جەرگىلىكتى ارحيۆ مالىمەتتەرىنشە, ەكىنشى دۇنيەجۇزىلىك سوعىس باستالعان ۋاقىتتان باستاپ وڭىردەگى كولحوزدار (ۇجىمشار) مەن متس جانە سوۆحوزدارداعى (كەڭشار) بارلىق جۇمىس اۋىرتپالىقتارى ايەلدەر مەن جاسوسپىرىمدەر جانە قارتتار اتقارعان.
مەكتەپتەگى وقۋ كوكتەمگى ەگىسكە دەيىن اياقتالىپ, وقۋشىلار ەرەسەكتەرمەن بىرگە تاڭنىڭ اتىسىنان كۇن باتقانشا, ەگىستە جەر جىرتۋدان باستاپ بيداي ماساقتارىن جيناۋعا دەيىنگى جۇمىستاردى اتقاردى.
ەگىس شارۋاشىلىعىندا ەڭبەكتىڭ زۆەنولىق ءتۇرى «جوعارى ەڭبەك زۆەنوسى» ۇيىمداستىرىلعان.
مۇنداي زۆەنولار 1942 جىلى «وتوزەك» كولحوزىندا اننا داتسكوۆا, 1943 جىلى ءساۋىر ايىندا «قىزىلقوعام» كولحوزىنداعى مۇعالىم ءمۇنيرا ساتىبالدينا, بالتاباي سومجۇرەكوۆانىڭ باستاۋىمەن قۇرىلدى. وبلىس كولەمىندەگى زۆەنو سانى 388 قۇراعان.
تىلداعى حالىق ەكىنشى دۇنيە جۇزىلىك سوعىس جىلدارى «بارلىعى مايدان ءۇشىن, بارلىعى جەڭىس ءۇشىن» ۇرانىمەن جاۋىنگەرلەرگە ارنالعان كيىمدەر مايدانعا جىبەرگەن.
وبلىس تۇرعىندارىنان مايدانداعى جاۋىنگەرلەر 1942 جىلى جالپى سالماعى 17 مىڭ كەلى بولاتىن 1264 سالەمدەمە العان.
مايدانعا 10360 جۇپ پيما, 4190 شولاق تون, 10709 قۇلاقشىندى تىماق, 1639 تەرى جەلەتكەلەر, ون مىڭ جۇپتان اسا تەرى قولعاپتار, ماقتا فۋفايكالار مەن شالبارلار جانە باسقا بۇيىمدار جىبەرەدى.
ارحيۆ جانە وبلىستىق مۋزەيدە سوعىس جىلدارى قايىربەك باجەنەەۆ, جاقيا جاڭاتاەۆ, عابباس ىدىرىسحانوۆ سياقتى كولحوز باسشىلارى ارقايسىسى قورعانىس قورىنا 100 مىڭ سوم استام اقشا اۋدارعاندارى جايلى قۇجاتتار ساقتاۋلى.
كەيىن عابباس ىدىرىسحانوۆ باسقارعان «سورەۆنوۆانيە» كولحوزشىلارى قورعانىس قورىنا 25 مىڭ سوم, 21 مىڭ پۇت استىق تاپسىرعانى جازىلعان.
پاۆلودار وبلىسى