الماتى وبلىسىندا كوروناۆيرۋس ينفەكتسياسىن جۇقتىرعان تاعى 3 ادام انىقتالدى. وسى ساتكە دەيىن اۋىرعاندار سانى 44 ادامعا جەتتى.
ءۇش ادامنىڭ ىندەت جۇقتىرعانى زەرتحانالىق تەكسەرۋ بارىسىندا بەلگىلى بولعان. ناۋقاستىڭ ەكەۋى كەربۇلاق اۋدانىنان, بىرەۋى ەڭبەكشىقازاق اۋدانىن شىعىپ وتىر.
- كەربۇلاق اۋدانىنىڭ 1973 جىلى جانە 1991 جىلى تۋعان تۇرعىندارى بۇعان دەيىن 17 ساۋىردە اۋىرعان سىرقاتپەن بايلانىستا بولعان. ال ەڭبەكشىقازاق اۋدانىندا تىركەلگەن 2006 جىلعى ءجاسوسپىرىمنىڭ ۆيرۋستى قايدان جۇقتىرعانى ازىرگە بەلگىسىز. ناۋقاستىڭ اناسىنىڭ ايتۋىنشا, بالاسى ەشكىممەن بايلانىستا بولماعان. بۇگىن «ۇلتتىق ساراپتاما ورتالىعى» مەكەمەسىنىڭ وبلىستىق فيليالىندا ءۇش پاتسيەنتكە جاسالعان لابوراتوريالىق زەرتتەۋ ىندەت بەلگىسى بارىن كورسەتتى. قازىر ولار ەڭبەكشىقازاق اۋداندىق كوپ سالالى اۋرۋحاناسىنىڭ ينفەكتسيالىق بولىمىنە جاتقىزىلدى, - دەپ حابارلادى وبلىس اكىمىنىڭ ءباسپاسوز قىزمەتى.
ايتپاقشى, سىرقاتتارمەن بايلانىستا بولعاندار 24 ادام انىقتالعان. ولاردىڭ ون ەكىسى ءۇي كارانتينىنە الىنىپ, قالعاندارى پروۆيزورلىق ستاتسيونارعا جاتقىزىلدى. كوروناۆيرۋس ينفەكتسياسىن جۇقتىرعان ناۋقاستارمەن قارىم-قاتىنىستا بولعانداردىڭ بارلىعىنان ۆيرۋسولوگيالىق اناليز الىندى.