عالىمدار ەگىن ەگۋ كەزىندە فەرمەرلەرگە الەۋمەتتىك جەلىلەر مەن جەدەل حابارلامالار ارقىلى كەڭەس بەرەدى. بۇل تۋرالى اۋىل شارۋاشىلىعى مينيسترلىگىنىڭ ءباسپاسوز قىزمەتى حابارلادى.
ەلدەگى توتەنشە جاعدايعا بايلانىستى «ۇلتتىق اگرارلىق عىلىمي-ءبىلىم بەرۋ ورتالىعى» كەاق عالىمدارى Facebook, Instagram, Telegram جانە باسقا ينتەرنەت-رەسۋرستار ارقىلى فەرمەرلەرگە قاشىقتىقتان كونسۋلتاتسيالار ۇيىمداستىرۋدا. 30 ناۋرىزدان باستاپ «ۇاعبو» كەاق-نىڭ, قازۇاۋ جانە اۋىل شارۋاشىلىعى جانە وسىمدىك شارۋاشىلىعى, ماقتا شارۋاشىلىعى, جەمىس-جيدەك, كۇرىش, مال شارۋاشىلىعى عىلىمي-زەرتتەۋ ينستيتۋتتارىمەن بىرلەسىپ 55 مىڭ فەرمەرگە كوكتەمگى دالا جۇمىستارىنا دايىندىق بويىنشا 7 ونلاين-كەڭەس وتكىزدى.
ينتەرنەت ارقىلى كونسۋلتاتسيالار سۇراق-جاۋاپ تۇرىندە جۇرگىزىلدى. فەرمەرلەردى ەليتالىق تۇقىمدارمەن قامتاماسىز ەتۋ, تىڭايتقىشتاردى دۇرىس قولدانۋ, پارازيتتەر مەن اۋرۋلارعا قارسى اگروحيميالىق شارالار جۇرگىزۋ, ۇرىقتاندىرۋدىڭ جاساندى تەحنولوگيالارىن ەنگىزۋ, جەردىڭ قۇنارلىعىن جاقسارتۋ جانە باسقا دا ماسەلەلەر قىزىقتىردى.
شارۋالار وزدەرىن تولعاندىرعان سۇراقتارىن كەڭەس بارىسىندا قويىپ, عالىمداردان تۇششىمدى جاۋاپ الدى. ونلاين كەزدەسۋدەن كەيىن عالىمدار جەكە ۇسىنىستارى مەن تۇجىرىمدامالارىن فەرمەرلەردىڭ ەلەكتروندى پوشتاسىنا جولدادى.
«قازىر ەگىس كەزىندە فەرمەرلەرگە قولداۋ كورسەتۋ وتە ماڭىزدى. بۇگىنگى قيىن جاعدايدا زاماناۋي تەحنولوگيالاردىڭ كومەگىمەن قازاقستاننىڭ فەرمەرلەرىنە كەڭەستەر بەرىپ, كومەكتەسۋدى جالعاستىرامىز. ۇاعبو-نىڭ بارلىق فيليالدارى, عىلىمي-زەرتتەۋ ينستيتۋتتارى مەن تاجىريبە ستانسالارى, فەرمەرلەرگە الەۋمەتتىك جەلىلەر مەن مەسسەندجەرلەر ارقىلى ءوز ۇسىنىستارىن بەرەدى», - دەدى ۇاعبو-نىڭ باسقارما توراعاسى تولەۋتاي راحىمبەكوۆ.
ونىڭ ايتۋىنشا, ەگىس ماۋسىمىنا دەيىن ۇاعبو-نىڭ عالىمدارى قازاقستاندىق فەرمەرلەر ءۇشىن 230 ونلاين-كەڭەس وتكىزۋدى جوسپارلاپ وتىر.
وتكەن جىلى ۇاعبو 610 كونسۋلتاتسيا ۇيىمداستىرسا, ال ورتالىقتىڭ ەنشىلەس كومپانيالارى مىڭنان استام اقپاراتتىق-ءتۇسىندىرۋ ءىس-شارالارىن, ونىڭ ىشىندە 742 اۋىلشارۋاشىلىق ءوندىرىس ورتالىقتارى ءۇشىن 160-تان استام كەڭەس وتكىزگەن بولاتىن.