بۇل تۋرالى قوعامدىق كوممۋنيكاتسيا ورتالىعىندا وتكەن بريفينگتە ماڭعىستاۋ وبلىستىق ورتالىق مەشىتىنىڭ باس يمامى ءانۋار ەلجانوۆ حابارلادى.
قازاقستان مۇسىلماندارى ءدىني باسقارماسى استرونوميالىق زەرتتەۋ ورتالىقتارىنىڭ مالىمەتىنە سۇيەنىپ, سونداي-اق مىسىر, تۇركيا, رەسەيدىڭ, وزبەكستان جانە قىرعىزستان مۇسىلماندارى ءدىني باسقارمالارىنىڭ ۇستانىمدارىن ەسكەرە كەلە, بيىل رامازان ايىن ەلىمىزدە 24 ءساۋىر كۇنى باستاۋعا شەشىم قابىلدادى. رامازان ايى 30 كۇنگە جالعاسىپ, 24 مامىر كۇنى ورازا ايت نامازى وقىلادى دەپ جوسپارلانۋدا.
شاريعات بويىنشا باليعاتقا تولعان, اقىل-ەسى دۇرىس ءاربىر مۇسىلمانعا رامازان ايىندا كۇندە تاڭ اتقاننان كۇن باتقانعا دەيىن ورازا تۇتۋ – پارىز. الايدا, جولاۋشىلارعا, سىرقاتتانعان نەمەسە دەنساۋلىعى ناشار ادامدارعا, جۇكتى نەمەسە ومىراۋدا بالاسى بار ايەلدەرگە ورازا تۇتۋدى كەيىنگە قالدىرۋعا شاريعات رۇقسات بەرەدى.
- كارىلىك نەمەسە ايىقپايتىن اۋرۋ سەبەبىنەن ورازا ۇستاۋعا شاماسى كەلمەيتىن ادامدار ورازانىڭ ءار كۇنى ءۇشىن ءپىديا بەرەدى. بيىل 1 كۇننىڭ ءپىدياسى 1700 تەڭگە دەپ بەلگىلەندى. ول – ورتا ەسەپپەن 1 ادامنىڭ تاڭعى جانە كەشكى اسى نەمەسە ونىڭ قۇنىنا تەڭ قاراجات. جاعدايى جوق ادامداردان ءپىديا بەرۋ تالاپ ەتىلمەيدى. قاجەتتىلىگىن قوسپاعاندا, مال-مۇلكى, دۇنيەسى كۇمىس نيسابىنا جەتكەن, ياعني 127 مىڭ تەڭگەسى بار ادام رامازان ايىندا ءوزى جانە جانۇياسى ءۇشىن ءپىتىر ساداقا بەرۋى – ءۋاجىپ. بيىل 1 ادامنىڭ اتىنان بەرىلەتىن ءپىتىر ساداقا مولشەرى 370 تەڭگە دەپ بەكىتىلدى. ءپىتىر ساداقانىڭ قۇنى رەسپۋبليكا بويىنشا ەسەپتەگەندە ۇننىڭ نارىقتىق ورتاشا باعاسىمەن شىعارىلدى. ماتەريالدىق مۇمكىندىگى بار ادامدار ءپىتىر ساداقانى مەيىز (3920 تەڭگە) نەمەسە قۇرما (9400 تەڭگە) قۇنىمەن بەرگەنى ابزال.
رامازان ايىندا جاسالعان ءاربىر جاقسىلىققا ەسەلەپ ساۋاپ بەرىلەدى. سوندىقتان كوپشىلىك ساۋاپتى ءۇمىت ەتىپ, وسى ايدا زەكەت بەرۋدى ادەت ەتكەن. زەكەت بەرۋمەن زەكەت بەرۋشىنىڭ مال-دۇنيەسى تازارادى, بەرەكەسى ارتادى. يسلام دىنىندە باي ادامداردىڭ زەكەت بەرۋى – پارىز. باي دەپ قارىزى مەن قاجەتتىلىگىنەن ارتىق ءوسىمدى مال-دۇنيەسى ءدال قازىرگى ۋاقىتتا 1 ملن 170 مىڭ تەڭگەگە جەتكەن نەمەسە نيساب مولشەرىندە قويى, سيىرى, تۇيەسى, جىلقىسى بار ادامعا ايتىلادى, دەدى ماڭعىستاۋ وبلىستىق ورتالىق مەشىتىنىڭ باس يمامى ءانۋار ەلجانوۆ.
ءوز كەزەگىندە ءا.ەلجانوۆ ۆاحتالىق ادىسپەن جۇمىس ىستەيتىن ازاماتتاردى ورازا ۇستاعان كەزدە (اۋىزاشار مەن سارەسى ۋاقىتىندا) كارانتين ەرەجەسىن قاتاڭ ساقتاۋعا (1 مەتر اراقاشىقتىقتى) شاقىرادى. «نەگىزىندە, قازىرگى جاعدايدى ەسكەرسەك, ۆاحتالىق ادىسپەن جۇمىس ىستەيتىن ازاماتتار ءوز قاۋىپسىزدىگى ءۇشىن ورازانى كەيىن دە ۇستاي الادى» دەلىنگەن fatua.kz سايتىندا, دەدى ول.