اسا اۋىر سالماق دارەجەسىندە بىرنەشە بەلدى نۇسقا بويىنشا الەم چەمپيونى اتانىپ وتىرعان ايگىلى كاسىپقوي بوكسشى ەنتوني دجوشۋا الداعى ۋاقىتتا كىمدەرمەن كۇش سىناسقىسى كەلەتىنىن جاريا ەتتى.
30 جاستاعى التى بوكسشىنىڭ ەسىمدەرىن اتاعان ەكەن. ولار – تايسون فيۋري, دەونتەي ۋايلدەر, دجاررەلل ميللەر, الەكساندر ۋسيك, لۋيس ورتيس جانە ادام كوۆناتسكي. بۇگىنگى تاڭدا وسى جىگىتتەردىڭ بارلىعى دا اۋىر جانە اسا اۋىر سالماقتاعى ۇزدىكتەر ساناتىنا ەركىن ەنگەن ساڭلاقتار. ايتۋلى بىلعارى قولعاپ شەبەرلەرىنىڭ كورسەتكىشتەرى مىناداي:
31 جاستاعى ۇلىبريتانيا وكىلى تايسون فيۋري 31 كەزدەسۋ وتكىزىپ, 30 رەت جەڭىسكە جەتتى. 21 قارسىلاسىن نوكاۋتقا جىبەردى. ءبىر باسەكە تەڭ ەسەپپەن اياقتالدى.
34 جاستاعى اقش سپورتشىسى دەونتەي ۋايلدەر 44 كەزدەسۋ وتكىزىپ, 42 رەت جەڭىسكە جەتتى. 41 قارسىلاسىن نوكاۋتپەن ۇتتى. ءبىر رەت ۇتىلىپ, تاعى ءبىر ءبىر باسەكەدە تەڭ ەسەپ تىركەلدى.
31 جاستاعى اقش بوكسشىسى دجاررەلل ميللەر 24 كەزدەسۋ وتكىزىپ, 23 رەت جەڭىسكە جەتتى. 20 قارسىلاسىن نوكاۋتقا جىبەردى. ءبىر باسەكە تەڭ ەسەپپەن اياقتالدى.
33 جاستاعى ۋكراينانىڭ ماقتانىشى الەكساندر ۋسيك 17 كەزدەسۋ وتكىزىپ, بارلىعىن ءوز پايداسىنا شەشتى. 13 قارسىلاسىن نوكاۋتپەن ۇتتى.
41 جاستاعى كۋبا قابىلانى لۋيس ورتيس 35 كەزدەسۋ وتكىزىپ, 31 رەت جەڭىسكە جەتتى. 26 رەت ايقىن باسىمدىق تانىتتى. ەكى رەت ۇتىلىپ, تاعى ەكى جەكپە-جەكتىڭ ناتيجەسى ەسەپكە الىنعان جوق.
31 جاستاعى پولشانىڭ وكىلى ادام كوۆناتسكي 21 كەزدەسۋ وتكىزىپ, 20 رەت مەرەيى ۇستەم بولدى. 15 قارسىلاسىن نوكاۋتقا جىبەردى.
ال ەنتوني دجوشۋانىڭ ءوزى بولسا, 30 جاستا. انگليانىڭ ۋوتفورد قالاسىندا تۋىپ-وسكەن ول كەزىندە اۋەسقويلار اراسىندا وليمپيادا چەمپيونى, الەم چەمپيوناتىنىڭ كۇمىس جۇلدەگەرى اتاندى. 2013 جىلدان بەرى كاسىپقوي رينگتە ونەر كورسەتىپ جۇرگەن دجوشۋا 24 جەكپە-جەك وتكىزىپ, سونىڭ تەك بىرەۋىندە عانا ۇتىلدى. 21 قارسىلاسىن ەسىنەن تاندىردى. اتاقتى بوكسشى بۇل كۇندەرى WBA نۇسقاسى بويىنشا سۋپەرچەمپيونى, IBF پەن WBO نقسقاسىنىڭ چەمپيونى.