يندۋستريا جانە ينفراقۇرىلىمدىق دامۋ مينيسترلىگىنىڭ اۆتوموبيل جولدارى كوميتەتى «جول اكتيۆتەرى ساپاسىنىڭ ۇلتتىق ورتالىعى» ءۇش ايدا جۇرگىزىلگەن جۇمىستاردىڭ قورىتىندىلارىن شىعاردى. وسى ۋاقىت ارالىعىندا ورتالىق ماماندارى ەل وڭىرلەرىندەگى جولدارعا 1398 ساپار جاساپ, 1522 ولقىلىقتى انىقتادى. ولقىلىقتاردىڭ ءبىراز بولىگى اۆتوموبيل جولدارىن قىسقى كەزەڭدە كۇتىپ ۇستاۋ ساپاسىنىڭ تومەندىگىنە قاتىستى.
وسىلايشا, ورتالىقتىڭ كوشپەلى زەرتحانالارى رەسپۋبليكالىق ماڭىزى بار جول ۋچاسكەلەرىنە 1294 ساپار جاسادى. زەرتحانالىق جۇمىستار جۇرگىزىلگەن جول ۋچاسكەلەرىنىڭ جالپى ۇزىندىعى 27 مىڭ شاقىرىمنان اسادى. 3 ايدىڭ ىشىندە رەسپۋبليكالىق ماڭىزعا يە جولداردا 582 نىسان تەكسەرىلدى. تەكسەرىس جۇمىستارىنىڭ ناتيجەسىندە نىسانداردىڭ تالاپتارعا ساي ەمەس ەكەندىگى انىقتالدى. انىقتالعان ولقىلىقتاردىڭ سانى – 1386. وسى رەتتە مەردىگەر ۇيىمدارعا 579 حات جولداندى.
سونداي-اق, 2020 جىلدىڭ العاشقى توقسانىندا جەرگىلىكتى اۆتوموبيل جولدارىنىڭ 4500 شاقىرىمى تەكسەرىلگەن بولاتىن. زەرتحانالار مۇنداي جولدارعا 104 ساپار جاساپ, 136 ولقىلىقتى انىقتادى.
ەسكە سالايىق, «جول اكتيۆتەرىنىڭ ۇلتتىق ساپا ورتالىعى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنى قازاقستان رەسپۋبليكاسى ۇكىمەتىنىڭ قاۋلىسى نەگىزىندە 2019 جىلى 16 «وبلجولزەرتحانانى» رمم بىرىكتىرۋ ارقىلى قۇرىلعان بولاتىن. ونى قۇرۋداعى ماقسات – جولداردى سالۋ, قايتا قۇرۋ, جوندەۋ جانە كۇتىپ-ۇستاۋ, سونداي-اق جول اكتيۆتەرىن باسقارۋ سالاسىنداعى جۇمىستار مەن ماتەريالداردىڭ ساپاسىن ساراپتاۋ.
ايتا كەتەيىك, ءوز جۇمىسىنىڭ العاشقى جىلىندا ورتالىق جالپى پايدالانىمداعى اۆتوموبيل جولدارى مەن قۇرىلىس ماتەريالدارىنىڭ ساپاسىن ساراپتاۋ ماقساتىندا ورىندالعان جۇمىستاردىڭ اياسىندا ەل جولدارىنا 8 مىڭنان استام ساپاردى جۇزەگە اسىردى. 5 مىڭنان استام ولقىلىق انىقتالدى, قۇرىلىس ماتەريالدارىنان 12 مىڭنان استام سىناما الىنىپ, سىنالعان بولاتىن.
بيىل كاسىپورىن قازاقستان جولدارىنىڭ ساپاسىن باقىلاۋ شارالارىن كۇشەيتە تۇسپەك.