بۇگىن سولتۇستىك قازاقستان وبلىسى اكىمىنىڭ ورىنباسارى رۋسلان الىشەۆ جۋرناليستەرگە بريفينگ بەرىپ, كوروناۆيرۋسقا بايلانىستى وبلىستاعى احۋالدى باياندادى.
ول الدىمەن كارانتيندىك رەجىمنىڭ ۇزارتىلاتىنىن جانە كەيبىر تالاپتار بۇرىنعىدان دا قاتايتىلاتىنىن ەسكە سالدى. سونىڭ ىشىندە كارانتين ايماقتارىنا ەنۋ نەمەسە شىعۋ تۇنگى ساعات 00.00-دەن باستاپ مۇلدە توقتاتىلاتىنىن ايتتى. بۇرىن مۇنداي ءتارتىپ وبلىس جانە اۋدان ورتالىقتارىنا قاتىستى عانا بولسا, ەندى بارلىق ايماققا وسىنداي رەجىم ورناتىلاتىن بولىپتى. ارينە, ادام جانىن اراشالاۋعا بايلانىستى قوزعالعان, سونىمەن قاتار ترانزيتتىك كولىكتەر بۇرىنعىشا جۇرە بەرەدى. ودان ءارى ر.الىشەۆ ادامداردىڭ ءومىر سۇرۋىنە اسا قاجەتتى ونىمدەر شىعاراتىن كاسىپورىنداردىڭ ءتىزىمى جاسالىپ, تەك سولار عانا قالىپتى جۇمىس ىستەيتىنىن ايتتى. ارينە, مەملەكەتتىك ورگاندار, دەنساۋلىق ساقتاۋ ورىندارى مەن ءدارىحانالار دا جۇمىستارىن توقتاتپايدى.
ر.الىشەۆتىڭ ايتۋىنا قاراعاندا كەشە سولتۇستىك قازاقستاندا تاعى ءبىر ادامنان جامان ىندەتتىڭ ىزدەرى تابىلعان. ول رەسەي فەدەراتسياسىندا ۆاحتالىق جۇمىس ىستەيتىن مامليۋتكا قالاسىنىڭ تۇرعىنى ەكەن. قازىر ول ينفەكتسيالىق ستاتسيونارعا جاتقىزىلعان.
سولتۇستىكتەگى جاعىمدى جاڭالىقتى رۋسلان قاناتحان ۇلى ءوزىنىڭ ءسوزىنىڭ سوڭىنا قالدىرعان ەكەن. ونىڭ ايتۋىنا قاراعاندا وڭىردە وسى ناۋقاسپەن اۋرۋحاناعا تۇسكەندەردىڭ 86 پايىزى, ياعني 25 ادام سىرقاتىنان ايىققان. سونىڭ ىشىندە بۇگىن دە 7 ادام ايىعىپ, اۋرۋحانادان شىعارىلىپتى. قازىر ينفەكتسيالىق ستاتسيوناردا ءتورت ادام عانا ەم الىپ جاتىر ەكەن. وسىعان قاراعاندا سولتۇستىكتىڭ اق حالاتتىلارى ابزال جاندارى ءوز ەڭبەكتەرىنە جاۋاپكەرشىلىكپەن قاراعان. ولاردىڭ ەڭبەكتەرىنە قانداي ماقتاۋ ايتسا دا تۇرارلىق.
سولتۇستىك قازاقستان وبلىسى