كەشە ەلورداداعى “جۋرناليستەر ۇيىندە” ورىس پراۆوسلاۆيە شىركەۋى استانا مەن الماتى ەپارحياسىنىڭ جاڭا باسشىسى ارحيەپيسكوپ الەكساندر باق وكىلدەرىمەن ءباسپاسوز كونفەرەنتسياسىن وتكىزدى. 53 جاستاعى ءپىرادار العاشقى ءسوزىن وسى باسقوسۋعا كەلگەن قالام يەلەرىنە العىسىن بىلدىرۋدەن باستادى.
– استانا مەن الماتى ەپارحياسى دىنارالىق جانە كونفەسسياارالىق ارىپتەستىكتى نىعايتا بەرۋگە مۇددەلى. سونداي-اق ءداستۇرلى دىندەر بىرلەستىگى وكىلدەرىمەن بىرلەسە وتىرىپ, ورتاق جوبالاردى اتقارۋعا, قازاقستاننىڭ بىرقاتار قالالارىندا دىنارالىق جانە ۇلتارالىق قاتىناستاردا بەيبىتشىلىك پەن ىنتىماقتاستىقتى دامىتۋ جولىندا جۇمىستار جاساۋعا ىنتالى, – دەدى ول.
اتالعان قىزمەتكە ناۋرىز ايىندا ورىس پراۆوسلاۆيە ءشىركەۋى سينودىنىڭ شەشىمىمەن تاعايىندالعان ارحيەپيسكوپ الەكساندر رەسەيدىڭ كيروۆ قالاسىندا دۇنيەگە كەلگەن. العاش لەنينگرادتا ءدىني سەميناريادا ءبىلىم العان سوڭ, ماسكەۋ ءدىن اكادەمياسىنا ءتۇسىپ, ونى 1990 جىلى ءبىتىرىپ شىعادى. بىرنەشە مەملەكەتتىك ناگرادالار مەن شىركەۋ وردەندەرىنىڭ يەگەرى.
ءابدىراحمان قىدىربەك.
استانا.