاپ ءوتتى.
«قاي ۋاقىتتا قايتارعىڭىز كەلسە, سول ۋاقىتتا قايتارا الاسىزدار. ونىڭ مەرزىمى دە, قايتارۋ ءتارتىبى دە جوق. ەگەر ءسىز قاتەلەسكەنىڭىزدى كورىپ تۇرىپ قايتارامىن دەسەڭىز, ونى جاعدايىڭىز كەلگەن كەزدە قايتارىڭىز. قايتارمايمىن دەسەڭىز قايتارمايسىز», دەدى ب.نۇرىمبەتوۆ.