شۆەتسيانىڭ ايگىلى حوككەيشىسى كوروناۆيرۋستان قالاي قينالعانىن ايتتى

ەسىمى حوككەي داڭقى زالىنا ەنگەن ويىنشى «وتە قورقىنىشتى بولدى. كەيدە اۋا جەتپەي, قاتتى تۇنشىعا باستايمىن. قول-اياعىم دىرىلدەيدى. ءبىر سوزبەن ايتسام, ءومىر مەن ءولىمنىڭ اراسىندا جاتقانداي كۇي كەشتىم. باعىما وراي, دارىگەرلەر دەر كەزىندە جەتتى. سولاردىڭ ارقاسىندا امان قالدىم. قازىر جاعدايىم ءبىراز جاقساردى. دەسەك تە تولىقتاي ايىعىپ كەتتىم دەپ ايتا المايمىن. سول سەبەپتى دە كۇتىنىپ, ۇيدە جاتىرمىن», - دەيدى ارداگەر حوككەيشى.

كۇنى كەشە عانا, ناقتىلاپ ايتساق 17 ساۋىردە 69 جاسقا تولعان بەرە سالمينگ ۇزاق جىلدار بويى ۇلتتىق حوككەي ليگاسىندا (ۇحل) ونەر كورسەتتى. 16 جىل بويى «تورونتو مەيپل ليفستىڭ» نامىسىن قورعاسا, تاعى ءبىر ماۋسىمدى «دەترويت رەد ۋينگزدىڭ» ساپىندا وتكىزدى.

اتاقتى قورعاۋشى شۆەتسيا قۇراماسى ساپىندا 1972 جانە 1973 جىلدارى وتكەن الەم چەمپيوناتىندا جۇلدەگەرلەر ساناتىنا قوسىلدى.